சோபிதாவுடன் திருமணம்! கடைசி புகைப்படமும் டெலீட்..சமந்தாவை மொத்தமாக வாழ்க்கையில் இருந்து தூக்கிய நாக சைதன்யா

தென் இந்திய சினிமாவில் ஸ்டார் தம்பதிகளாக இருந்த நாக சைதன்யா - சமந்தா ஆகியோர் இருந்தனர். கடந்த 2017இல் திருமணம் செய்து கொண்ட இவர்கள், 2021 கருத்து வேறுபாடு காரணமாக விவாகரத்து செய்தனர். இதைடுத்து கடந்த ஆகஸ்ட் மாதம் நடிகர் நாக சைதன்யா, தெலுங்கு நடிகை சோபிதா துலிபாலா ஆகியோருக்கு நிச்சயதார்த்தம் நடைபெற்றது.

இதனால் நாக சைதன்யா - சமந்தா ஜோடி மீண்டும் சேருவதற்கான வாய்ப்பு கதவுகள் மூடப்பட்ட நிலையில், சமந்தாவின் புகைப்படங்கள் அனைத்தையும் இன்ஸ்டாவில் இருந்து நீக்குமாறு ரசிகர்கள் பலரும் நாக சைதன்யாவுக்கு குட்டு வைத்தனர்.

கடைசி புகைப்படமும் நீக்கம்

இதையடுத்து தற்போது சோபிதாவுடனான திருமணத்துக்கு முன்னர், தனது இன்ஸ்டாவில் இருக்கும் சமந்தாவின் கடைசி புகைப்படத்தையும் நீக்கியுள்ளார். தனது முன்னாள் மனைவியான சமந்தா தொடர்பான மூன்று பதிவுகள் நாக சைதன்யாவின் இன்ஸ்டா பீடில் இருந்துள்ளது. அதில் ஒன்றாக கடந்த அக்டோபர் 2021இல் சமந்தாவுடனான விவாகரத்து குறித்த பதிவாக உள்ளது.

மற்றொரு பதிவாக திருமணத்துக்கு பின் 2018இல் இருவரும் மஞ்லி என்ற தெலுங்கு படத்தின் போஸ்டரும் இருந்து வருகிறது.

மூன்றாவது புகைப்படமாக, ரேஸ் டிராக்கில் இருவரும் எடுத்துக்கொண்ட படம் இருக்கிறது. சிவப்பு நிற ரேஸ் கார் அருகே இருவரும் நிற்க, அதில் "த்ரோ பேக், திருமதி மற்றும் கேர்ள்பிரண்ட்" என கேப்ஷனில் குறிப்பிட்டிருந்தார். இந்த பதிவுகளை நீக்குமாறு சமந்தா ரசிகர்கள் கேட்டுக்கொண்தற்கு இணங்க, தற்போது நாக சைதன்யா அந்த பதிவை நீக்கியிருக்கிறார்.

நாக சைதன்யாவுடன் நிச்சயதார்த்தம்

கடந்த இரண்டு ஆண்டுகளாக நாகசைதன்யா - சோபிதா இடையிலான உறவு குறித்தும், டேட்டிங் குறித்தும் உலா வந்த வதந்திகளுக்கு முற்றுப்புள்ளி வைக்கப்பட்டுள்ளது. கடந்த ஆகஸ்ட் 8ஆம் தேதி இந்த ஜோடிக்கு இருவரின் குடும்பத்தார் முன்னிலையில் நிச்சயதார்த்தம் நடைபெற்று முடிந்துள்ளது. இதனை நாக சைதன்யாவின் தந்தையும், தெலுங்கு சினிமாவின் மூத்த நடிகரான நாகார்ஜுனா தனது சமூக வலைத்தளபக்கத்தில் பகிர்ந்தார்.

சமந்தாவிடம் காதலை வெளிப்படுத்திய ஆக்ஸ்ட் 8ஆம் தேதியிலேயே, தற்போது சோபிதாவுடன் நிச்சயதார்த்தம் செய்துள்ளார் நாக சைதன்யா. கடந்த மே 2022இல் நாக சைதன்யா - சோபிதா ஜோடி முதல் முறையாக சந்தித்ததாக கூறப்படும் நிலையில், அவ்வப்போது ஐரோப்பிய நாடுகளில் இருவரும் ஜோடியாக ஊர் சுற்றியுள்ளனர்.நிச்சயதார்த்தம் முடியும் வரை தங்களுக்குள் இருக்கும் உறவை வெளிப்படுத்தவில்லை.

தற்போது இவர்களின் திருமணம் ஏற்பாடுகள் நடைபெற்று வரும் நிலையில், சோபிதா திருமண சடங்குகளில் பங்கேற்கும் புகைப்படங்கள் சமூக வலைத்தளங்களில் வெளியாகி வைரலாகி வருகின்றன. தெலுங்கு திருமணங்களில் முக்கிய சடங்காக இருக்கும் உலக்கை, உரலில் மஞ்சள் அடிக்கும் நிகழ்வு விசாகப்பட்டினத்தில் நடைபெற்று முடிந்துள்ளது. விரைவில் இவர்களின் திருமண தேதி குறித்த அறிவிப்பு வெளியாகும் என தெரிகிறது.

நாக சைதன்யா, சோபிதா படங்கள்

நாக சைதன்யா தற்போது சந்தூ மொண்டேடி இயக்கத்தில் தாண்டேல் என்ற படத்தில் நடித்து வருகிறார். படத்தில் அவருக்கு ஜோடியாக சாய் பல்லவி நடிக்கிறார். அதேபோல் சோபிதா நடிப்பில் இந்த ஆண்டில் மங்கி மேன் என்ற ஹாலிவுட் படமும், லவ் சித்தாரா என்ற இந்தி படமும் வெளியாகியுள்ளது.