இந்திய கிரிக்கெட்டை ரசிகர்களின் சேட்டன்..அதிரடியான விக்கெட் கீப்பர் பேட்ஸ்மேன் சஞ்சு சாம்சன்

இந்திய கிரிக்கெட் வெள்ளை பந்து அணியின் விக்கெட் கீப்பர் பேட்ஸ்மேனாக ஜொலிப்பவர் சஞ்சு சாம்சன். சமீபத்தில் நடந்து முடிந்த டி20 உலகக் கோப்பை தொடரில் இடம்பிடித்திருந்தார். இந்த தொடரில் ஒரு போட்டியில் கூட அவர் விளையாடவில்லை என்றாலும், டி20 உலகக் கோப்பை வென்றவர் என்ற பெருமையை பெற்றவராக உள்ளார்.

கிரிக்கெட் பயணம்

கேரளாவை சேர்ந்த சஞ்சு சாம்சன், தந்தை போலீஸில் கான்ஸ்டபிளாக பணியாற்றியவர். அதேசமயம் கால்பந்து வீரரான அவர் சந்தோஷ் டிராபி தொடரில் டெல்லி அணிக்காக விளையாடியுள்ளார். சஞ்ச சாம்சன் தம்பி சாலி சாம்சனும் கிரிக்கெட் வீரராக இருந்து வந்த நிலையில் தற்போது ஏஜிஎஸ் அலுவலகத்தில் பணி புரிந்து வருகிறார்.

தந்தையின் பணி காரணமாக சிறு வயதை டெல்லியில் கழித்த சாம்சன் அங்குதான் தனது கிரிக்கெட் வாழ்க்கைக்கும் அஸ்திவாரமிட்டார். டெல்லியில் யு13 கிரிக்கெட் அணியில் விளையாட வாய்ப்பு கிடைக்காத நிலையில், மகனுக்காக தனது பணியிலிருந்து விருப்ப ஓய்வு பெற்ற சாம்சனின் தந்தை, கேரளாவுக்கு குடிபெயர்ந்து மகனின் கிரிக்கெட் ஆர்வத்தை ஊக்குவித்தார்.

திருவனத்தபுரத்தில் கிளப் கிரிக்கெட்டில் விளையாடிய சாம்சன், கேரளா யு13 அணியில் 2007இல் சேர்ந்தார். கேப்டனாகவும் செயல்பட்டு 5 போட்டிகளில் 4 சதங்கள் அடித்து கவனம் பெற்றார். தொடர்ந்து சிறப்பாக செய்லபட்ட இவருக்கு இந்திய யு19 கிரிக்கெட் டீமில் விளையாடும் வாய்ப்பு கிடைத்தது. 2014 யு19 உலகக் கோப்பை தொடரில் இந்தியாவின் டாப் ரன் ஸ்கோரர் ஆனார்.

உள்ளூர் கிரிக்கெட்டில் கலக்கல்

ராஞ்சி கோப்பை கிரிக்கெட்டில் தனது 14 வயதில் களமிறங்கி இரட்டை சதமடித்த சாம்சன், அனைவரின் கவனத்தையும் ஈர்த்தார். பின்னர் சையத் முஸ்தாக் அலி கோப்பை, விஜய் ஹசாரே கோப்பை, தியோதர் கோப்பை இந்திய உள்ளூர் கிரிக்கெட்டின் முக்கியமான தொடர்களில் விளையாடியதோடு, பல்வேறு சாதனைகளும் புரிந்தார்.

20 வயதில் கேரளா ராஞ்சி அணியின் கேப்னாக தேர்வு செய்யப்பட்ட சாம்சன், சதத்துடன் சீசனை தொடங்கினார். பேட்ஸ்மேனாக சிறப்பாக ஜொலித்த இவர், கேப்டனாக பெரிய தாக்கத்தை ஏற்படுத்தவில்லை.

2017 ராஞ்சி சீசனில் வேற லெவலில் கம்பேக் கொடுத்த சஞ்சு சாம்சன், 7 போட்டிகளில் 627 ரன்கள் குவித்தார்.லிஸ்ட் ஏ கிரிக்கெட் போட்டியில் கோவாவுக்கு எதிரான போட்டியில் இரட்டை சதமடித்ததுடன், அதி வேக இரட்டை சதம் என சாதனையும் புரிந்தார்.

