பாய் வீட்டு பிரியாணி மணம் இனி நம்ம வீட்டிலும்; இதுதான் ரகசியம்! இப்படி மசாலா செய்யுங்கள்!

பிரியாணி, இது தெற்காசியாவின் புகழ்பெற்ற உணவாகும். தற்போது கணக்கெடுப்பு நடத்தினாலும் பிரியாணி பிடிக்காதவர்களே நாட்டில் இல்லை எனும் அளவுக்கு பிரியாணி பிரியர்களின் எண்ணிக்கை இருக்கும். அந்தளவுக்கு பிரபலமான உணவு. பிரியாணியை கறி, மீன், சிக்கன், பன்றிக்கறி, இறால் என அனைத்து வகைகளிலும் செய்யலாம். அதுவே சைவ உணவுகள் மட்டுமே சாப்பிடுபவர்களுக்கு பன்னீர், காய்கறிகள், காளான், முட்டை என வகைகள் உள்ளது. இது மட்டுமின்றி பச்சை பட்டாணி, டபுள் பீன்ஸ், பட்டர் பீன்ஸ், சோயாவைப் பயன்படுத்தியும் பிரியாணி தயாரிக்க முடியும். பீட்ரூட் பிரியாணி, உருளைக்கிழங்கு பிரியாணியுடம் செய்யலாம். எனவே பிரியாணி சாப்பிடவேண்டும் என்று ஆசைப்பட்டால் அசைவம் அல்லது சைவம் என இரண்டு வகைகளிலும் செய்து சாப்பிடலாம். தெற்காசியாவின் மிக பிரபலமான உணவான பிரியாணி உள்ளது. இது முஸ்லிம்களுடன் தொடர்புடைய உணவாக இருப்பதால், பாய் வீட்டு பிரியாணிக்கு மவுசு அதிகம். இந்தியாவில் ஆன்லைனில் ஆர்டர் செய்யப்படும் உணவுகளில் பிரியாணி அதிகம் இடம்பெறுகிறது. பிரியாணிக்கு என்றே குறிப்பிட்ட சில கடைகளும் உள்ளன. அதில் பிரியாணி சாப்பிட மக்கள் கூட்டமும் அலைமோதும். இவைகளால் இந்தியாவின் பிரபல உணவாக பிரியாணி உள்ளது. இந்த பிரியாணியின் சுவையை அதிகரிப்பதே அதில் சேர்க்கப்படும் மசாலாக்கள் தான்.

தேவையான பொருட்கள்

வரமல்லி – 100 கிராம்

மிளகு – 25 கிராம்

சோம்பு – 25 கிராம்

சாஹீ ஜீரா – 25 கிராம்

(இது பிரியாணிக்கு சுவை கூட்டக்கூடிய ஒரு மசாலா பொருள். இது சீரகத்தில் ஒரு வகை. இதை நீங்கள் மளிகைக் கடைகள் அல்லது சூப்பர் மார்க்கெட்கிளில் இருந்து வாங்கிக்கொள்ளலாம்)

கிராம்பு – 15 கிராம்

சுருள் பட்டை – 25 கிராம்

ஸ்டார் சோம்பு – 25 கிராம்

ஏலக்காய் – 15 கிராம்

மராத்தி மொக்கு – மொக்கு

ஜாவித்திரி – 5 கிராம்

(இது சாப்பாட்டின் சுவையையே மாற்றிவிடும். எனவே இதை கொஞ்சமாக மட்டுமே உபயோகிக்கவேண்டும்)

பிரியாணி இலை – 25 கிராம்

கருப்பு ஏலக்காய் – 10 கிராம்

கல்பாசி – 10 கிராம்

காய்ந்த ரோஜா இதழ் – 25 கிராம்

ஜாதிக்காய் – 3

செய்முறை

இவற்றை நன்றாக சுத்தம் செய்து சிறிது நேரம் வெயிலில் காய வைத்து எடுத்துக்கொள்ளவேண்டும். பின்னர் கடாயை சூடாக்கி ஒவ்வொன்றையும் தனித்தனியாக வறுத்து எடுக்கவேண்டும். சில பொருட்கள் விரைவில் கரிந்துவிடும் என்பதால் கவனமாக வறுத்து எடுக்கவேண்டும்.

ஒவ்வொன்றையும் 2 நிமிடங்கள் மட்டுமே வறுத்துகொள்ளவேண்டும். அதிகநேரம் வறுக்கக்கூடாது. வறுக்கவேண்டும் என்பது முக்கியமல்ல, அனைத்தையும் சூடாக்கி எடுக்கவேண்டும் என்பதுதான் முக்கியமானது. இவையனைத்தையும், ஆறவைத்து மிக்ஸி ஜாரில் அனைத்தையும் சேர்த்து ஒன்றாகப் பொடித்துக்கொள்ளவேண்டும்.

ஜாதிக்காய்களை வறுப்பதற்கு முன்னரே இடித்து கடாயில் சேர்க்கவேண்டும். மராத்தி மொக்கு, சுருள் பட்டை, கருப்பு ஏலக்காய் போன்றவை மிக்ஸியில் அரைபடாது என்பதால், அவற்றையும் வறுத்த பின்னர் மிக்ஸியில் மற்ற பொருட்களுடன் சேர்த்து அரைத்துக்கொள்ளவேண்டும்.

இந்த மசாலாவுக்கு வறுக்கும்போது முற்றிலுமே அடுப்பு குறைவான தீயில்தான் இருக்கவேண்டும். அப்போதுதான் பொருட்கள் ஒன்றும் கருகாமல் இருக்கும். அரைத்தவற்றை சூடி ஆறியபின்னர், ஒரு காற்றுப்புகாத டப்பாவில் அடைத்து வைத்திவிடவேண்டும். இதை நீங்கள் எந்த ஒரு பிரியாணி செய்யும் போதும் உபயோகிக்கவேண்டும். பிரியாணி மட்டுமின்றி, கிரேவிகள், குருமாக்கள் என எதில் வேண்டுமானாலும் சேர்த்துக்கொள்ளலாம்.