PM Modi: ‘ஓபிசிகளுக்கு துரோகம்! முஸ்லீம்களுக்கு இட ஒதுக்கீடு தர காங்கிரஸ் திட்டமிடுகிறது’ பீகாரில் பிரதமர் மோடி ஆவேசம்!

கர்நாடகாவை போல் முஸ்லீம்களுக்கு ஓபிசி பிரிவில் இட ஒதுக்கீடு தர காங்கிரஸ் திட்டமிடுவதாக பிரதமர் நரேந்திர மோடி குற்றம்சாட்டி உள்ளார். 

பீகார் மாநிலம் அராரியாவில் நடந்த பேரணியில் உரையாற்றிய பிரதமர் மோடி, பீகாரில் ராஷ்ட்ரீய ஜனதா தளம் மற்றும் காங்கிரஸ் கூட்டணிக்கு இந்திய அரசியலமைப்பு குறித்தோ, ஜனநாயகம் குறித்தோ அக்கறை இல்லை. பல தசாப்தங்களாக மக்கள் தங்கள் வாக்களிக்கும் உரிமையைப் பயன்படுத்த அவர்கள் அனுமதிக்கவில்லை. வாக்குச்சாவடிகளை கைப்பற்றுவது என்பது மிகவும் சாதாரணமானது... அவர்கள் மக்களை வாக்களிக்க வெளியே கூட செல்ல விடவில்லை.

ஆனால் "இப்போது ஏழை மற்றும் நேர்மையான வாக்காளர்களுக்கு மின்னணு வாக்குப்பதிவு இயந்திரத்தின் வலிமை இருக்கும்போது, காங்கிரஸ் கூட்டணியின் ஈ.வி.எம் இயந்திரத்தை அகற்ற தங்களால் முடிந்த அனைத்தையும் முயற்சிக்கிறார்கள். பழைய வாக்குச் சீட்டு முறை மீண்டும் வராது என்று இன்று உச்ச நீதிமன்றம் வலுவான தீர்ப்பை வழங்கியுள்ளது.

கர்நாடகாவைப் போலவே, பீகாரிலும் முஸ்லிம்களையும் ஓபிசி இடஒதுக்கீட்டின் கீழ் கொண்டு வர காங்கிரஸ் விரும்புகிறது என்று பிரதமர் மோடி கூறினார்.

"எஸ்சி, எஸ்டி மற்றும் ஓபிசி உரிமைகளை பறிக்க காங்கிரஸ் ஆழமாக சதி செய்துள்ளது, இதை நான் மிகுந்த பொறுப்புடன் சொல்கிறேன். பாபாசாகேப் பீம்ராவ் அம்பேத்கர் மிகத் தெளிவான வார்த்தைகளில், இந்தியாவில் மத அடிப்படையிலான இடஒதுக்கீடு இருக்க முடியாது என்று கூறி உள்ளார்.

கர்நாடகாவில் இதர பிற்படுத்தப்பட்ட வகுப்பினருக்கான 27 சதவீத ஒதுக்கீட்டில் பெரும்பகுதி முஸ்லிம்களுக்கே கிடைக்கிறது என்று பிரதமர் மோடி கூறினார்.

ஆனால், மத அடிப்படையிலான இடஒதுக்கீட்டை அமல்படுத்த காங்கிரஸ் தன்னால் இயன்ற முயற்சிகளை மேற்கொண்டு வருகிறது. கர்நாடக மாதிரியிலான இடஒதுக்கீட்டை நாட்டில் அமல்படுத்த முயற்சிக்கிறது... அவர்கள் ஓபிசி சமூகத்திற்கு துரோகம் செய்து, கர்நாடகாவின் அனைத்து முஸ்லிம்களையும் அவர்களின் நிதி நிலையைப் பொருட்படுத்தாமல் ஓபிசி பட்டியலில் சேர்த்துள்ளனர். இதர பிற்படுத்தப்பட்டோருக்கான 27% இடஒதுக்கீட்டில் பெரும்பகுதி இப்போது முஸ்லிம்களுக்குச் சென்றுள்ளது. பீகார் மற்றும் நாட்டின் பிற பகுதிகளிலும் இதைச் செய்ய காங்கிரஸ் விரும்புகிறது" என்று அவர் மேலும் கூறினார்.

மின்னணு வாக்குப்பதிவு இயந்திரங்களைப் பயன்படுத்தி பதிவான வாக்குகளை வாக்காளர் விவி பாட் இயந்திரங்கள் மூலம் சரிபார்க்கக் கோரிய பல மனுக்களை உச்ச நீதிமன்றம் இன்று நிராகரித்தது.

மனுக்களை நிராகரித்த பெஞ்ச், "ஜனநாயகம் என்பது அனைத்து நிறுவனங்களுக்கும் இடையில் நல்லிணக்கத்தையும் நம்பிக்கையையும் உருவாக்க முயற்சிப்பதாகும்" என்று கூறியது குறிப்பிடத்தக்கது.

நாடாளுமன்றத் தேர்தல் 2024:

543 மக்களவைத் தொகுதிகளுக்கான தேர்தல் ஏப்ரல் 19 ஆம் தேதி தொடங்கி ஜூன் 1 ஆம் தேதி வரை ஏழு கட்டங்களாக நடைபெற்று வருகிறது. வாக்கு எண்ணிக்கை ஜூன் 4-ம் தேதி நடைபெறும். முதல் கட்ட தேர்தல் ஏப்ரல் 19ஆம் தேதி தமிழ்நாடு உள்ளிட்ட 21 மாநிலங்களில் உள்ள 102 தொகுதிகளில் நடந்து முடிந்து உள்ளது.

இரண்டாம் கட்ட தேர்தல் ஏப்ரல் 26ஆம் தேதியான இன்று நடந்து வருகிறது. மூன்றாம் கட்ட தேர்தல் மே 7ம் தேதியும், நான்காம் கட்ட தேர்தல் மே 13ம் தேதியும், 5-ம் கட்ட தேர்தல் மே 20-ம் தேதியும், 6-ம் கட்ட தேர்தல் மே 25-ம் தேதியும், கடைசி மற்றும் 7-ம் கட்ட தேர்தல் ஜூன் 1ம் தேதியும் நடைபெற உள்ளது.