Sathyaraj Vs Rajini:எதிரும் புதிரும் இணைந்து உருவாகும் கூலி.. நீண்ட ஆண்டுகளுக்குப்பின் ரஜினி படத்தில் நடிக்கும் சத்யராஜ்

Sathyaraj Vs Rajini: நடிகர் ரஜினிகாந்த் நடிக்கும் 171ஆவது படமான ‘கூலி’திரைப்படத்தில் நடிகர் சத்யராஜ் நடிப்பதை உறுதி செய்துள்ளார். 

இயக்குநர் லோகேஷ் கனகராஜ் இயக்கத்தில், அனிருத் இசையமைத்து, சன் பிக்சர்ஸ் தயாரிக்கும் திரைப்படத்தில் ரஜினிகாந்த் ஹீரோவாக நடிக்கயிருக்கிறார். இப்படம் ரஜினிகாந்தின் திரை வரிசையில் 171ஆவது படமாக வருகிறது. இப்படத்தில் சண்டைக் காட்சிகளை அன்பறிவ் செய்வதாக அறிவிக்கப்பட்டது.

கூலி திரைப்படத்தில் ரஜினியை வேறுவிதமாக காட்டிய லோகேஷ் கனகராஜ்:

படக்குழு, ரஜினிகாந்தின் 171ஆவது படம் குறித்த போஸ்டரை மார்ச் 28ஆம் தேதி வெளியிட்டது. அதில் ரஜினிகாந்தின் 171ஆவது படத்தின் டைட்டிலை, ஏப்ரல் 22ஆம் தேதி வெளியிடுவதாக படக்குழு அறிவித்து இருந்தது. அப்போது வெளியிடப்பட்ட படத்தில் நடிகர் ரஜினிகாந்த் கோல்டு கைக்கடிகாரங்களை, விலங்குபோல் மாட்டி, கூலிங் கிளாஸ் அணிந்து சிரித்த முகத்துடன் இருக்கிறார். அந்த ஸ்டில் ரசிகர்கள் பலரை ஈர்த்தது.

மேலும் படத்தில் கடிகாரத்துக்கு முக்கியப் பங்கு இருப்பதை சொல்லாமல் சொன்னது. அதன்பின் தயாரிப்பு நிறுவனமான சன் பிக்சர்ஸ் நிறுவனம், சொன்னதேதியில் வெளியிட்ட டீஸரில், அப்படத்தின் பெயர் ‘கூலி’ என அதிகாரப்பூர்வமாக வெளியிடப்பட்டது.

கூலி திரைப்பட டீஸர் வசனம்: 

மேலும், ரஜினிகாந்த், ‘கூலி’ திரைப்படத்தின் டீஸரில், தனது 'ரங்கா’ படத்தில் பேசிய பழைய வசனத்தைப் பேசியுள்ளார். அதாவது,‘’அப்பாவும் தாத்தாவும் வந்தார்கள், தப்பென்ன சரியென்ன எப்போதும் விளையாடு;

அடப்பாவி என்பார்கள், தப்பாக நினைக்காதே;

எப்பாதை போனாலும் இன்பத்தை தள்ளாதே;

சோறு உண்டு;

சுகம் உண்டு;

மது உண்டு;

மாது உண்டு;

மனம் உண்டு என்றாலே சொர்க்கத்தில் இடம் உண்டு போடா’’ என்னும் பட வசனத்தை மாஸாகப் பேசியுள்ளார். இந்த வசனம் கண்ணதாசனால் எழுதப்பட்டது என்பது குறிப்பிடத்தக்கது. இதனால் படம் குறித்த எதிர்பார்ப்பு எகிறத் தொடங்கியது. இதற்கிடையே படத்தில் தனது இசையைப் பயன்படுத்தியதாக, இளையராஜா தயாரிப்பு நிறுவனமான சன் பிக்சர்ஸிடம் காப்புரிமை கேட்டு நோட்டீஸ் அனுப்பினார். இதனால் இடையில் இப்படம் குறித்த செய்திகள் வந்த வண்ணம் இருந்தன. 

