மாசாணி அம்மன் கோயிலில் பூஜை..சூர்யா - த்ரிஷா பங்கேற்பு! தொடங்கியது சூர்யா 45 படம்

சூர்யா நடிப்பில் இரண்டு ஆண்டுகள் கழித்து மிக பெரிய எதிர்பார்ப்புடன் கடந்த 14ஆம் தேதி கங்குவா படம் வெளியானது. எதிர்மறையான விமர்சனங்களால் படத்தின் வசூல் பெரிய அளவில் பாதிப்படைந்தது.

இந்த படத்தை தொடர்ந்து தற்போது கார்த்திக் சுப்பராஜ் இயக்கத்தில் காதல் கலந்த ஆக்‌ஷன் படத்தில் நடித்து வருகிறார் சூர்யா. சூர்யா 44 என்று அழைக்கப்படும் இந்த படம் அடுத்த ஆண்டு கோடை விடுமுறையில் வெளியாகும் என எதிர்பார்க்கப்படுகிறது.

சூர்யா 45 படம் பூஜையுடன் தொடக்கம்

இதையடுத்து நடிகர் சூர்யாவின் புதிய படத்தை ஆர்ஜே பாலாஜி இயக்கவுள்ளார். சூர்யா 45 என்று அழைக்கப்படும் இந்த படம் பூஜையுடன் இன்று தொடங்கியுள்ளது.

கோவை மாவட்டம் பொள்ளாச்சி அருகே உள்ள பிரசித்தி பெற்ற ஆனைமலை மாசாணியம்மன் கோயிலில் ரசிகர்களுக்கு மத்தியில் படத்தின் பூஜை நடைபெற்றது. இதில் நடிகர் சூர்யா, நடிகை த்ரிஷா உள்ளிட்ட படக்குழுவினர்கள் பங்கேற்றார்கள். சூர்யா 45 படத்தின் பூஜை விடியோ சமூக வலைத்தளங்களில் வைரலாகி வருகிறது.

பொள்ளாச்சியில் ஷூட்டிங்

கடந்த சில நாள்களுக்கு முன் சூர்யா 45 படத்தின் ஃபர்ஸ்ட் லுக் போஸ்டர் வெளியாகி ரசிகர்கள் மத்தியில் வரவேற்பை பெற்றது. விபூதி, குங்குமம் பூசப்பட்ட அரிவாள், ஈட்டியுடன் வித்தியாசமாக படத்தின் போஸ்ட்ர் அமைந்திருந்தது. தற்போது படம் பூஜையுடன் தொடங்கியிருக்கும் நிலையில் பொள்ளாச்சி மற்றும் அதன் சுற்றுவட்டார பகுதிகளில் 45 நாள்கள் வரை நடைபெற உள்ளதாக தகவல்கள் தெரிவிக்கின்றன.

இந்த படத்துக்கு ஏ.ஆர். ரஹ்மான் இசையமைக்கிறார். ட்ரீம் வாரியர் பிக்சர்ஸ் சார்பில் எஸ்.ஆர். பிரபு தயாரிக்கிறார்.

சூர்யா - த்ரிஷா ஜோடி

தமிழ் சினிமாவில் 20 ஆண்டுகளுக்கும் மேலாக ஹீரோயினாக இருந்து வரும் த்ரிஷா, 2002இல் சூர்யா நடிப்பில் வெளியான மெளனம் பேசியதே படம் மூலம் தான் ஹீரோயினாக அறிமுகமானார். இதன் பின்னர் 2005 இல் வெளியான ஆறு படத்தில் சூர்யாவுக்கு ஜோடியாக நடித்தார்.

பின்னர் 2010இல் கமல்ஹாசன் நடிப்பில் வெளியான மன்மதன் அம்பு படத்தில் ஒரு பாடலுக்கு சூர்யாவுடன் இணைந்து நடித்தார். இதைத்தொடர்ந்து தற்போது சூர்யா - த்ரிஷா ஜோடி மீண்டும் சூர்யா 45 படத்தில் இணைந்துள்ளது.

ஒரு மணி நேரத்தில் ஒகே சொன்ன சூர்யா

பிரபல ஊடகமான ஆனந்த விகடனில் நடந்த உரையாடலின் போது சூர்யாவுக்காக கதை சொன்ன அனுபவத்தை ஆர்ஜே பாலாஜி பகிர்ந்தார். அப்போது அவர், "சூர்யாவுக்காக கதை இருப்பதை சொல்லுமாறு எனக்கு அழைப்பு வந்தது. உடனடியாக நான் சூர்யாவை சந்தித்து கதை சொன்னேன். காலை 10 மணி போல் கதை சொல்ல தொடங்கி 11 மணி வரை என ஒரு நேரமாக சொல்லி முடித்தேன். இதை கேட்டதும், 'சூப்பரா இருக்கு. நான் பன்றேன்' என்றார். 15, 16 வருஷத்துக்கு அப்புறம் டேபிளில் கதை கேட்டவுடன் ஒகே சொன்னது இந்த படத்துக்குதான் என சொன்னார்.

எக்கசக்க ஸ்வீட் ஸ்பாட்ஸ், தியேட்டர் மொமன்ட்கள் இருக்குன்னு சொன்னார். இது ஆன் தி ஸ்பாட் நடந்தது. சூர்யா இந்த கதையை செய்யுறேன்னு சொன்னவுடன் கதையின் மையத்தை தொடாமல் சூர்யாவுக்கு என சில மாற்றங்களுடன் மற்றொரு வெர்ஷனும் எழுதியுள்ளேன். இந்த படம் மக்களுக்கும் புடித்தது என்ற சந்தேஷம் தான்" என்று பேசினார்.

பிரபல எஃப்எம்மில் ரேடியோ ஜாக்கியாக இருந்த ஆர்ஜே பாலாஜி, தமிழ் சினிமாவில் காமெடி நடிகராக அறிமுகமானார். அதன் பின்னர் கதையின் நாயகனாக சில படங்களில் நடித்து, நயன்தாராவை லீட் கேரக்டரில் நடிக்க வைத்து மூக்குத்தி அம்மன் என்ற படத்தை இயக்கினார். இந்த படம் ரசிகர்கள் மத்தியில் நல்ல வரவேற்பை பெற்றது. இந்த படத்துக்கு அப்புறம் தற்போது சூர்யாவை வைத்து புதிய படத்தை இயக்குகிறார்.

இதற்கிடையே ஆர்ஜே பாலாஜி கதையின் நாயகனாக நடித்திருக்கும் சொர்க்கவாசல் என்ற படம் வரும் வெள்ளிக்கிழமை திரைக்கு வருகிறது.