தொடர் மரணம்.. கலைஞர்களை காவு வாங்கியதா இந்தியன் 2! எல்லை மீறும் நெட்டிசன்கள்.. கவலையில் படக்குழு

நடிகர் கமல்ஹாசன்- இயக்குநர் ஷங்கர் கூட்டணியில் உருவாகி பெரும் எதிர்பார்ப்புடன் வெளியான இந்தியன் 2 படம் போதிய வரவேற்பை பெறவில்லை. மேலும், இந்தப் படத்தின் மீது பல விமர்சனங்கள் எழுந்த நிலையில், தற்போது இந்தியன் 2 படத்தை வேறு விதமாக மிகவும் மோசமாக சித்தரித்து வருகின்றனர் நெட்டிசன்கள்.

தாக்கத்தை ஏற்படுத்திய இந்தியன்

நாட்டில் நடக்கும் ஊழலுக்கு எதிராக கமல் ஹாசன், இந்தியனாக கொடுத்த குரல் தமிழக மக்களிடம் மாபெரும் தாக்கத்தை ஏற்படுத்தியது. இந்த தாக்கம் இன்றளவும் மக்கள் மனதில் நல்ல எண்ணங்களைக் கொண்டிருப்பதை உணர்ந்த, கமல் ஹாசனும், அப்படத்தின் இயக்குநர் ஷங்கரும் இந்தியன் படத்தின் அடுத்தடுத்த பாகத்தை எடுக்க தயாராகினர்.

இதனால், பிரம்மாண்ட இயக்குநர் இந்தியன் 2 படத்தில் என்ன சொல்ல வருகிறார் என்பதைக் காண மக்கள் ஆர்வமாக இருந்த நிலையில், படத்தின் படப்பிடிப்பு மிகவும் பொறுமையாக நடந்து வந்தது. இரண்டாம் பாகத்துடன் சேர்த்து 3ம் பாகமும் எடுக்க இயக்குநர் ஷங்கர் திட்டமிட்டதால் இந்த கால தாமதம் என பேச்சுவார்த்தைகள் அடிபட்டது.

படப்பிடிப்பு விபத்தில் 3 பேர் பலி

இந்நிலையில், கடந்த 2020ம் ஆண்டு பிப்ரவரி 19ம் தேதி சென்னை பூந்தமல்லி அருகே செயல்பட்டு வரும் ஈவிபி பிலிம்சிட்டியில் நடைபெற்ற படப்பிடிப்பில், கிரேன் விழுந்து விபத்து ஏற்பட்டது. இரவு நேரத்தில் நிகழ்ந்த இந்த விபத்தில் 3 பேர் உயிரிழந்தனர். 10க்கும் மேற்பட்டோர் படுகாயம் அடைந்தனர். இதுகுறித்து தகவலறிந்த நசரத்பேட்டை காவல் நிலைய போலீஸார் வழக்குப் பதிந்து விசாரணை நடத்தினர். இதையடுத்து, படப்பிடிப்புக்கு செட் போட்டவர்கள், கிரேனை வாடகைக்கு விட்ட உரிமையாளர், கிரேன் ஆபரேட்டர் ஆகியோரிடம் விசாரணை நடத்தப்பட்டது.

உயிர் பலி

மேலும், வழக்கு சென்னை மத்திய குற்றப்பிரிவு போலீஸாருக்கு மாற்றப்பட்டு, படத்தின் இயக்குநர் ஷங்கர், நடிகர் கமல் ஹாசன் உள்ளிட்டோரையும் விசாரணைக்கு அழைத்தனர். இதன் காரணமாகவும் படப்பிடிப்பு மிகவும் தாமதமானது. இதனால், படம் வெளியாகும் முன்னரே உயிர் பலி வாங்கி விட்டதாக பலரும் கருத்து தெரிவித்தனர்.

நடிகர்களின் தொடர் மரணம்

அதைத் தொடர்ந்து, இந்தப் படத்தில் நடித்த நகைச்சுவை நடிகர் விவேக், கொரோனா தடுப்பூசி செலுத்துமாறு விளம்பரம் செய்துவந்த நிலையில், உயிரிழந்தார்.

தொடர்ந்து, இந்தப் படத்தில் நடித்த இயக்குநரும் நடிகருமான மாரிமுத்து, மனோபாலா, நெடுமுடி வேணு ஆகியோர் அடுத்தடுத்து இறந்து போயினர். அந்த சமயத்தில் இந்தியன் 2 படம் விமர்சிக்கப்பட்டாலும், தற்போது இந்தியன் 2 படத்தில் நடித்த டெல்லி கணேஷும் வயது மூப்பின் காரணமாக உயிரிழந்துள்ளார்.

காவு வாங்கிய படம்

இந்நிலையில், மறைந்த திரைப்பிரபலங்கள் அனைவரும் இந்தியன் 2 படத்தில் தான் கடைசியாக நடித்தனர். இந்தப் படம் பார்க்க வந்த ரசிகர்களை மட்டுமல்ல, படத்தில் வேலை பார்த்த கலைஞர்களையும், சிறந்த நடிகர்களையும் காவு வாங்கி விட்டதாக கொந்தளித்து வருகின்றனர்.

ஒரு படம் பிடிக்கவில்லை என்றால் அந்தப் படத்தின் கதையை விமர்சிப்பது என்பது வேறு. ஆனால், இயற்கையாக எதிர்பாராமல் நிகழும் மரணங்களுக்கு ஒரு படத்தை தொடர்பு படுத்தி பேசுவது என்பது அவ்வளவு நல்ல விஷயமல்ல.

கவலையில் படக்குழு

குறைந்தபட்சம் 200 பேரின் உழைப்பை சுமந்து வரும் ஒரு திரைப்படத்தை சில வார்த்தைகளால் தரம் தாழந்து பேசி விமர்சித்து அத்தனை பேரின் உழைப்பையும் கேள்வி கேட்பது மிகவும் அநாகரீகமான ஒன்று. இதை இனியாவது நெட்டிசன்கள் புரிந்து கொள்ள வேண்டும்.

ஏற்கனவே, இந்தியன் 2 படத்தை மிகவும் கடுமையாக விமர்சித்ததால் இந்தியன் 3 படத்தின் வெளியீட்டில் பெரும் சிக்கல் உருவாகி, அது நேரடியாக ஓடிடியில் வெளியிட திட்டமிடப்பட்டுள்ளது. இந்நிலையில், மேலும் மேலும் ஒரு படத்தை விமர்சிப்பது அந்தப் படத்தை சுமந்து நிற்கும் சிலரது எதிர்காலத்தையே கேள்விக் குறியாக்குவது போல உள்ளது. இதை இனியும் தொடர்நது செய்யாமல் இருப்பது நல்லது.