எனக்கு 25 உனக்கு 100.. அடித்து ஆடப்போகும் வெற்றிக் கூட்டணி.. சுதா கொங்கரா செய்யப் போகும் சம்பவம்..

ராஜ்குமார் பெரியசாமி இயக்கத்தில் நடிகர் சிவகார்த்திகேயன் நடித்த திரைப்படம் அமரன். தீபாவளி பண்டிகையை ஒட்டி வெளிவந்த இந்தத் திரைப்படம் மறைந்த ராணுவ வீரரின் வாழ்க்கை வரலாற்றை மையமாக வைத்து எடுக்கப்பட்ட திரைப்படம். இது விமர்சன ரீதியாகவும் வசூல் ரீதியாகவும் வெற்றி பெற்று சிவகார்த்திகேயனுக்கு பெரிய ஆக்ஷன் ஹீரோ அந்தஸ்தை மக்களிடம் பெற்றுக் கொடுத்தது. இதையடுத்து சினிமாவில் இவரது மார்க்கெட்டும் உயரத்திற்கு சென்றது.

சுதா கொங்கராவுடன் கைகோர்த்த எஸ்கே

அமரன் படத்தின் வெற்றியை அடுத்து சிவகார்த்திகேயன் ஏ.ஆர். முருகதாஸ் இயக்கத்தில் உருவாகிவரும் படத்தில் நடித்து வந்தார், இந்நிலையில், நடிகர் சிவகார்த்திகேயன் சுதா கொங்கராவின் இயக்கத்தில் புறநானூறு எனும் படத்தில் நடிக்க கமிட் ஆகி உள்ளதாக தகவல் வெளியானது. இந்தப் படத்தில் முதலில் சூர்யா நடிக்க இருந்தததாகவும் அவர் படத்தில் இருந்து விலகியதால் இந்தப் படத்தில் நடிக்க சிவகார்த்திகேயன் கமிட் ஆனதாகவும் தகவல் வெளியானது.

எஸ்கே 25 படப்பிடிப்பு தொடக்கம்

மேலும், சிவகார்த்திகேயனுடன் இந்தப் படத்தில் ஜெயம் ரவி, அதர்வா முரளி நடிப்பதாகவும், தெலுங்கு நடிகை ஸ்ரீலீலா கதாநாயகியாக நடிக்க ஒப்பந்தமாகியுள்ளதாகவும் அறிவிப்பு வெளியானது.

டான் பிக்சர்ஸ் தயாரிப்பில் உருவாகும் இந்தத் திரைப்படம் சிவகார்த்திகேயனின் 25 திரைப்படம் என்பது குறிப்பிடத்தக்கது. இந்தப் படத்தின் முதல்கட்ட படப்பிடிப்பு இன்று தொடங்கியுள்ளதாக படக்குழு அதிகாரப்பூர்வ அறிவிப்பை வெளியிட்டுள்ளது.

ஜி.வி.பிரகாஷின் 100வது படம்

அந்த அறிவிப்பின் படி, சிவகார்த்திகேயன் நடிப்பில் வெளியாக உள்ள இந்த படத்திற்கு ஜி.வி.பிரகாஷ் இசையமைக்க உள்ளது தெரிகிறது. இது ஜி.வி.பிரகாஷ் இசையமைக்கும் 100வது படம் என்பது குறிப்பிடத்தக்கது. இந்தத் தகவலை ஜி.வி.பிரகாஷ் அவரது சோசியல் மீடியா பக்கத்தில் தெரிவித்துள்ளார்.

ஜி.வி பிரகாஷ் முன்னதாக இயக்குநர் சுதா கொங்கராவுடன் சூரரைப் போற்று படத்தில் இணைந்து பணிபுரிந்துள்ளார். அத்துடன் சிவகார்த்திகேயனின் அமரன் படத்திற்கும் இசையமைத்துள்ளார்.

நன்றி தெரிவிக்க காத்திருக்கும் ஜி.வி

இருவரின் வெற்றி படத்திலும் இசையமைத்துள்ள ஜி.வி.பிரகாஷிற்கு வாழ்த்து தெரிவித்த சுதா கொங்கரா, உன்னுடைய 100வது படத்தில் இணைந்து பணியாற்ற ஆவலாக உள்ளது எனக் கூறியிருந்தார். அதற்கு பதிலளித்த ஜி.வி. பிரகாஷும் 100வது படம் மிகவும் அற்புதமாக இருக்கும். எனக்கு கிடைத்த முதல் தேசிய விருது உங்கள் படத்தின் மூலம் தான், அதற்கான நன்றியை இந்தப் படத்தில் வெளிப்படுத்துவேன் எனக் கூறியிருந்தார்.

அறிவிப்பை வெளியிட்ட தயாரிப்பு நிறுவனம்

இந்நிலையில், படத்தின் நடிகர்கள் மற்றும் கலைஞர்களின் அறிவிப்பை தயாரிப்பு நிறுவனமான டான் பிக்சர்ஸ் வெளியிட்டுள்ளது. புறநானூறு திரைப்படம் டான் பிக்சர்ஸ் தயாரிப்பில் உருவாகும் 2வது திரைப்படமாகும். இந்த நிறுவனம் தனுஷ் இயக்கி நடிக்கும் இட்லிகடை படம் இவர்களது தயாரிப்பில் உருவாகி வரும் முதல் திரைப்படமாகும்.

பொறுப்புத் துறப்பு:

இந்தக் கட்டுரையில் உள்ள எந்தவொரு தகவல், பொருள் அல்லது நம்பகத்தன்மைக்கு எந்த விதமான உத்தரவாதமும் இல்லை. இதில் குறிப்பிடப்பட்டுள்ள தகவல்கள் அனைத்தும் பல்வேறு ஊடகங்களில் இருந்து சேகரித்து, உங்களுக்குத் தரப்பட்டுள்ளது. எங்கள் நோக்கம் தகவல்களை வழங்குவது மட்டுமே. இதிலிருந்து வெறும் தகவல்களை மட்டுமே பயனாளர்கள் எடுத்துக்கொள்ள வேண்டும். மற்றபடி இதிலிருந்து பயன்படுத்திக்கொள்வது பயனாளரின் பொறுப்பாகும்.