Actress Sukumari: பழம்பெரும் நடிகை சுகுமாரியின் நினைவு நாள் - பூவெல்லாம் உன் வாசம் செல்லாவின் பாட்டியை மறக்க முடியுமா?

Legendary actress Sukumari: பழம்பெரும் நடிகை சுகுமாரி, தமிழ், மலையாளம், தெலுங்கு, கன்னடம், சிங்களம், ஒடியா, ஆங்கிலம் ஆகியப் பல்வேறு இந்திய மொழிகளில் துணைக் கதாபாத்திரங்களில் நடித்து மறைந்தவர். இவரைப் பற்றி அறிந்துகொள்ளவும் நினைவுகூரவும் ஏராளமான விஷயங்கள் உள்ளன. வாருங்கள் பார்ப்போம்.

யார் இந்த நடிகை சுகுமாரி? அன்றைய திருவாங்கூர் சமஸ்தானத்தின் (தற்போது தமிழ்நாடு), நாகர்கோவிலில் வங்கி மேலாளர் மாதவன் நாயர், சத்ய பாமா தம்பதியினருக்கு, 1940ஆம் ஆண்டு அக்டோபர் 6ஆம் தேதி, மகளாகப் பிறந்தார். சுகுமாரி அம்மா பூஜப்புரா எல்.பி. பள்ளியில் இரண்டாம் வகுப்பு வரை படித்தார். அதன்பின், அவர்களது குடும்பம் சென்னைக்குப் புலம் பெயர்ந்தது. 

சுகுமாரி அம்மாவுக்கு, ராஜகுமாரி, ஸ்ரீகுமாரி, ஜெயஸ்ரீ மற்றும் கிரிஜா ஆகிய நான்கு சகோதரிகளும், சங்கர் என்கிற ஒரு சகோதரரும் உடன்பிறந்தவர்கள் ஆவார். மேலும் சுகுமாரி, திருவாங்கூர் சகோதரிகள் எனப்படும் லலிதா, நடிகை பத்மினி, ராகிணி ஆகிய மூவரின் உறவினர் ஆவார்.

நடிகை சுகுமாரி, பாசமலர், பாலும் பழமும், பாவ மன்னிப்பு ஆகியத் திரைப்படங்களை இயக்கிய தமிழ் மற்றும் இந்தியில் பிரபலமான திரைப்பட இயக்குநராக இருந்த பீம்சிங்கின் இரண்டாவது மனைவி ஆவார்.

இந்த தம்பதியினருக்கு சுரேஷ் என்னும் மகன் இருந்தார். மிகக் குறைவான படங்களிலேயே இவர் நடித்து இருந்தார். மருத்துவரான சுரேஷ், உமா என்னும் ஆடை வடிவமைப்பாளரை மணந்தார். சுரேஷ் மற்றும் உமா தம்பதியினருக்கு விக்னேஷ் என்ற மகன் உள்ளார்.

நடிப்பு வாழ்க்கை: தமிழ் சினிமாவில் நீண்டநாட்களாக நிலைத்து நின்ற நடிகைகள் பலர், குணச்சித்திர வேடங்களில் நடித்தவர்கள் ஆவர். அப்படி,மலையாளத்தில் நிலைத்து நின்ற நடிகையாக இருந்தவர், சுகுமாரி. தனது உறவினரான நடிகை பத்மினி நடிக்கும் ஒரு சினிமாவின் படப்பிடிப்புத் தளத்துக்குச் சென்றபோது, அங்கு ஓர் நபரால் கவனிக்கப்பட்டு, ‘ஓர் இரவு’ என்னும் படத்தில் 10 வயது இருக்கும்போது நடிக்க வைக்கப்பட்டார்.

பின், அவர் பரதநாட்டியம், கதகளி, கேரள நடனம் போன்ற பல்வேறு நடன வடிவங்களில் தேர்ச்சி பெற்றார். சிறுவயதில் இருந்தே இந்தியா மற்றும் வெளிநாடுகளில் நடனம் ஆடியிருக்கிறார்.

இவர், மலைக்கள்ளன், மதுரை வீரன், மணமகன் தேவை, புதையல், மாயமனிதன், வீரபாண்டிய கட்டபொம்மன் போன்ற படங்களில் நடனம் ஆடுபவராகவும், சிறுசிறு வேடங்களிலும் நடித்து இருந்தார். குஷ்பூவின் முதல் தமிழ்ப் படமான வருஷம் பதினாறு படத்தில் பார்வதி என்னும் கதபாத்திரத்திலும், அரங்கேற்றவேளை திரைப்படத்தில் ஆஷாவின் அம்மாவாகவும், புத்தம் புது பயணம் திரைப்படத்தில் செல்வியின் பாட்டியாகவும் நடித்து இருந்தார்.

பின் விஜய் நடித்த பூவே உனக்காக திரைப்படத்தில், ஸ்டீபனின் மனைவியாகவும், ரட்சகன் திரைப்படத்தில் சோனியாவின் பாட்டி கதாபாத்திரத்திலும் நடித்திருந்தார், நடிகை சுகுமாரி.

பின், அலைபாயுதே திரைப்படத்தில் சக்தியின் அத்தையாகவும், அஜித் நடித்த பூவெல்லாம் உன் வாசமும் திரைப்படத்தில் செல்லாவின் பாட்டியாக நடித்திருந்தார். அதேபோல், 2009ஆம் ஆண்டு விஜய் நடித்த வேட்டைக்காரன் திரைப்படத்தில், சுசீலாவின் பாட்டியாகவும், மகிழ்ச்சி திரைப்படத்தில் ஆச்சியாகவும் நடித்து இருந்தார். தவிர, 2014ஆம் ஆண்டு,நடிகை சுகுமாரி அம்மா நடித்த ‘நம்ம கிராமம்’ என்னும் திரைப்படத்தில், சிறந்த குணச்சித்திர நடிகைக்கான தேசிய விருதைப் பெற்றார். தவிர, மலையாளத்தில் எக்கச்சக்க படங்களில் நடித்து, அந்த ஊரின் நடிகை மனோரமா என்று புகழப்பட்டவர். 

அத்தகைய சுகுமாரி அம்மா, சென்னையில் உள்ள மருத்துவமனையில் 2013ஆம் ஆண்டு, மார்ச் 26ஆம் தேதியில் மாரடைப்பால் உயிரிழந்தார். முன்னதாக, 2013ஆம் ஆண்டு, தனது வீட்டில் விளக்கினை ஏற்ற முயற்சிக்கும்போது ஏற்பட்ட தீக்காயத்தில் சுகுமாரி அம்மா, சிகிச்சை பெற்று வந்தார் என்பது குறிப்பிடத்தக்கது. இவரது மறைவின்போது, முன்னாள் முதலமைச்சர்களான ஜெயலலிதா மற்றும் உம்மன்சாண்டி ஆகியோர் இரங்கல் தெரிவித்தனர் என்பது குறிப்பிடத்தக்கது.