NITI Aayog: ‘சுதந்திர இந்தியாவின் 100ஆம் ஆண்டு வளர்ச்சி இலக்கை அடைய மாநிலங்களின் பங்கு முக்கியம்’: பிரதமர் மோடி

NITI Aayog: பிரதமர் நரேந்திர மோடி தலைமையில் நிதி ஆயோக்கின் 9ஆவது ஆட்சிமன்றக்குழு கூட்டம் இன்று (ஜூலை 9) நடைபெற்றது. அப்போது பேசிய பிரதமர் நரேந்திர மோடி, விக்சித் பாரத் 2047ஆம் ஆண்டின் நோக்கத்தை அடைவதில் ஒவ்வொரு மாநிலமும் செயலில் பங்கு வகிக்க வேண்டும் என்று கூறினார்.

விக்சித் பாரத் 2047-ன் இலக்கு:

இதுதொடர்பாக நிதி ஆயோக் பக்கம் தொடர்பாக வெளியிடப்பட்ட பதிவில், "விக்சித் பாரத் 2047 இலக்கு(சுதந்திர இந்தியாவின் 100 ஆண்டுகால வளர்ச்சி) என்பது ஒவ்வொரு இந்தியரின் லட்சியமாகும். மக்களுடன் நேரடியாக இந்த இலக்கு இணைந்திருப்பதால் மாநிலங்கள் இந்த நோக்கத்தை நிறைவேற்றுவதில் முக்கியப்பங்கு வகிக்க முடியும்.

 நிதி ஆயோக்கின் 9ஆவது ஆட்சிமன்றக்குழு கூட்டத்தில் பிரதமர் நரேந்திர மோடி, முதல்வர்கள், துணைநிலை ஆளுநர்கள் கலந்து கொண்டனர்’’ எனத் தெரிவிக்கப்பட்டது. 

2047-ம் ஆண்டுக்குள் இந்தியாவை வளர்ந்த நாடாக மாற்றுவது குறித்து இந்த கூட்டத்தில் கவனம் செலுத்தப்பட்டது. மத்திய மற்றும் மாநில அரசுகளுக்கிடையே இருக்கும் பங்கேற்புகள் குறித்தும் மற்றும் ஒருங்கிணைப்பை வளர்ப்பது குறித்தும் விவாதிக்கப்பட்டது. மேலும், அரசாங்க தலையீடுகளின் விநியோக வழிமுறைகளை வலுப்படுத்துவதன் மூலம் கிராமப்புற மற்றும் நகர்ப்புற மக்களின் வாழ்க்கைத் தரத்தை மேம்படுத்துவதை இது நோக்கமாகக் கொண்டிருப்பதாகத் தெரிகிறது. 

புறக்கணித்த காங்கிரஸ் ஆளும் மாநில முதலமைச்சர்கள்:

காங்கிரஸ் ஆளும் மாநிலங்களின் முதலமைச்சர்களான கர்நாடகாவின் சித்தராமையா, இமாச்சலப் பிரதேசத்தின் சுக்விந்தர் சிங் சுகு மற்றும் தெலங்கானாவின் ரேவந்த் ரெட்டி ஆகியோர் நிதி ஆயோக் கூட்டத்தை புறக்கணித்தனர். இதைத்தொடர்ந்து தமிழ்நாடு முதலமைச்சர் ஸ்டாலின் மற்றும் பீகார் முதலமைச்சர் நிதிஷ் குமாரும் இக்கூட்டத்தைப் புறக்கணித்தார். மேற்கு வங்க முதலமைச்சர் மம்தா பானர்ஜிக்கு, பேச அனுமதி மறுக்கப்பட்டதாக வெளியேறினார். அடுத்துதான், பிரதமர் மோடியின் இந்த அறிக்கை வந்துள்ளது.

பிஜு ஜனதா தளம் (பிஜு ஜனதா தளம்) எம்.பி சஸ்மித் பத்ராவும் எதிர்க்கட்சிகளின் நிலைப்பாட்டை ஆதரித்தார். பட்ஜெட்டில் மாநிலங்களை மத்திய அரசு புறக்கணிப்பதாக குற்றம்சாட்டினார்.

நிதி ஆயோக்கின் உச்ச அமைப்பான இந்த கவுன்சிலில் அனைத்து மாநில முதல்வர்கள், யூனியன் பிரதேசங்களின் லெப்டினன்ட் கவர்னர்கள் மற்றும் பல மத்திய அமைச்சர்கள் உறுப்பினர்களாக உள்ளனர். பிரதமர் மோடி இதன் தலைவராக உள்ளார்.

முந்தைய ஆண்டு டிசம்பரில் நடைபெற்ற தலைமைச் செயலாளர்களின் 3-வது தேசிய மாநாட்டின் பரிந்துரைகள் குறித்தும் இந்தக் கூட்டத்தில் விவாதிக்கப்பட்டது.

மேலும், இந்த மாநாட்டின்போது, ஐந்து முக்கிய கருப்பொருள்கள் முன்னிலைப்படுத்தப்பட்டன: 

• குடிநீர் (அணுகல், அளவு மற்றும் தரத்தில் கவனம் செலுத்துதல்), 
• மின்சாரம் (தரம், செயல்திறன் மற்றும் நம்பகத்தன்மையை வலியுறுத்துதல்), 
• சுகாதாரம் (அணுகல், மலிவு மற்றும் பராமரிப்பு தரத்தில் கவனம் செலுத்துதல்), 
• பள்ளிக்கல்வி (அணுகல் மற்றும் தரத்தை நிவர்த்தி செய்தல்), 
• நிலம் மற்றும் சொத்து (அணுகல், டிஜிட்டல் மயமாக்கல், பதிவு மற்றும் பிறழ்வு ஆகியவற்றை உள்ளடக்கியது).

2047ஆம் ஆண்டில் இந்தியா 30 டிரில்லியன் அமெரிக்க டாலர் பொருளாதாரமாக மாறுவதற்கு வழிகாட்ட ஒரு பார்வை ஆவணம் உருவாக்கப்படுகிறது. இது அதன் சுதந்திர இந்தியாவின் 100வது ஆண்டு நிறைவைக் குறிக்கிறது.

2023ஆம் ஆண்டில், நிதி ஆயோக் பத்து துறை கருப்பொருள் பார்வைகளை, விக்சித் பாரத் @ 2047-க்கான ஒருங்கிணைந்த பார்வையாக இணைக்கும் பணியில் ஈடுபட்டது.

பொருளாதார வளர்ச்சி, சமூக முன்னேற்றம், சுற்றுச்சூழல் நிலைத்தன்மை மற்றும் நல்லாட்சி போன்ற வளர்ச்சியின் பல்வேறு அம்சங்களை இந்த பார்வை உள்ளடக்கி இருக்கிறது.