எல்லாம் பொய்..முன் ஜாமின் கூட வேண்டாம்..நான் வாழும் தியாகி! பாலியல் வழக்கு விசாரணையில் ஜெயசூர்யா விளக்கம்

கடந்த ஆகஸ்ட் மாதம் ஹேமா கமிஷன் அறிக்கை வெளியான நிலையில், மலையாள சினிமாவில் பெண்கள், நடிகைகளுக்கு எதிராக நிகழ்ந்த பாலியல் அத்துமீறல்கள் வெளிச்சத்துக்கு வந்தன. இந்த விவகாரம் பெரும் பரபரப்பை ஏற்படுத்தியதோடு நாடு முழுவதும் பேசுபொருள் ஆனது.

இதையடுத்து மலையாள நடிகர்களான ஜெயசூர்யா மற்றும் மணியன்பிள்ளை ராஜு ஆகியோர் மீது நடிகை ஒருவர் பாலியல் புகார் அளித்ததை அடுத்து அவர்கள் மீது கேரளாவில் தனித்தனியாக வழக்குகள் பதிவு செய்யப்பட்டிருந்தது.

சிறப்பு விசாரணை குழு முன் ஜெய்சூர்யா விளக்கம்

இந்த வழக்கின் விசாரணை திருவனந்தபுரத்தில் உள்ள கன்டோன்மென்ட் காவல் நிலையத்தில் நடைபெற்றது. சிறப்பு விசாரணைக் குழுவின் முன்பு ஆஜரான நடிகர் ஜெய்சூர்யா, தன் மீதான பாலியல் வழக்கு குறித்த கேள்விகளுக்கு பதிலளித்தார். ஜாமினில் வெளிவர முடியாத பிரிவில் வழக்குப் பதியப்பட்டுள்ளதால், நடிகர் ஜெயசூர்யாவுக்கு பெரும் சிக்கல் ஏற்பட்டுள்ளது.

முன் ஜாமின் தேவையில்லை

என் மீதான குற்றச்சாட்டுகள் அனைத்தையும் நான் மறுக்கிறேன். என் மீதான பாலியல் புகார் முற்றிலும் புனையப்பட்டது. எனக்கு முன்ஜாமின் கூட தேவையில்லை.

என் மீதான குற்றச்சாட்டுகள் பொய் என்று நிரூபிக்கும் வரை நான் தொடர்ந்து சட்ட ரீதியாக போராடுவேன். நான் வாழும் தியாகி என்பதை நம்புகிறேன்.

பொய் வழக்குகள் குடும்பங்களை சீர்குலைத்து விடும்

யார் மீது வேண்டுமானாலும் பொய் வழக்கு போடலாம் என்பது ஆபத்தானது. குறைந்தபட்சம் என் வழக்கை எதிர்கொள்ள எனக்கு ஒரு தளம் உள்ளது. பலருக்கு அப்படி எதுவும் இல்லை. இப்படியான பொய் வழக்குகள் பலரது குடும்பத்தையும் சீர்குலைத்து விடுகிறது

ஜெய்சூர்யா மீது புகார்

படப்பிடிப்பின் போது கழிவறை சென்று திரும்பியபோது தன்னிடம் பாலியல் துன்புறுத்தலில் நடிகர் ஜெயசூர்யா ஈடுபட்டதாக அளித்ததாக சிறப்பு விசாரணை குழுவிடம் நடிகை ஒருவர் புகார் அளித்தார். இந்த புகாரை தொடர்ந்து அவரிடம் பெண் போலீசார் விசாரணை நடத்தியுள்ளனர். இதன் அடிப்படையில் 354, 354ஏ, 359 ஆகிர மூன்று பிரிவுகளில் ஜெயசூர்யா மீது வழக்கு பதிவு செய்யப்பட்டிருந்தது.

நீதிபதி ஹேமா கமிட்டி அறிக்கை

கேரளாவில் மிகப்பெரிய அதிர்வலைகளை ஏற்படுத்தி உள்ளது நீதிபதி ஹேமா குழுவின் அறிக்கை. திரையுலகில் பெண்கள் துன்புறுத்தப்படுவது மற்றும் சுரண்டப்படுவது குறித்த பல நிகழ்வுகளை சுட்டிக்காட்டியது.

மலையாள திரையுலகில் பெண்கள் எதிர்கொள்ளும் பிரச்னைகளை ஆய்வு செய்து, 2019 ஆம் ஆண்டில் அரசாங்கத்தால் நியமிக்கப்பட்ட குழுவான நீதிபதி ஹேமா குழுவினர் அறிக்கையை சமர்பித்தனர். மிகவும் எதிர்பார்க்கப்பட்ட அறிக்கையான இது, அரசாங்கத்தாலும், மலையாள திரையுலகினரின் முக்கிய புள்ளிகளாலும் முடக்கி வைக்கப்பட்டதாக கூறப்பட்டது.

இதையடுத்து தற்போது தகவல் அறியும் உரிமை சட்டத்தின் கீழ் ஹேமா கமிட்டி அறிக்கை குறித்த விவரங்கள் வெளியிடப்பட்டது. கடந்த 19ஆம் தேதி அறிக்கை வெளியான நிலையில், அனைத்து தரப்பினரையும் அதிர்ச்சிக்குள்ளாக்கியுள்ளது.

குவியும் பாலியல் அத்துமீறல் புகார்கள்

2017ஆம் ஆண்டு நடிகை துன்புறுத்தல் வழக்குக்கு பிறகு கேரள அரசால் அமைக்கப்பட்ட நீதிபதி ஹேமா கமிட்டி, அதன் அறிக்கையில் மலையாள சினிமா துறையில் பெண்கள் துன்புறுத்தல் மற்றும் சுரண்டல் சம்பவங்களை வெளிப்படுத்தியது.

பல நடிகர்கள் மற்றும் இயக்குநர்கள் மீது பாலியல் துன்புறுத்தல் மற்றும் சுரண்டல் குற்றச்சாட்டுகள் எழுந்துள்ள நிலையில், அவர்களை விசாரிக்க ஏழு பேர் கொண்ட சிறப்பு புலனாய்வுக் குழுவை அமைப்பதாக மாநில அரசு ஆகஸ்ட் 25ஆம் தேதி தெரிவித்தது. இதைத்தொடர்ந்து நடிகைகளுக்கு எதிராக நடந்த பாலியல் அத்துமீறல்கள் குறித்து தொடர்ந்து புகார்கள் வந்து கொண்டிருக்கின்றன.