கொங்கு ஸ்பெஷல் தக்காளி குழம்பு; காலையிலே செஞ்சுட்டு ரெஸ்ட் எடுங்க! மூன்று வேளைக்கும் வெச்சுக்கலாம்!

காலை இட்லி, மதியம் சாப்பாடு, இரவு சப்பாத்தி என மூன்றுக்கும் நல்ல ஒரு சைட்டிஷ் என்றால் அது தக்காளிக் குழம்பு, இதை செய்வது எளிது. ஒரு நாளில் காலையில் இதை செய்து வைத்துக்கொண்டால் போதும். அன்றைய நாள் முழுவதுமே ஓட்டிவிட முடியும். இதை செய்வதற்கு முன் தக்காளியின் நன்மைகள் என்னவென்று பாருங்கள். தக்காளியில் உங்கள் உடலுக்கு தேவையான அளவு பீட்டா கரோட்டின்கள், லைக்கோபென்கள், வைட்டமின் சி சத்துக்கள் உள்ளது. இவையனைத்தும் செல்களின் சேதத்தை தடுக்கும் ஆன்டி ஆக்ஸிடன்ட்கள் ஆகும். தக்காளியில் உள்ள ஊட்டச்சத்துக்கள் இதய நோய்கள், டைப் 2 நீரிழிவு நோய்கள் மற்றும் நரம்பியல் கோளாறுகள் ஏற்படுவதை தடுக்கும் என்று ஆய்வுகள் கூறுகிறது. தக்காளி அதன் பன்முக குணங்களுக்காக சமையலில் பரவலாகப் பயன்படுத்தப்படுகிறது. பச்சை, மஞ்சள், சிவப்பு என அனைத்து நிறங்களிலும் உள்ளது. இதன் நன்மைகளை தெரிந்துகொள்ளுங்கள். நோய் எதிர்ப்பாற்றலை அகிகரிக்கிறது. புற்றுநோய் ஆபத்தை குறைக்கிறது. இதய ஆரோக்கியத்தை அதிகரிக்கிறது. ஆண்களின் மலட்டுத்தன்மையை போக்குகிறது. மலச்சிக்கலைத் தடுக்கிறது. நீரிழிவு நோயை கட்டுப்படுத்துகிறது. வளர்சிதை மாற்ற நோய்க்குறியை தடுக்கின்றன. மூளை ஆரோக்கியத்தை அதிகரிக்கிறது. உடற்பயிற்சியில் இழக்கும் ஆற்றலை மீட்கிறது. தக்காளியில் உள்ள ஊட்டச்சத்துக்களின் அளவுகளை தெரிந்துகொள்ளுங்கள். ஒரு தக்காளியில் கலோரிகள் 22.5, கொழுப்பு 0.25 கிராம்கள், சோடியம் 6.25 மில்லி கிராம்கள், கார்போஹைட்ரேட்கள் 4.86 கிராம்கள், நார்ச்சத்துக்கள் 1.5 கிராம்கள், 0 சர்க்கரை, புரதச்சத்துக்கள் 1.1 கிராம் உள்ளது.

இத்தனை ஆரோக்கிய நன்மைகள் கொண்ட தக்காளியில் இருந்து நாம் எண்ணற்று உணவுகளை தயாரிக்க முடியும். இது அன்றாட பயன்பாட்டில் அதிகளவில் பயன்படுத்தப்படுகிறது. தக்காளியைப் பயன்படுத்தி கொங்கு ஸ்பெஷல் தக்காளி குழம்பு செய்வது எப்படி என்று பாருங்கள்.

தேவையான பொருட்கள்

எண்ணெய் – 4 டேபிள் ஸ்பூன்

கடலை பருப்பு – 2 டேபிள் ஸ்பூன்

சோம்பு – ஒரு டேபிள் ஸ்பூன்

பட்டை – 1

மிளகு – ஒரு ஸ்பூன்

கிராம்பு – 4

இஞ்சி – ஒரு இன்ச்

பூண்டு – 4 பல்

வர மிளகாய் – 3

சின்ன வெங்காயம் – ஒரு கைப்பிடியளவு

பழுத்த தக்காளி – 4

கறிவேப்பிலை – ஒரு கொத்து

மிளகாய்த் தூள் – ஒரு ஸ்பூன்

மல்லித்தூள் – ஒரு ஸ்பூன்

மஞ்சள் தூள் – கால் ஸ்பூன்

உப்பு – தேவையான அளவு

தேங்காய்த் துருவல் – ஒரு கப்

மல்லித்தழை – சிறிதளவு

வெந்தயம் – 2 ஸ்பூன்

செய்முறை

ஒரு கடாயில் எண்ணெய் சேர்த்து, கடலை பருப்பு சேர்த்து அது நன்றாக பொரிந்து வந்தவுடன், சோம்பு சேர்த்து தாளிக்கவேண்டும். அடுத்து பட்டை, கிராம்பு, மிளகு, இஞ்சி, பூண்டு சேர்த்து நன்றாக வதக்கவேண்டும். வர மிளகாய், சின்ன வெங்காயம், கறிவேப்பிலை சேர்த்து வெங்காயம் பொன்னிறமாகும் வரை வதக்கவேண்டும்.

அடுத்து தக்காளி சேர்த்து நன்றாக குலைய வதங்கவிடவேண்டும். தேங்காய் துருவலையும் சேர்த்து வதக்கி, மல்லித்தூள், மிளகாய்த் தூள், மஞ்சள் தூள், உப்பு சேர்த்து வதக்கி ஆறவைத்து, மிக்ஸி ஜாரில் சேர்த்து அரைத்து எடுத்துக்கொள்ளவேண்டும்.

ஒரு கடாயில் எண்ணெய் சேர்த்து வெந்தயம், கறிவேப்பிலை சேர்த்து தாளிக்கவேண்டும். அடுத்து அரைத்த விழுதை சேர்த்து, மிக்ஸி ஜாரை கழுவிய தண்ணீர் சேர்த்து நன்றாகக் கொதிக்கவிடவேண்டும்.

தண்ணீர் வற்றி எண்ணெய் பிரிந்து வரும் நேரத்தில் அடுப்பை அணைத்து, மல்லித்தழை தூவி பரிமாறினால் சூப்பர் சுவையான கொங்கு ஸ்பெஷல் தக்காளி குழம்பு தயார். இதை காலையில் இட்லிக்கு ஊற்றிக்கொள்ளலாம். மதியம் சாதத்தில் சேர்த்து பிசைந்து சாப்பிடலாம். இரவு சப்பாத்திக்கும் தொட்டுக்கொள்ளலாம்.