Lubber Pandhu: இது அர்ஜென்டுக்கு பண்ண கதை.. அந்த 20 நிமிஷம் தான்.. உண்மையை உடைத்த டைரக்டர்!

இந்திய இளைஞர்களால் அதிகம் விரும்பப்படும் விளையாட்டு என்றால் அது கிரிக்கெட் தான். தன் சிறுவயது முதலே வயது வித்யாசமின்றி அனைவருடனும் கிரிக்கெட் விளையாடி அனுபவம் அவர்களுக்கு இருக்கும். இதனாலேயே, இளைஞர்களுக்கு கிரிக்கெட் தொடர்பான படம் என்றால் அதில், தங்களது சிறு வயது நினைவுகள் ஏதேனும் நிச்சயம் இருக்கும் என்ற நம்பிக்கையில் படத்தை பார்க்க துடிப்பர்.

 அதுமட்டுமின்றி, படத்தை பார்த்துவிட்டு வந்த பிறகும் அந்தப் படத்தில் வந்த காட்சிகளை நண்பர்களுடன் மனம் விட்டு விவாதிப்பர். இதன் காரணமாகவே, பெரும்பாலான கிரிக்கெட் திரைப்படங்கள் வெற்றி பெறும்.

அப்படி இருக்க, தமிழ்நாட்டில் அதுவும் ஊரில் கிரிக்கெட் விளையாடும் இளைஞர்கள் குறித்து எடுக்கப்பட்ட படம் என்றால் சொல்லவா வேண்டும். இளைஞர்களின் உணர்வுகளை தீவிரமாகவும் மிக எதார்த்தமாகவும் கூறிய திரைப்படங்களில் ஒன்றாக அமைந்துள்ளது அறிமுக இயக்குநகர் தமிழரசனின் லப்பர் பந்து. அதிலும் கிரிக்கெட் மீது ஆர்வம் கொண்ட திருமணமான ஆண்களின் நிலை எப்படி இருக்கும் என்பதையும் லப்பர் பந்து படம் காட்டியுள்ளது. 

இந்த நிலையில், இப்படத்தின் இயக்குநர் தனியார் யூடியூப் சேனல் ஒன்றிற்கு, லப்பர் பந்து திரைப்படத்தின் கதை எப்படி உருவானது என்பது குறித்து பேசி இருக்கிறார்.

முதல் படம் அவ்வளவு சாதாரணமானது அல்ல

அதில், ஒரு முழு படத்தை திரைக்கு கொண்டு வருவது அவ்வளவு சாதாரணமானது அல்ல. நீங்கள் எழுத்தாளராக இருந்தது இந்தப் படத்தை முடிக்க உங்களுக்கு உதவியதா, இந்தப் படத்தின் கதையை தயார் செய்ய எத்தனை வருடம் ஆனது என கேள்வி கேட்கப்பட்டது.

இதற்கு பதிலளித்த இயக்குநர் தமிழரசன், இது அர்ஜெண்டுக்காக செய்த திரைப்படம். இதில் மறைக்க ஒன்றும் இல்லை. நான் வேறொரு திரைப்படத்திற்கான கதையை தான் தயார் செய்தேன். ஆனால் அந்தப் படத்தை என்னால் எடுக்க முடியவில்லை. அந்தப் படம் என்னுடைய முதல் படமாக இருக்க வேண்டும் என நினைத்தேன். ஆனால், அதற்கான பட்ஜெட் அமையவில்லை. முதல் படத்தை இயக்க இங்கு இயக்குநர்களுக்கு பல ரெஸ்ட்ரிக்ஸன்ஸ் இருக்கு. இவ்வளவு தான் படத்தை எடுக்க வேண்டும் என்ற நிபந்தனைகள் உள்ளதால் என்னால் அந்தப் படத்தை எடுக்க முடியவில்லை.

அவசரத்துக்கு செய்த படம்

அந்த சமயத்தில், பலரும் என்கிட்ட சின்னதா எதாவது படம் பண்ணுங்கன்னு சொல்லிட்டு இருந்தாங்க. அதுனால் அப்போ அவசரத்துக்காக பண்ணுன படம் தான் லப்பர் பந்து. ஆனா அந்தக் கதையை நான் ப்ரோடியூசர் கிட்ட சொல்ல போகவே இல்ல. ப்ரோடியூசர் எனக்கு மண்சார்ந்த கதை வேணும்ன்னு கேட்டாரு. அதுனால நான் லப்பர் பந்து கதையை சொன்னேன். அப்போகூட அந்தக் கதை என்கிட்ட முழுசா இல்ல. வெறும் 20 நிமிஷ கதைதான் இருந்தது. ஆனா, ப்ரோடியூசர் அதுல இருக்க ஸ்பார்க்க புரிஞ்சிக்கிட்டு எனக்கு வாய்ப்பு குடுத்தாரு. அதுவரைக்கும் எனக்கு லப்பர் பந்து தான் எனக்கு முதல் படமாக இருக்கும்னு தோனல.

வேற கதையை தேடி போயிருப்பேன்

அந்த ப்ரோடியூசர் இல்ல எனக்கு கதை பிடிக்கலன்னு சொன்னா, நான் டைரக்டர் ஆக இன்னும் லேட் ஆகிருக்கும். நான் வேற வேற கதையை தேடி போயிருப்பேன். ஆனா, அவருக்கு கதை பிடிச்சு போனதால லப்பர் பந்து என்னோட முதல் படமா வெளிய வந்துருக்குன்னு கூறினார்.

நடிகர்கள் அட்டகத்தி தினேஷ்- ஹரிஷ் கல்யாண் இணைந்து நடித்துள்ள லப்பர் பந்து திரைப்படம் கிராமங்களில் விளையாடும் கிரிக்கெட்டை மையப்படுத்தி, ஒரு மாண்டேஜ் படமாக அமைந்துள்ளதால், பலருக்கும் இந்தப் படம் மனதோடு ஒத்துப்போயுள்ளது. இதனால், தமிழ்நாடு முழுவதும் இந்தப் படத்திற்கு நல்ல வரவேற்பு கிடைத்துள்ளது குறிப்படித்தக்கது.