Vazhaithandu Chutney : ருசியான வாழைத்தண்டு சட்னி.. இட்லி தோசைக்கு சூப்பரான காமினேஷன்.. சிறுநீரக கல்லை அடித்து விரட்டும்!

Vazhaithandu Chutney : ஒரு வாழை மரம் முழுமையாக தன்னுடைய அனைத்து பகுதிகளிலும் இருந்து ஏராளமான பயன்களையும் நன்மைகளையும் நமக்கு தருகின்றன. வாழைக்காய், வாழைப்பழம், வாழைப்பூ, வாழை இலை, வாழைத்தண்டு என அனைத்து பொருட்களையும் உணவில் சேர்த்து கொள்ளலாம் என்பது ஆச்சரியமான விஷயம். அது நமது உடல் ஆரோக்கியத்தை உறுதி செய்யும் சூப்பர் உணவுகளில் ஒன்றாகும். தென்னிந்திய உணவுகளில் வாழை என்ற தாவரத்திற்கு முக்கிய பங்கு உள்ளது என்றே சொல்லாம். பொதுவாக நம் ஆரோக்கியத்திற்கு வாழைக்கு மிக முக்கிய பங்கு உள்ளது. குறிப்பாக வாழைத்தண்டு மிகவும் நல்லது. இது சிறுநீரக கற்கள் உருவாகாமல் தடுக்கிறது. நமது உடலில் ரத்த சர்க்கரை அளவை கட்டுப்படுத்துகிறது. உங்கள் உடலை குளிர்ச்சியாகவும், உடலை சுத்தமாகவும் வைத்துக்கொள்கிறது. உடல் எடை குறைப்பிலும் உதவுகிறது. இத்தனை நன்மைகள் நிறைந்த வாழைத்தண்டை எப்போதும் ஒரே மாதிரியாக பொரியல் செய்து கொடுத்தால் குழந்தைகளுக்கு போர் அடித்து விடும். அதற்கு பதிலாக இப்படி ருசியாக ஒரு சட்னி செய்து கொடுத்தால் சிறியவர்கள் முதல் பெரியவர்கள் வரை விரும்பி சாப்பிடுவார்கள். சூடான சாதம், இட்லி, தோசை, சப்பாத்தி, பிரெட் என எந்த உணவோடும் சாப்பிட அருமைகயான காம்பினேசன். இங்கு அசத்தலான டேஸ்ட்டில் வாழை தண்டு சட்னி எப்படி செய்வது என பார்க்கலாம்.

வாழைத்தண்டு சட்னிக்கு தேவையான பொருட்கள்

வாழைத்தண்டு

வெங்காயம்

பச்சை மிளகாய்

பூண்டு

நிலக்கடலை

மல்லிவிதை

பொட்டுக்கடலை

மிளகு

சீரகம்

கொத்தமல்லி

தேங்காய்

புளி

உப்பு

கடலை எண்ணெய்

கடுகு உளுந்து

கறிவேப்பிலை

வரமிளகாய்

வாழை தண்டு சட்னி சட்னி செய்முறை

கால் கிலோ அளவு வாழை தண்டை சுத்தம் செய்து நறுக்கி எடுத்து கொள்ளவும். ஒரு கடாயை சூடாக்கி அதில் ஒரு ஸ்பூன் வறுத்த நிலக்கடலை, ஒரு ஸ்பூன் பொட்டுக்கடலை, ஒரு ஸ்பூன் மல்லி விதை வறுக்க வேண்டும். மல்லி விதை பச்சை வாடை போகும் அளவிற்கு வறுக்க வேண்டும். கடைசியாக அதில் அரை ஸ்பூன் மிளகு மற்றும் சீரகத்தையும் சேர்த்து வறுக்க வேண்டும். சீரகம் வாசம் வர ஆரம்பிக்கும்போது அதை ஒரு தட்டில் மாற்றி நன்றாக ஆற விட வேண்டும்.

இப்போது அதே கடாயில் இரண்டு ஸ்பூன் எண்ணெய் விட்டு அதில் 75 முதல் 100 கிராம் அளவிற்கு சின்ன வெங்காயம் சேர்த்து நன்றாக வதக்க வேண்டும். இதில் 3 பச்சை மிளகாய் சேர்க்கவும். வெங்காயம் லேசாக வதங்கிய பின் அதில் நாம் நறுக்கி வைத்த வாழை தண்டை சேர்க்க வேண்டும். வாழைத்தண்டு நன்றாக வதங்க வேண்டும். வாழை தண்டு பச்சை வாடை போகும் வரை அதை வேக விட வேண்டும். பச்சை வாடை போன பிறகு அதில் அரை கட்டு கொத்த மல்லி இலை மற்றும் ஒரு நெல்லிக்காய் அளவு புளிசேர்த்து அடுப்பை அணைத்து விட வேண்டும்.

பின்னர் ஏற்கனவே வறுத்த நிலக்கடலை, பொட்டுக்கடலை, மல்லிவிதை, மிளகு, சீரகத்தை மிக்ஸியில் தண்ணீர் சேர்க்காமல் அரைக்க வேண்டும். பின்னர் அதே ஜாரில் வதக்கிய பொருட்களை சேர்த்து கொஞ்சமாக தண்ணீர் விட்டு அரைக்க வேண்டும். நன்றாக அரைத்த பின் ஒரு பாத்திரத்திற்கு மாற்றி எடுத்துக்கொள்ளள வேண்டும்.

பின்னர் ஒரு தாளிப்பு கரண்டியில் இரண்டு ஸ்பூன் எண்ணெய் விட்டு அதில் ஒரு ஸ்பூன் கடுகு, உளுந்து, ஒரு வரமிளகாய் கிள்ளி போட்டு சேர்த்து தாளிக்க வேண்டும். கடைசியாக அதில் 2 சின்ன வெங்காயத்தை பொடியாக நறுக்கி அதில் சேர்க்க வேண்டும். ஒரு கொத்து கறிவேப்பிலைசிவக்க வதக்க வேண்டும். வெங்காயம் சிவந்து வந்த உடன் இந்த தாளிப்பை சட்னியில் சேர்த்தால் ருசியான வாழைத்தண்டு சட்னி ரெடி. ருசி அருமையாக இருக்கும்.

அறுசுவை உணவுகளின் குறிப்புகளை நீங்களும் அறிந்து கொள்ள, இந்துஸ்தான் டைம்ஸ் தமிழ் உடன் இணைந்திருங்கள். சமூக வலைதள பக்கங்களிலும் எங்களை தொடரலாம்.