நியூசிலாந்து ஏ அணிக்கு எதிரான தொடரில் இந்தியா ஏ அணியின் கேப்டனாக சஞ்சு சாம்சன் நியமிக்கப்பட்டார். இந்த தொடரில் நியூசிலாந்து ஏ அணியை ஒயிட் வாஷ் செய்தார்

சர்வதேச கிரிக்கெட் பயணம்

2014இல் முதல் முறையாக இங்கிலாந்துக்கு எதிரான வெள்ளை பந்து தொடரில் தோனியுடன், மற்றொரு விக்கெட் கீப்பர் பேட்ஸ்மேனாக சஞ்சு சாம்சன் சேர்க்கப்பட்டார். ஆனால் ஒரு போட்டியிலும் விளையாடவில்லை. அந்த ஆண்டிலேயே அடுத்தடுத்து சில தொடர்களில் சேர்க்கப்பட்டபோதிலும், முதல் போட்டி விளையாடுவதற்கான வாய்ப்பு அவருக்கு அமையவில்லை.

2015இல் ஜிம்பாப்வேவுக்கு எதிரான தொடரில்தான் முதல் முறையாக களமிறங்கினார். இதன் பின்னர் நான்கு ஆண்டுகள் கழித்து வங்கதேசதுக்கு எதிரான தொடரில் சேர்க்கப்பட்டார். அதன்பின்னர் அவ்வப்போது அணியில் சேர்க்கப்படுவதும், நீக்கப்படுவதுமாக இருந்தார். 2022 முதல் அணியில் தொடர்ச்சியாக சேர்க்கப்பட்ட இவர் கிடைக்கும் வாய்ப்பை நன்கு பயன்படுத்தி முக்கிய வீரராக உருவெடுத்தார்.

ஐபிஎல் போட்டிகளில் சிறந்த இளம் கேப்டன்

2009இல் கொல்கத்தா நைட் ரைடர்ஸ் அணிக்காக ஒப்பந்தம் செய்யப்பட்ட சாம்சன் 2012 சீசன் வரை எந்த போட்டியிலும் விளையாடவில்லை. இதன் பின்னர் 2013 முதல் 2015 வரை ராஜஸ்தான் ராயல்ஸ், 2016-17 டெல்லி கேபிடல்ஸ், மறுபடியும் 2018 முதல் தற்போது வரை ராஜஸ்தான் ராயல்ஸ் அணியில் விளையாடி வருகிறார். ராஜஸ்தான் ராயல்ஸ் அணியின் கேப்டனாக இருந்து சாம்சன், அந்த அணியை இரண்டாவது முறையாக ஐபிஎல் பைனலுக்கு அழைத்து சென்ற கேப்டனாக உள்ளார். அத்துடன் ஐபிஎல் போட்டிகளில் சிறந்த இளம் கேப்டனாக ராஜஸ்தான் ராயல்ஸ் அணியை வழிநடத்தி வருகிறார் 

இந்திய கிரிக்கெட்டில் அதிரடியான விக்கெட் கீப்பர் பேட்ஸ்மேனாக இருந்து வரும் சஞ்சு சாம்சன், விக்கெட் கீப்பிங்கிலும் கலக்கி வருகிறார். திருவனந்தபுரத்தை சேர்ந்த இவர் பாரத் பெட்ரோலியம் மேலாளராகவும், ஐஎஸ்எல் தொடரில் கேரளா பிளாஸ்டர்ஸ் அணியின் பிராண்ட் அம்பாஸ்டராகவும் இருக்கிறார்.

ஃபேஸ்புக் மூலம் கல்லூரி தோழி சாருலதா ரமேஷை காதலித்து திருமணம் செய்து கொண்டார். கிரிக்கெட்டில் தனது வழிகாட்டி முன்னாள் வீரரும், பயிற்சியாளருமான ராகுல் டிராவிட் என்று சஞ்சு சாம்சன் தெரிவித்துள்ளார்.  சரளமாக தமிழ் பேசுபவராக இருந்து வரும் சஞ்சு சாம்சனை சேட்டன் என்று ரசிகர்கள் செல்லமாக அழைக்கிறார்கள். வேட்டையன் படத்தில் வரும் சேட்டன் வந்தல்லே பாடலையும் இவரை பற்றி புகழ் பாடவும் பயன்படுத்துகிறார்கள். கடவுளின் தேசம் என்று அழைக்கப்படும் கேரளாவில் இருந்து இந்திய கிரிக்கெட் அணியில் ஜொலித்து வரும் வீரராக இருக்கும் சஞ்சு சாம்சன் பிறந்தநாள் இன்று.