பொது இடத்தில் நடிகைக்கு முத்தம்.. ஒரே வருஷத்தில் 2 கல்யாணம்.. கிசுகிசுக்கு பதில் அளித்த நடிகர் ஜெயராம்

நடிகர் ஜெயராம் தமிழ், மலையாள மொழி படங்களில் கடந்த 37 வருடங்களாக நடித்து மக்களை மகிழ்வித்து வருகிறார். இவர் சமீபத்தில் விருது வழங்கும் விழா ஒன்றில் பங்கேற்று பேசிய வீடியோ ஒன்று இப்போது வைரலாகி வருகிறது.

தமிழ்நாட்டை பூர்வீகமாக கொண்டிருந்தாலும் நடிகர் ஜெயராம் மலையாள திரையுலகின் மூலமே மக்களுக்கு பரிட்சையமானார். அங்கு அவர் தன்னுடைய நடிப்பினாலும், கலகலப்பான பேச்சினாலும் மக்களை கவர்ந்து வந்த நிலையில், முறை மாமன் திரைப்படத்தின் மூலம் தமிழ் மொழி ரசிகர்களுக்கு அறிமுகமானார்.

முறைமாமனாக மாஸ் காட்டிய ஜெயராம்

தனது முதல் படத்திலேயே நடிகர் கவுண்டமனியினுடன் ஜோடி சேர்ந்து அவர் செய்திருக்கும் ரகளை மக்களை வெகுவாக ஈர்த்தது. ஆத்தங்கரையில் சேர் போட்டு உட்கார்ந்து சைட் அடிப்பது, நாயிடம் கவுண்டமணி மாட்டிக்கொள்வது, வீட்டில் சண்டையிட்டு கவுண்டமணியும் ஜெயராமும் சேர்ந்து சமைத்துவிட்டு, சாப்பிடப்போகும்போது, அது சரியில்லாமல் போக கொடுக்கும் ரியாக்‌ஷன் அனைத்தும் இப்படத்தில் ரசிக்கும்படியாக இருந்தன. குறிப்பாக, அண்ணன் அண்ணன் என்ற வசனமும், எங்க அக்கா மகளே இந்து என கவுண்டமணி செய்யும் மாடுலேஷனும் சுந்தர்.சியின் முறை மாமன் படத்தை பட்டி தொட்டி எங்கும் பிரபலமாக்கியது.

ஜெயராமின் ரசிக்க வைக்கும் படங்கள்

இதையடுத்து இவருக்கு தமிழிலும் மலையாளத்திலும் மாற்றி மாற்றி பட வாய்ப்புகள் வந்த வண்ணம் இருந்தது. இரண்டும் தொடர்ந்து கவனம் செலுத்தி வந்த ஜெயராம். பின் மலையாள சினிமாவிற்கு முக்கியத்துவம் கொடுத்து நடித்து வந்தார். இவர் நடித்த தெனாலி, பஞ்சதந்திரம், துப்பாக்கி, பொன்னியின் செல்வன், தி கோட் போன்ற படங்கள் அவரை மேலும் பிரபலமாக்கின.

ஒரே வருடத்தில் 2 திருமணம்

நடிகர், காமெடியன், குணச்சித்திர நடிகர் என எந்தக் கதாப்பாத்திரமாக இருந்தாலும் அவர் அதனை தனக்கே உரித்தான முறையில் மாற்றி மக்களை சிரிக்க வைத்துவிடுவார். இந்நிலையில், இவர் JFW விருது வழங்கும் நிகழ்ச்சியில் பங்கேற்று தனது பழைய நினைவுகளை பகிர்ந்துள்ளார். அப்போது, தனது மகள் மாளவிகாவிற்கு இந்த ஆண்டு திருமணம் நடைபெற்ற நிலையில், வரும் டிசம்பர் மாதத்தில் மகன் காளிதாஸின் திருமணமும் நடைபெற உள்ளதாக கூறியிருந்தார்.

கிசுகிசு

37 வருடமாக சினிமா உலகில் இருக்கும் உங்களை பற்றி எங்கு தேடினாலும் ஒரு கிசுகிசுக்கூட கண்டுபிடிக்க முடியவில்லை. அது எப்படி என தொகுப்பாளர்கள் கேள்வி எழுப்பினர். இதைக் கேட்ட ஜெயராம் உடனடியாக, நடிகை அபிராமிக்கு பிளைன் கிஸ் அளித்துள்ளார். அபிராமியும் நானும் ஒன்றாக நடித்துள்ளோம். அதனால் அவருக்கு இந்த கிஸ். இதுதான் நீங்கள் கேட்ட கிசுகிசு என அவருடைய பாணியிலேயே பதிலளித்தார்.

கவுண்டமனியின் நினைவுகள்

முறைமாமன் படத்தில் கவுண்டமனி சார் டைமிங் டயலாக்குகளை எல்லாம் விவரிக்க இந்த மேடை போதாது. இன்றும் கூட இளைஞர்கள் அவர் கூறிய அண்ணன் அண்ணன் டயலாக்கை பயன்படுத்தி வருகின்றனர் என்றார்.

நடிகைக்காக வருந்திய ஜெயராம்

பின் நடிகை சரிதாவின் புகைப்படத்தை கண்ட அவர் மனம் வருந்தி பேசினார். நடிகை சரிதா அபாரமான நடிப்புத் திறமை கொண்டவர். ஜூலி கணபதி படப்பிடிப்பின் போது, நான் அவரிடம் உங்களுக்கு நிச்சயம் தேசிய விருது கிடைக்கும் என பலமுறை கூறியுள்ளேன். ஆனால், இன்றுவரை அவருக்கு ஒரு தேசிய விருதுகூட கிடைக்கவில்லை என்பது வருத்தமளிக்கிறது. அந்தப் படத்தை அவர்கள் தேசிய விருதுக்கு பரிந்துரைக்கவில்லை என்று பின்னர் தான் தெரிந்தது எனக் கூறி கவலைபட்டார்.

பஞ்சதந்திரம்

பின் பஞ்சதந்திரம் படத்தின் 2ம் பாகம் தயாராகுமா என தொகுப்பாளர் கேள்வி எழுப்பினார். அதற்கு பதிலளித்த ஜெயராம் பஞ்சதந்திரம் படத்தின் இரண்டாம் பாகம் என்றால் நினைவுக்கு வருவதம் கமல் சார் கூட அல்ல. கிரேஸி மோகன் தான். அவர் இப்போது உயிருடன் இல்லை. அதனால் பஞ்சதந்திரம் படத்தின் 2ம் பாகம் பேச்சையே விட்டுவிடலாம் எனக் கூறினார். அத்துடன் இந்தப் படத்தில் நீங்கள் பார்த்து சிரித்த வசனங்கள் பல இருந்தாலும், படத்தில் இல்லாத வசனங்களை எல்லாம் ஷூட்டிங் எடுக்கும் போது பேசி நாகேஷ் சார் அசத்தி இருப்பார். அவருக்கு எங்கிருந்து அதுபோன்ற எண்ணங்கள் வருகிறது என்றெல்லாம் தெரியவில்லை எனக் கூறி புகழ்ந்திருப்பார். இந்த வீடியோ தற்போது வைரலாகி வருகிறது.