Tamil Movies Releases: பெரிய ஹீரோக்கள் கிடையாது..ஆறு சிறு பட்ஜெட் படங்கள்! எதிர்பார்ப்பை ஏற்படுத்திய நந்தன்,லப்பர் பந்து

இதைத்தொடர்ந்து இந்த வாரம் 6 புதிய படங்கள் தமிழில் வெளியாக இருக்கின்றன. வெள்ளிக்கிழமையான நாளை வெளியாக இருக்கும் தமிழ் படங்களை எவையெல்லாம் என்பதை பார்க்கலாம்

நந்தன்

கத்துக்குட்டி, உடன்பிறப்பே ஆகிய படங்களை இயக்கிய சரவணன் இயக்கியிருக்கும் படம் நந்தன். சசிகுமார், ஸ்ருதி பெரியசாமி, பாலாஜி சக்திவேல், சமுத்திரகனி உள்ளிட்ட பலர் நடித்துள்ளனர். தலித் ஊராட்சி மன்ற தலைவர்கள் பதவியில் இருந்தும் மரியாதை கிடைக்காமல் அவமானப்படுத்தப்படுவதை பற்றிய உண்மை சம்பவத்தை அடிப்படையாகக் கொண்டு இப்படம் எடுக்கப்பட்டுள்ளதாக கூறப்படுகிறது. இந்த படத்தின் ட்ரெய்லர்களும் ரசிகர்களை கவர்ந்திருப்பதுடன், எதிர்பார்ப்பையும் ஏற்படுத்தியுள்ளது.

லப்பர் பந்து

அட்டகத்தி தினேஷ், ஹரிஷ் கல்யாண் உள்ளிட்டோர் நடித்துள்ள படம் லப்பர் பந்து. கிராமத்து பின்னணியில் கிரிக்கெட் தொடர்பான ஈகோ பிரச்னையை மையப்படுத்திய கதையாக இருக்கும் இந்த படத்தை தமிழரசன் பச்சமுத்து இயக்கியுள்ளார். இதில், மாமனார், மருமகனுக்குள் கிரிக்கெட் போட்டியில் உள்ள ஈகோ பற்றி கூறியிருப்பதாக தெரிகிறது. அத்துடன் காதல், சாதிய ஏற்றத்தாழ்வு எப்படி விளையாட்டில் ஊடுருவியுள்ளதையும் படத்தில் சொல்லப்பட்டுள்ளது.

அட்டகத்தி தினேஷ் மாமனாராகவும், ஹரீஷ் கல்யாண் அவரது மகள் காதலிப்பவராகவும் நடித்துள்ளனர். படத்தின் ட்ரெய்லர் ரசிகர்களை கவர்ந்த நிலையில், ரசிகர்கள் மத்தியில் எதிர்பார்ப்பை ஏற்படுத்தியுள்ளது.

கோழிப்பண்ணை செல்லதுரை

சீனு ராமசாமி இயக்கத்தில் அறிமுக நடிகர் ஏகன், யோகி பாபு உள்ளிட்டோர் நடித்துள்ள படம் கோழிப்பண்ணை செல்லதுரை. அண்ணன், தங்கை பாசத்தை மையப்படுத்தி இந்த படம் உருவாகியுள்ளது. சீனு ராமசாமியின் வழக்கமான மனித உணர்வுகளை பேசும் படமாக இந்த படம் இருக்கும் என்று ரசிகர்களால் எதிர்பார்க்கப்படுகிறது.

கடைசி உலகப் போர்

ஹிப் ஹாப் தமிழா எழுதி இயக்கி நடித்துள்ள படம் கடைசி உலகப் போர். இந்த படத்தை தனது சொந்த நிறுவனத்தின் மூலம் தயாரித்துள்ளார். இதில் நாசர், நட்டி நட்ராஜ், அனகா, அழகம் பெருமாள், ஹரிஷ் உத்தமன், முனிஷ்காந்த், சிங்கம்புலி, கல்யாண் மாஸ்டர், இளங்கோ குமரவேல், தலைவாசல் விஜய், மகாநதி சங்கர், இளங்கோ குமணன் உள்பட பலர் நடித்துள்ளனர்.

தோழர் சேகுவேரா

சத்யராஜ் நடித்த தோழர் சேகுவேரா திரைப்படத்தை அலெக்ட் ஏ.டி. இயக்கியுள்ளார். படத்தில் மொட்ட ராஜேந்திரன், கூல் சுரேஷ், நாஞ்சில் சம்பத் முக்கிய கதாபாத்திரங்களில் நடித்துள்ளனர். ரிசர்வேஷன், பெரியாரிசம், கம்யூனிசம் என பல்வேறு விஷயங்களை பேசும் விதமாக படத்தின் கதை அமைந்துள்ளது. இந்த படத்தின் சில புரொமோ காட்சிகள் சமூக வலைத்தளங்களில் வைரலாகியுள்ளன. எனவே படம் மீது எதிர்பார்ப்பு ஏற்பட்டுள்ளது.

தோனிமா

காளி வெங்கட், ரோஷினி பிரகாஷ் பிரதான கதாபாத்திரத்தில் நடித்திருக்கும் படம் தோனிமா. குடிகார தந்தை காதுகேளாத மகனைப் புறக்கணிக்கிறார். ஆனால் மகனை காப்பாற்ற தாய் வீட்டுப் பணிப்பெண்ணாக வேலை செய்கிறார். மகனின் அறுவை சிகிச்சைக்கு பணம் சேர்க்க அவர் படும் கஷ்டங்களை சொல்லும் விதமாக தோனிமா படம் அமைந்துள்ளது.

இந்த வாரத்தில் ஆறு படங்கள் வெளியானாலும் பெரிய நடிகர்கள் படம் ஏதும் வெளிவரவில்லை.