நடிகர் மோகன் பாபுவின் முன்ஜாமீன் மனு ரத்து.. சுற்றி வளைத்த போலீஸார்.. அடுத்தடுத்து திருப்பம்.. என்ன நடக்கிறது?

தெலுங்கு பத்திரிகையாளர்களை தாக்கிய வழக்கில் நடிகர் மோகன் பாபுவின் முன் ஜாமீன் மனு நிராகரிக்கப்பட்டதை அடுத்து தலைமறைவானதாகத் தகவல் வெளியாகியிருக்கிறது.

தெலுங்கு நடிகர் மோகன் பாபு தற்போது ஹைதராபாத்தில் வசித்து வருகிறார். மோகன் பாபுவுக்கு தற்போது 72 வயது ஆகிறது. இவர் தெலுங்கு, தமிழ் உள்பட பல மொழிப்படங்களில் நடித்துள்ளார். தமிழில் நடிகர் சூர்யா நடிப்பில் வெளியான சூரரைப்போற்று திரைப்படத்தில் இந்திய வான் படை உயர் அதிகாரியாக நடித்திருப்பார்.

உயர் ரத்த அழுத்தம் காரணமாக மருத்துவமனையில் அனுமதிக்கப்பட்டிருந்த நடிகர் மோகன் பாபு கடந்த டிசம்பர் 12ஆம் தேதி டிஸ்சார்ஜ் செய்யப்பட்டு, ஹைதராபாத்தில் உள்ள ஜல்பல்லி இல்லத்துக்கு வந்துள்ளார். அவரது வாக்குமூலத்தைப் பெற டிசம்பர் 13ஆம் தேதியான நேற்று போலீசார் விரைந்தனர். அதன்பின், நடிகர் மோகன் பாபு அங்கு இல்லை எனக்கூறப்படுகிறது. மேலும் அவரை தொடர்பு கொள்ளமுடியவில்லை என்றும் கூறப்படுகிறது. இதனால் தலைமறைவாகியுள்ள நடிகர் மோகன் பாபு எப்போது வேண்டுமானாலும் கைதுசெய்யப்படலாம் என்ற நிலை உருவாகியுள்ளது. அதனைத்தொடர்ந்து நடிகர் மோகன் பாபுவை பிடிக்க 5 தனிப்படைகள் அமைக்கப்பட்டு தேடுதல் வேட்டையை போலீஸார் முடுக்கிவிட்டுள்ளனர்.

சொத்து பிரச்னை:

முன்னதாக, நடிகர் மோகன் பாபுவுக்கும், அவரது இளைய மகன் மஞ்சு மனோஜுக்கும் இடையே சொத்து பிரச்னை ஏற்பட்டுள்ளது. இதுபற்றி செய்தி சேகரிக்க சென்ற பத்திரிகையாளர்களின் மைக்கை பிடுங்கி நடிகர் மோகன் பாபு விரட்டி விரட்டி அடித்த சம்பவம் பெரும் பரபரப்பை ஏற்படுத்தி உள்ளது.

மோகன் பாபுவுக்கு 2 மகன்கள், ஒரு மகள் உள்ளனர். இந்நிலையில் தான் இளைய மகன் மஞ்சு மனோஜ் மற்றும் நடிகர் மோகன் பாபு இடையே சொத்து பிரச்னை ஏற்பட்டுள்ளது. நடிகர் மோகன் பாபு, அவருடைய மகன் மஞ்சு மனோஜ் ஆகியோரிடையே சொத்து, பாதுகாப்பு, குடும்ப கவுரவம் ஆகியவை தொடர்பாக பெரும் பிரச்னை ஏற்பட்டு இரண்டு பேரும் மாறி மாறி காவல் நிலையத்தில் புகார் அளித்து வருகின்றனர்.

புகார் மீது விசாரணை:

மோகன் பாபு தனது புகாரில் கூறியதாவது, ”மனோஜ் சில சமூக விரோதிகளுடன் சேர்ந்து ஞாயிற்றுக்கிழமை(டிச.8ஆம் தேதி) தெலங்கானா மாநிலம், ரெங்காரெட்டி மாவட்டத்தில் ஹைதராபாத் அருகே ஜல்பல்லியில் உள்ள தனது வீட்டுக்கு வந்து தொந்தரவு செய்தார். எனக்கும், எனது சொத்துக்களுக்கும் பாதுகாப்பின்மை ஏற்பட்டுள்ளதாக நான் அஞ்சுகிறேன். மேலும் அவர்கள் எனக்கும், என் வீட்டில் இருப்பவர்களின் உயிருக்கும் அச்சுறுத்தலை ஏற்படுத்துகிறார்கள்” என்று மோகன் பாபு தெரிவித்துள்ளார்.

அந்த புகார் மீது தற்போது விசாரணை நடைபெறுகிறது. கடந்த சில நாட்களாக நடைபெற்று வரும் இந்த விவகாரம் தொடர்பாக விரிவான தகவல்கள் வெளியாகவில்லை. எனவே இது பற்றி செய்தி சேகரிப்பதற்காக செய்தியாளர்கள் ஹைதராபாத்தில் உள்ள மோகன் பாபு வீட்டிற்கு சென்றனர். மூத்த நடிகர், அரசியல்வாதி, திரைப்பட தயாரிப்பாளர் ஆகிய பன்முகத்தன்மை கொண்ட மோகன் பாபுவும், அவருடைய பாதுகாவலர்களும் செய்தி சேகரிக்க சென்ற செய்தியாளர்களை கொடூரமாக தாக்கி வன்முறையில் ஈடுபட்டனர். மேலும் செய்தியாளர்கள் வைத்திருந்த மைக்கை பிடுங்கி அந்த மைக் மூலம் செய்தியாளர்களை மோகன் பாபு தாக்கிய செய்தி வைரல் ஆனது.

மோகன் பாபு மருத்துவமனையில் அனுமதி

இதற்கிடையே நடிகர் மோகன் பாபுவின் செயலுக்கு பத்திரிகையாளர்கள் கடும் கண்டனம் தெரிவித்துள்ளனர். மோகன் பாபு தனது செயலுக்கு பத்திரிகையாளர்களிடம் மன்னிப்பு கோர வேண்டும் என்று பத்திரிகையாளர்கள் வீட்டு முன்பு கோஷமிட்டனர்.

அதனைத்தொடர்ந்து நடிகர் மோகன் பாபு டிசம்பர் 12ஆம் தேதி அறிக்கை வாயிலாக மன்னிப்புக்கேட்டார்.

இருப்பினும், இதுதொடர்பாக அவர் மீது 118 பிஎன்எஸ் பிரிவின் கீழ் வழக்குப்பதிவு செய்யப்பட்டுள்ளது.

பொறுப்புத் துறப்பு:

இந்தக் கட்டுரையில் உள்ள எந்தவொரு தகவல்/பொருள்/அல்லது நம்பகத்தன்மைக்கு எந்த விதமான உத்தரவாதமும் இல்லை. இதில் குறிப்பிடப்பட்டுள்ள தகவல்கள் அனைத்தும் பல்வேறு ஊடகங்களில் இருந்து சேகரித்து, உங்களுக்குத் தரப்பட்டுள்ளது. எங்கள் நோக்கம் தகவல்களை வழங்குவது மட்டுமே. இதிலிருந்து வெறும் தகவல்களை மட்டுமே பயனாளர்கள் எடுத்துக்கொள்ள வேண்டும். மற்றபடி இதிலிருந்து பயன்படுத்திக்கொள்வது பயனாளரின் பொறுப்பாகும்.