TVK Party: தளபதி விஜய் வரவில்லை..கோலாகலமாக நடைபெற்ற தவெக முதல் மாநில மாநாடு பந்தக்கால் நடும் விழா, பூமி பூஜை

தளபதி விஜய் தொடங்கியிருக்கும் தமிழக வெற்றி கழகத்தின் முதல் மாநாடு அக்டோபர் 27ஆம் தேதி விக்கிரவாண்டி வி சாலை பகுதியில் நடைபெற இருக்கிறது. இதற்கான ஏற்பாடுகளை கட்சி நிர்வாகிகள் இரவு, பகல் என சுழன்றவாறு செய்து வருகின்றனர். இதைடுத்து கட்சியின் முதல் மாநாடுக்கான பந்த நடும் விழா கோலாகலமாக நடைபெற்று முடிந்துள்ளது.

அதிகாலையில் நடந்த பந்தக்கால் விழா

தவெக என்று அழைக்கப்படும் தமிழக வெற்றி கழகம் கட்சியின் முதல் மாநாடுக்கான பந்தக்கால் நடும் விழா அதிகாலை 4.30 மணிக்கு பிரம்ம முகூர்த்த நேரத்தில் நடைபெற்றுள்ளது. கட்சியின் பொது செயலாளர் புஸ்ஸி ஆனந்த் பூஜைகளில் பங்கேற்று மாநாடுக்கான பந்த கால் நட்டு வைத்தார். அப்போது கட்சியின் நிர்வாகிகள் உற்சாகமாக முழக்கமிட்டனர். பந்தல் காலுக்கு மஞ்சள் சந்தனம், பட்டுத் துணி அணிவிக்கப்பட்டு சிறப்பு வழிபாடு நடைபெற்றது.

இந்த நிகழ்வில் கட்சியின் தலைவரான தளபதி விஜய் கலந்துகொள்ளவில்லை. இருப்பினும் கட்சி நிர்வாகிகள், தொண்டர்கள் என ஆயிரக்கணக்கானோர் இந்த அதிகாலை பூஜையில் பங்கேற்றனர்.

விறுவிறுப்பாக நடைபெறும் ஏற்பாடுகள்

தமிழ்நாடு முழுவதும் மாநாட்டுக்கான ஏற்பாடுகள் தீவிரமாக நடைபெற்று வருகிறது. அதன்படி கொடியேற்றும் நிகழ்வுகள், சுவர் விளம்பரம், போஸ்டர்கள் என தமிழக வெற்றிக் கழக நிர்வாகிகள் இரவு, பகல் என பம்பரமாக சுழன்று வருகின்றனர்.

மாநாட்டுக்கு பந்தல், நிர்வாகிகள் அமர்வதற்கு இடம், சமையல் கூடம், நுழைவாயில் என பல்வேறு பணிகள் நடைபெற இருக்கும் நிலையில் அவற்றை அமைப்பதற்கான பூமி பூஜையும் தொடங்கியது

விஜய் அறிவிப்பு

தமிழக வெற்றிக் கழக்கத்தின் முதல் மாநாடு குறித்த அறிப்பை கட்சி தலைவரும், நடிகருமான தளபதி விஜய் கடந்த செப்டம்பர் 20ஆம் தேதி அதிகாரப்பூர்வமாக அறிவித்தார்.

அதில், "தமிழக அரசியல் களத்தில் புதிய நம்பிக்கையை விதைக்ககூடிய நமது கழகத்தின் கொள்கை தலைவர்கள், கொள்கைகள் மற்றும் கொள்கை சார்ந்த செயல் திட்டங்களை பிரகடனப்படுத்தும் தமிழக வெற்றிக் கழகத்தின் முதல் மாநில மாநாடு வரும் அக்டோபர் மாதம் 27ஆம் தேதி மாலை 4 மணி அளவில் விழுப்புரம் மாவட்டம், விக்கிரவாண்டி அருகே உள்ள வி.சாலை கிராமத்தில் நடைபெற உள்ளது என்பதை பெரும் மகிழ்வுடன் தெரிவித்துக்கொள்கிறேன்.

நமது வெற்றிக் கொள்கை மாநாடு நம்மை வழிநடத்தப்போகும் கொள்கைகளையும் நாம் அடைய போகும் இலக்குகளையும் முழங்கும் அரசியல் திருவிழாவாகவும், பெருவிழாவாகவும் கொண்டாடப்படவுள்ளது" என தெரிவித்திருந்தார்.

அந்த வகையில் முதல் மாநாட்டில் விஜய்யின் முதல் அரசியல் பேச்சை கேட்க கட்சியினரை போல் பொதுமக்களும் ஆர்வமாக உள்ளார். விஜய் குறிப்பிட்டது போல் தமிழக வெற்றிக் கழகத்தின் கொள்கைகள், எதிர்கால திட்டங்கள் குறித்த அறிவிப்பு மாநாட்டில் வெளியிடப்படும் என தெரிகிறது.

தமிழக வெற்றிக் கழகம் கொடி

முன்னதாக, தமிழக வெற்றிக் கழகம் கட்சியின் கொடியை ஆகஸ்ட் 22ஆம் தேதி அறிமுகம் செய்தார் தளபதி விஜய். இந்த நிகழ்வில் கட்சியின் தலைமை அலுவலகத்தில் முதல் முறையாக கட்சி கொடியை ஏற்றினார். அத்துடன் பிளாக் ஆந்தம் என்ற பாடலும் வெளியிடப்பட்டது.