Savukku Shankar: சவுக்கு சங்கரிடம் அரசியல் பேசிய கமல்ஹாசன்! மாறுகிறதா கூட்டணி கணக்கு?

மூத்த பத்திரிக்கையாளரான சவுக்கு சங்கர் திமுக அரசுக்கு எதிரான விமர்சனங்களை சமூகவலைத்தளமான ட்விட்டர் மற்றும் யூட்டியுபில் தொடர்ந்து முன் வைத்து வருகிறார். இந்த நிலையில் ‘சவுக்கு மீடியா’ என்ற புதிய செய்தி நிறுவனத்தையும் அவர் தொடங்கி உள்ளார்.

இந்த நிலையில் மக்கள் நீதி மய்யம் கட்சித் தலைவரும், நடிகருமான கமல்ஹசனை சந்தித்து சவுக்கு சங்கர் ஆலோசனை நடத்தியதாக தகவல்கள் வெளியாகி உள்ளது. இந்த சந்திப்பில் தான் எழுதிய ’கேள்வி எண் 17182’ என்ற நூலை கமல்ஹாசனிடம் அளிக்கும் புகைப்படத்தை ’எக்ஸ்’ சமூகவலைத்தளத்தில் சவுக்கு சங்கர் பதிவிட்டுள்ளார்.

அதில் ”மக்கள் நீதி மய்யம் தலைவர் திரு @ikamalhaasan அவர்களை சந்தித்து என் புத்தகத்தை பரிசளித்தேன். அரசியலும் பேசினோம்” என குறிப்பிட்டுள்ளார். 

அடுத்தாண்டு நாடாளுமன்றத் தேர்தல் நடைபெற உள்ள நிலையில் இந்தியா கூட்டணியில் மக்கள் நீதி மய்யம் இணையும் என கூறப்படுகிறது. ஏற்கெனவே கடந்த பிப்ரவரி மாதம் நடைபெற்று முடிந்த ஈரோடு கிழக்கு இடைத்தேர்தலில் காங்கிரஸ் வேட்பாளர் ஈ.வி.கே.எஸ்.இளங்கோவனை ஆதரித்து நடிகர் கமல்ஹாசன் பரப்புரை மேற்கொண்டிருந்தார். மேலும் காஷ்மீர் முதல் கன்னியாகுமரி வரை ராகுல் காந்தி நடத்திய பாரத் ஜோடா யாத்திரையிலும் கமல்ஹாசன் கலந்து கொண்டிருந்தார்.

தேர்தல் நெருங்கி வரும் நிலையில் கமல்ஹாசனை சவுக்கு சங்கர் சந்தித்து இருப்பது சமூகவலைத்தளங்களில் பேசு பொருளாகி உள்ளது.