வன்முறை எங்க மொழி இல்ல..அசுரன் வைப்..விடுதலை 2 ட்ரெய்லர்! "தத்துவம் இல்லாத தலைவருங்க ரசிகர்கள தான் உருவாக்குவாங்க"

கடந்த ஆண்டு மார்ச் மாதம் வெளியாகி ரசிகர்கள் மத்தியில் அமோக வரவேற்பை பெற்று பாக்ஸ் ஆபிஸிலும் நல்ல வசூலை பெற்ற படம் விடுதலை. இயக்குநர் வெற்றிமாறன் - நடிகர் விஜய் சேதுபதி கூட்டணியில் வெளியாகி இருந்த இந்த படம் பிரபல எழுத்தாளர் ஜெயமோகனின் துணைவன் என்ற நாவலை அடிப்படையாக வைத்து உருவாகியிருந்தது.

இந்த படம் இரண்டாம் பாகத்துக்கான முன்னோட்டத்துடன் முடிவடைந்த நிலையில், படத்தின் இரண்டாம் பாகம் படப்பிடிப்பும் கடந்த ஆண்டே தொடங்கியது.

விடுதலை 2 ட்ரெய்லர்

இதைத்தொடர்ந்து ரசிகர்கள் மத்தியில் மிக பெரிய எதிர்பார்ப்பை ஏற்படுத்தியிருக்கும் விடுதலை 2 படத்தின் ட்ரெய்லர் தற்போது வெளியாகியுள்ளது. முதல் பாகத்தில் விஜய் சேதுபதி தோன்றிய பெருமாள் வாத்தியார் கதாபாத்திரத்தின் முன் கதையை சொல்லும் விதமாக விடுதலை 2 உருவாகியுள்ளது. அத்துடன் போலீசால் பெருமாள் வாத்தியார் கைது செய்யப்படுவதுபோல் முதல் பாகம் முடிவடைந்த நிலையில், இரண்டாம் பாகத்தில் அவர் போலீசிடமிருந்து தப்பித்தாரா இல்லையா என்பதை காட்டும் விதமாகமாக படம் அமைகிறது.

அனல் தெறிக்கும் வசனங்கள்

விடுதலை முதல் பாகத்தை போல், இந்த பாகமும் பீரியட் ஆக்‌ஷன் த்ரில்லர் பாணியில் உருவாகியுள்ளது. படத்தின் ட்ரெய்லரின் ஆரம்பத்தில் "வன்முறை எங்கள் மொழி கிடையாது, ஆனா அந்த மொழியும் எங்களுக்கு பேச தெரியும்", அதேபோல் ட்ரெய்லரின் முடிவில் "தத்துவம் இல்லாத தலைவர்கள்.. ரசிகர்கள் தான் உருவாக்குவார்கள் அது முன்னேற்றத்திற்கு வழி வகுக்காது" போன்ற அனல் பறக்கும் வசனங்கள் இடம்பிடித்திருக்கும்.

அதேபோல் அசுரன் படத்தின் இடம்பெற்ற அதிரடி காட்சிகளை போல் இந்த படத்திலும் சில தெறிக்கவிடும் ஆக்‌ஷன் காட்சிகளும் ட்ரெய்லரில் இடம்பிடித்துள்ளது.

விடுதலை 2 படத்தில் முதல் பாகத்தில் நடித்த சூரி, பவானிஸ்ரீ, கெளதம் மேனன், ராஜீவ் மேனன், இளவரசு, சேட்டன், மூணாறு ரமேஷ் உள்ளிட்ட பலரும் நடித்துள்ளார். முதல் பாக்தில் கதையின் நாயகனாக சூரி நடித்திருப்பார்.

இரண்டாவது பாகத்தில் விஜய் சேதுபதி கதாபாத்திரத்தை மையப்படுத்தி இருக்கும் கதையில், அவருக்கு ஜோடியாக மஞ்சு வாரியர் நடித்துள்ளார். ரசிகர்கள் மத்தியில் மிகவும் எதிர்பார்ப்பை ஏற்படுத்தியிருக்கும் இந்த படம் டிசம்பர் 20ஆம் தேதி உலகம் முழுவதும் திரைக்கு வருகிறது.

விடுதலை 2 பாடல்கள்

கடந்த 17ஆம் தேதி படத்திலிருந்து ’தினம் தினமும்’ என்ற பாடல் சிங்கிள் டிராக்காக வெளியாகியுள்ளது. இளையராஜா இசையமைத்து பாடியுள்ள இந்த பாடலை அவருடன் இணைந்து அனன்யா பட் பாடியுள்ளார். இதில் விஜய் சேதுபதி இளமை தோற்றத்திலும், மஞ்சு வாரியர் கிராப் முடியுடன் தோன்றியுள்ளனர். அத்துடன் இவர்கள் இருவருக்கும் இடையிலான ரெமான்ஸ் ரசிகர்களை வெகுவாக கவர்ந்துள்ளது.

முதல் பாகத்தில் இடம்பிடித்த காட்டு மல்லி பாடலை போல் இந்த பாடல் சிறப்பான மெலடியாக மனதில் ரீங்காரமீட்டிருக்கொண்டருப்பதாக ரசிகர்கள் பலரும் கருத்துகளை பகிர்ந்து வருகிறார்கள். விடுதலை 2 பாகத்தில் மொத்தம் 4 பாடல்கள் இடம்பிடித்துள்ளது.

இந்த படத்தின் இசை வெளியீடு யூடியூப்பில் நேரடியாக ஒளிபரப்பபட்டது. இந்த நிகழ்வில் விஜய் சேதுபதி, சூரி, பவானிஸ்ரீ, இயக்குநர் வெற்றிமாறன், இசைஞானி இளைராஜா உள்பட படக்குழுவினர்கள் பங்கேற்றனர்.