Maha Nadigai: இது அதுல்ல... அட்டை காப்பி அடிக்கும் டிவி... அடேங்கப்பா இவ்ளோ பெரிய லிஸ்டா? நெட்டிசன்கள் கிண்டல்

பரபரப்புக்கும் விறுவிறுப்புக்கும் பஞ்சமில்லாமல், ரசிகர்களின் ஒட்டுமொத்த கவனத்தையும் ஈர்க்கும் விதமாகவும் புதுப்புது நிகழ்ச்சிகளை அறிமுகம் செய்து வருவதால் தான் விஜய் டிவியின் டிஆர்பி ரேட்டிங் இன்றளவும் குறையாமல் இருக்கிறது.

இதற்காக அவர்கள் எடுத்துக் கொள்ளும் சிரத்தையும் அதிகம் தான். இருப்பினும், விஜய் டிவியின் பெரும்பாலான நிகழ்ச்சிகள் கூட ஆங்கில மற்றும் ஹிந்தியில் வெளியான நிகழ்ச்சிகளின் அடிப்படையில் கொண்டுவரப்பட்டவை தான். இருப்பினும், அவை தமிழ் ரசிகர்களுக்கு புதிய அனுபவத்தையே தருவதால் தான் இன்றளவும் தனக்கான தனி ரசிகர் பட்டாளத்துடன் விஜய் டிவி இன்றளவும் வெற்றி நடை போடுகிறது.

இது அதுல்ல

ஆனால், விஜய் டிவியைப் போன்றே தேசிய ஊடகமான ஜி டிவி தமிழ் மொழியில் ஒளிபரப்பாகத் தொடங்கியது. இது ரசிகர்களைக் கவர விஜய் டிவியில் ஒளிபரப்பாகும் நிகழ்ச்சிகளைப் போன்றே பல நிகழ்ச்சிகளை தயாரித்தது. அதமட்டுமின்றி, விஜய் டிவியின் ரசிகர்களையும் தன் வசம் இழுக்க பல வேலைகளையும் செய்தது.

உதாரணமாக, விஜய் டிவியில் மிகவும் பிரபலமான ரியாலிட்டி ஷோக்கள் என்றால் அவை, நீயா நானா, சூப்பர் சிங்கர், ஜோடி ஆர் யு ரெடிபோன்றவை. அவற்றை அப்படியே அட்டை காப்பி அடித்து ஜி தமிழில் நிகழ்ச்சிகள் தயாரிக்கப்பட்டது. நீயா நானாவை காப்பி அடித்து தமிழா தமிழா, சூப்பர் சிங்கரை காப்பி அடித்து சரிகமப, ஜோடி ஆர் யு ரெடியை காப்பி அடித்து டேன்ஸ் ஜோடி டேன்ஸ் என பல நிகழ்ச்சிகளை வழங்கி வந்தது.

மீண்டும் மீண்டுமா?

இந்த நிலையில், மகா நடிகை என புதிய ரியாலிட்டி ஷோவை அறிமுகம் செய்துள்ளது ஜி தமிழ் தொலைக்காட்சி. நடிகர், இசையமைப்பாளர், பாடகர் என பல திறன்களுடன் தமிழ் சினிமாவில் வலம் வரும் விஜய் ஆண்டனி இந்த நிகழ்ச்சியை தொகுத்து வழங்க உள்ளார். அதற்கான ப்ரமோவை ஜி தமிழ் வெளியிட்டுள்ளது.

வரும் அக்டோபர் 5ம் தேதி முதல் ஒளிபரப்பப்படும் இந்த நிகழ்ச்சி விஜய் டிவியில் இயக்குநர் கே.எஸ்.ரவிக்குமார்- நடிகை ராதிகா இணைந்து நடத்தி வந்த கதாநாயகி நிகழ்ச்சியின் அட்டைக் காப்பி என பலரும் விமர்சித்து வருகின்றனர்.

மகா நடிகை என்ன சொல்கிறது

உன் வாழ்க்கையில் நீ எதை அடைய நினைத்தாலும், உன் மீது நீ அசைக்க முடியாத நம்பிக்கையை வைத்திருக்கும் பொழுது அது நடக்கும். அது நடந்தே தீரும் என்பதில் எனக்கு சிறிதளவிலும் சந்தேகமில்லை. உன் எண்ணம் எவ்வளவு தூரமோ உன் வாழ்க்கையும் அவ்வளவு தூரமே. எனவே எப்பொழுதும் மனதை உறுதியாக வைத்திரு என்ற வசனத்துடன் விஜய் ஆண்டனி என்ட்ரி தருகிறார்.

பின் உங்கள் காத்திருப்பு இத்துடன் முடிந்தது எனக் கூறி நிகழ்ச்சிக்கான கருவை மக்களுக்கு வெளிப்படுத்துகிறார்.

உங்கள் கனவுகள் எல்லாம் நிஜமாய் மாற. உங்கள் எதிர்காலம் நட்சத்திரமாய் ஜொலித்திட மகா நடிகைகளைத் தேடி உங்களோடு எனது பயணம் என வெற்றியாளர்களின் இருக்கையை குறிக்கிறார்.

இந்த நிகழ்ச்சி வரும் அக்டோபர் மாதம் 5ம் தேதி முதல் சனி மற்றும் ஞாயிற்று கிழமைகளில் இரவு 8.30 மணிக்கு ஒளிபரப்பாகும் எனவும் அறிவித்துள்ளார்.

பிக்பாஸிற்கு போட்டியா?

விஜய் டிவி ரசிகர்களால் பெரிதும் எதிர்பார்க்கப்பட்ட பிக்பாஸ் 8வது சீசன் அக்டோபர் 6ம் தேதி தொடங்க உள்ள நிலையில், அதற்கு ஒரு நாள் முன்னதாக மகா நடிகை நிகழ்ச்சி தொடங்கும் என அறிவிக்கப்பட்டுள்ளது. அத்துடன்,பிக்பாஸ் நிகழ்ச்சியை விஜய் சேதுபதி தொகுத்து வழங்க உள்ள நிலையில், மகா நடிகை நிகழ்ச்சியை விஜய் ஆண்டனி தொகுத்து வழங்குகிறார். இருவருமே புதிய நிகழ்ச்சியில் தொகுப்பாளரா களமிறங்கி உள்ளதால் இந்த நிகழ்ச்சிகளுக்கான எதிர்பார்ப்பு அதிகளவில் இருக்க வாய்ப்புள்ளது.