Curry Leaves - Garlic Thokku : கருகரு நீள கூந்தல்; முடி உதிர்வுக்கு முற்று; ஆறு மாதம் கெடாது; கறிவேப்பிலை தொக்கு!

நாம் அன்றாடம் பயன்படுத்தும் உணவுகளில் முக்கியமான ஒன்று கறிவேப்பிலை. ஆனால் உணவுடன் சேர்த்து சமைக்கும்போது நாம் அதை தூக்கி வீசிவிடுகிறோம். ஆனால் கறிவேப்பிலை உடலுக்கு எண்ணற்ற நன்மைகளைத் தருகிறது. கறிவேப்பிலை கொழுப்பை குறைக்க உதவுகிறது. செரிமானத்தை சீராக்குகிறது. கல்லீரலை காக்க உதவுகிறது. தலைமுடி வளர்ச்சிக்கு உதவுகிறது. கண் ஆரோக்கியத்தை பாதுகாக்கிறது. தொற்றுகள் ஏற்படாமல் தடுக்கிறது. உடல் எடையை குறைக்க உதவுகிறது. உடலில் ரத்த ஓட்டத்தை அதிகரிக்கிறது. பக்கவிளைவுகளை தடுக்கிறது. காயங்களை ஆற்றுகிறது. நீரிழிவு நோய்க்கு எதிரான உட்பொருட்கள் இதில் அடங்கியுள்ளது. ஆயுர்வேத மருத்துவத்தில் பயன்படுத்தப்படுகிறது. இந்தியா, இலங்கை, பங்களாதேஷ் மற்றும் அந்தமான் தீவுகளில் பயரிடப்படுகிறது. இந்திய உணவுகளில் அதிகம் பயன்படுத்தப்படுகிறது. தற்போது ஆஸ்திரேலியா, பசிபிக் தீவுகள் மற்றும் ஆப்பிரிக்காவிலும் பயிரடப்படுகிறது. இத்தனை நன்மைகளை அள்ளி வழங்கும் கறிவேப்பிலையில் ஆறுமாதங்கள் வரை கெடாத தொக்கு செய்து வைத்துக்கொள்ள முடியும். அதை சாப்பிட உங்கள் உடலுக்கு இத்தனை நன்மைகளும் கிடைத்துவிடும்.

தேவையான பொருட்கள்

கறிவேப்பிலை – 2 கைப்பிடியளவு

(கறிவேப்பிலையை நன்றாக அலசி சுத்தம் செய்து தனியாக வைத்துக்கொள்ளவேண்டும்)

நல்லெண்ணெய் – 4 ஸ்பூன்

வர மிளகாய் – 6

புளி – எலுமிச்சை அளவு

கல் உப்பு – தேவையான அளவு

(கழுவி சுத்தம் செய்து வைத்துக்கொள்ளவேண்டும்)

வறுத்து அரைக்க தேவையான பொருட்கள்

வரமல்லி – ஒன்றரை ஸ்பூன்

மிளகு – ஒரு ஸ்பூன்

வெந்தயம் – அரை ஸ்பூன்

கடுகு – ஒரு ஸ்பூன்

சீரகம் – ஒரு ஸ்பூன்

தாளிக்க தேவையான பொருட்கள்

கடுகு – கால் ஸ்பூன்

உளுந்து – கால் ஸ்பூன்

பெருங்காயத் தூள் – கால் ஸ்பூன்

பூண்டு – 25 பல் (தோல் நீக்கியது)

செய்முறை 

கடாயில் வரமல்லி, மிளகு, சீரகம், வெந்தயம், கடுகு என அனைத்தையும் சேர்த்து கடுகு வெடிக்கும்போது அடுப்பை அணைத்துவிட்டு, இறக்கி ஆறவைத்து காய்ந்த மிக்ஸிஜாரில் சேர்த்து பொடித்து வைத்துக்கொள்ளவேண்டும்.

கடாயில் எண்ணெய் சேர்த்து சூடானவுடன், மிளகாய், புளி, கறிவேப்பிலை என அனைத்தையும் சேர்த்து சுத்தம் செய்து வைத்துக்கொள்ளவேண்டும்.

5 நிமிடம் அல்லது கறிவேப்பிலை மொறுமொறுப்பாகும் வரை வறுக்கவேண்டும். வறுத்த இந்த பொருட்களையும், ஆறியவுடன் மிக்ஸி ஜாரில் சேர்த்து அரைத்து எடுத்துக்கொள்ளவேண்டும். இதில் தேவையான அளவு கல் உப்பையும் சேர்த்து அரைத்துவிடவேண்டும்.

இதை அரைக்கும்போது தண்ணீர் சேர்க்கக்கூடாது. நீங்கள் நீண்ட நாட்கள் இதை பாதுகாக்கவேண்டும் என்பதால், இதில் நல்லெண்ணெய் சேர்த்து அரைத்துக்கொள்ளவேண்டும்.

கடாயில் நல்லெண்ணெய், கடுகு, உளுத்தம் பருப்பு, பெருங்காயத்தூள் மற்றும் பூண்டு சேர்த்து தாளித்துக்கொள்ளவேண்டும். வெள்ளை பூண்டு பொன்னிறமாகும் வறுக்கவேண்டும்.

இப்போது அரைத்து வைத்துள்ள கறிவேப்பிலை விழுது மற்றும் மசாலாப்பொடி சேர்த்து நன்றாக கலந்து குறைந்த தீயில் நன்றாக கொதிக்கவிடவேண்டும். எண்ணெய் பிரிந்துவரும்போது எடுத்தால் சூப்பர் சுவையான கறிவேப்பிலை தொக்கு தயார்.

இந்த தொக்கு குறைந்தது ஆறு மாதங்கள் வரை கெட்டுப்போகாமல் இருக்கும். இதை சூடான சாதத்தில் சேர்த்து சாப்பிடலாம். இட்லி, தோசை, சப்பாத்திக்கு தொட்டுக்கொண்டு சாப்பிடலாம். இது உங்கள் வீட்டில் உள்ள அனைவருக்கும் பிடித்த வகையில் இருக்கும்.

இதுபோன்ற எண்ணற்ற பயனுள்ள ரெசிபிக்கள் மற்றும் தகவல்களை உங்களுக்கு ஹெச்.டி தமிழ் அன்றாடம் தொகுத்து வழங்குகிறது. இதுபோன்ற பல்வேறு விவரங்களுக்கு எங்கள் இணையதளத்துடன் இணைந்திருங்கள். ஆரோக்கிய வாழ்வு வாழ வாழ்த்துக்கள்.