Lok Sabha elections: ’மோடிக்கு முதல் வெற்றி! சூரத் தொகுதியை அன்னப்போஸ்ட்டாக வென்ற பாஜக!’ சொதப்பிய காங்கிரஸ்!

இதுகுறித்து குஜராத் முதல்வர் வெளியிட்டுள்ள அறிக்கையில், "சூரத் மக்களவைத் தொகுதி வேட்பாளர் முகேஷ் தலால் போட்டியின்றி தேர்ந்தெடுக்கப்பட்டதற்கு மனமார்ந்த வாழ்த்துக்கள் என கூறி உள்ளார். 

சூரத் மக்களவைத் தொகுதிக்கான காங்கிரஸ் வேட்பாளர் நிலேஷ் கும்பானியின் வேட்பு மனுக்கள் ஞாயிற்றுக்கிழமை நிராகரிக்கப்பட்டன. இதேபோல், சூரத்தில் இருந்து மாற்று காங்கிரஸ் வேட்பாளரான சுரேஷ் பட்சலாவின் வேட்பு மனுவும் இதே போன்று நிராகரிக்கப்பட்டது. 

இது தொடர்பாக தேர்தல் நடத்து அதிகாரி சவுரப் பர்தி கூறுகையில், முன்மொழிந்தவர்களின் கையொப்பங்களில் முரண்பாடுகள் இருப்பதை முதற்கட்ட ஆய்வில் வெளிப்படுத்திய பின்னர் வேட்புமனு நிராகரிக்கப்பட்டது என கூறினார். 

தேர்தல் வேட்புமனு விதிகளின்படி, அங்கீகரிக்கப்பட்ட அரசியல் கட்சியால் அங்கீகரிக்கப்பட்ட ஒரு வேட்பாளர் தனது வேட்புமனுவை முன்மொழிய தொகுதியில் இருந்து ஒரு வாக்காளர் தேவை. எவ்வாறாயினும், வேட்பாளர் சுயேச்சையாக அல்லது அங்கீகரிக்கப்படாத அரசியல் கட்சியால் பரிந்துரைக்கப்பட்டால், தொகுதியிலிருந்து பத்து வாக்காளர்கள் முன்மொழிபவர்களாக வேட்பு மனுவில் கையொப்பமிட வேண்டும்.

இந்த விவகாரத்தில் உயர்நீதிமன்றத்தில் வழக்கு தொடர உள்ளதாக காங்கிரஸ் கூறி உள்ளது. காங்கிரஸ் வேட்பாளரின் வேட்புமனு நிராகரிக்கப்பட்டு பாஜக வேட்பாளர் போட்டியின்றி வெற்றி பெற்றவராக அறிவிக்கப்பட்டது காங்கிரஸ் கட்சிக்கு பெரும்பின்னடைவாக பார்க்கப்படுகிறது. 

வேட்புமனு வாபஸ் பெறுவதற்கான இறுதி நாளான திங்கள்கிழமை, பகுஜன் சமாஜ் கட்சியைச் சேர்ந்த பியாரிலால் பாரதியுடன் சேர்த்து மொத்தம் 8 வேட்பாளர்கள் தங்கள் வேட்புமனுக்களை வாபஸ் பெற்றுள்ளனர். 

"பிரதமர் நரேந்திர மோடிக்கு சூரத் முதல் தாமரையை வழங்கியது!!" என மாநில பாஜக தலைவர் சி.ஆர்.பாட்டீல் தலாலுக்கு வாழ்த்து தெரிவித்து உள்ளார். 

2024 பொதுத் தேர்தலின் மூன்றாம் கட்டத்தின் போது குஜராத்தில் உள்ள மற்ற இடங்களுக்கான வாக்குப்பதிவு மே 7 ஆம் தேதி நடைபெறும். தேர்வு முடிவுகள் ஜூன் 4-ம் தேதி அறிவிக்கப்படும்.

நாடாளுமன்றத் தேர்தல் 2024:

543 மக்களவைத் தொகுதிகளுக்கான தேர்தல் ஏப்ரல் 19 ஆம் தேதி தொடங்கி ஜூன் 1 ஆம் தேதி வரை ஏழு கட்டங்களாக நடைபெற்று வருகிறது. வாக்கு எண்ணிக்கை ஜூன் 4-ம் தேதி நடைபெறும். முதல் கட்ட தேர்தல் ஏப்ரல் 19ஆம் தேதி தமிழ்நாடு உள்ளிட்ட 21 மாநிலங்களில் உள்ள 102 தொகுதிகளில் நடந்து முடிந்து உள்ளது. 

இரண்டாம் கட்ட தேர்தல் ஏப்ரல் 26ம் தேதியும், மூன்றாம் கட்ட தேர்தல் மே 7ம் தேதியும், நான்காம் கட்ட தேர்தல் மே 13ம் தேதியும், 5-ம் கட்ட தேர்தல் மே 20-ம் தேதியும், 6-ம் கட்ட தேர்தல் மே 25-ம் தேதியும், கடைசி மற்றும் 7-ம் கட்ட தேர்தல் ஜூன் 1ம் தேதியும் நடைபெற உள்ளது.