இந்நிலையில் சென்னையில் ’’மழை பிடிக்காத மனிதன்’' படத்தின் டீசர் வெளியீட்டு விழா இன்று நடைபெற்றது. அதில் படக்குழுவினர் கலந்துகொண்டனர். குறிப்பாக படத்தில் நடித்த விஜய் ஆண்டனி மற்றும் சத்யராஜ் ஆகியோர் கலந்துகொண்டனர். அப்போது செய்தியாளர்கள்  எழுப்பிய கேள்விகளுக்குப் பதிலளித்த சத்யராஜ், ‘’ கூலி திரைப்படத்தில் ரஜினி சாருடன் இணைந்து நடிக்கிறேன். மேலும் பிரதமர் மோடியின் சுயவரலாற்றுப் படத்தில் தான் நடிக்கவில்லை. அப்படி எடுக்கவேண்டும் என நினைத்தால் பா.ரஞ்சித், வெற்றிமாறன், மாரி செல்வராஜ் இயக்கியிருந்தால் நன்றாக இருக்கும். எனது நண்பர் மறைந்த மணிவண்ணன் எடுத்திருந்தால் அப்படியே இருந்திருக்கும்’’ எனப் பேசினார். இதன்மூலம், நடிகர் சத்யராஜ், நடிகர் ரஜினியின் கூலி படத்தில் இருப்பது உறுதிசெய்யப்பட்டுள்ளது. முன்னதாக, மிஸ்டர் பாரத் என்னும் படத்தில் சத்யராஜ், ரஜினியின் அப்பாவாக நடித்திருப்பார் என்பது குறிப்பிடத்தக்கது. 

மேலும் இந்த திரைப்படத்தில் ரஜினிகாந்துடன் ராகவா லாரன்ஸும், சிவகார்த்திகேயனும் இணைந்து நடிக்கவுள்ளதாகத் தகவல்கள் தெரிவிக்கின்றன.

நல்ல வசூலைத் தருமா கூலி திரைப்படம்:

சமீபத்தில் ரஜினிகாந்த் நெல்சன் திலீப் குமார் இயக்கத்தில் வெளியாகியுள்ள திரைப்படம், ஜெயிலர். இப்படம் ரூ.650 கோடி வசூலித்து சாதனைப் படைத்தது. அதேபோல், லோகேஷ் கனகராஜ் கடைசியாக இயக்கிய லியோ திரைப்படம் ரூ.612 கோடி வசூலும், நடிகர் கமல்ஹாசனை வைத்து இயக்கிய ‘விக்ரம்’படம் ரூ.500 கோடி வசூலையும் எட்டியது. இந்நிலையில் கூலி படத்திலும் வசூல் எதிர்பார்ப்பு எகிறத் தொடங்கியுள்ளது. 

லோகேஷ் சினிமாட்டிக் யுனிவர்ஸில் வருமா கூலி திரைப்படம்?:

இந்நிலையில் லியோ படத்தின் கிளைமேக்ஸ் காட்சியில், நடிகர் விஜய்க்கு போன் செய்து, நடிகர் கமல்ஹாசன் பேசுவதுபோல் காட்சிகள் இடம்பெற்று, லோகேஷ் கனகராஜ் சினிமாட்டிக் யுனிவர்ஸில் அப்படம் வந்தது. இந்நிலையில், தலைவர் 171 படமும் ரஜினிகாந்தின் படமாக வருமா, அல்லது லோகேஷ் கனகராஜின் சினிமாட்டிக் யுனிவர்ஸில் வருமா எனவும் ரசிகர்களிடையே எதிர்பார்ப்பு அதிகரிக்கத் தொடங்கியுள்ளது.

’’விக்ரம்’’ பட டைட்டில் டீஸரில் ஆரம்பிக்கலாங்களா என வசனத்தினை வைத்த லோகேஷ் கனகராஜ், லியோ பட டைட்டில் டீஸரில் ’’ப்ளடி ஸ்வீட்’’ என்றார். இந்நிலையில் கூலி திரைப்படத்தில், முடிச்சுடலாமா என ரஜினியை வசனம் பேசவைத்துள்ளார்.

முன்னதாக, ரஜினிகாந்த் நடிக்கும் 170ஆவது படமான வேட்டையன் படம் முடியும் தருவாயில் உள்ளதாகக் கூறப்படுகிறது. இப்படத்தை டி.ஜே.ஞானவேல் இயக்கி வருகிறார் என்பது குறிப்பிடத்தக்கது.