Hardik Pandya Banned: ஹர்திக் பாண்ட்யாவுக்கு தடை! கணிவு காட்டாத பிசிசிஐ - மும்பை இந்தியன்ஸ் அணிக்கு மோசமான சீசன்

ஐபிஎல் 2024 தொடரில் மும்பை இந்தியன்ஸ் அணி தனது 14 லீக் போட்டிகளில் விளையாடி முடித்துள்ளது. இதில் 4 வெற்றி, 10 தோல்விகளுடன் புள்ளிப்பட்டியலில் கடைசி இடத்தில் உள்ளது. ஐபிஎல் தொடரில் 10 அணிகள் ஆன பிறகு இரண்டாவது முறையாக மும்பை இந்தியன்ஸ் 10வது இடத்தை பிடித்துள்ளது. ஐந்து முறை ஐபிஎல் கோப்பையை வென்ற அணியின் இந்த மோசமான நிலை ரசிகர்களை ஏமாற்றத்தில் ஆழ்த்தியுள்ளது.

ஹார்திக் பாண்ட்யாவுக்கு தடை

இந்த சூழ்நிலையில் மற்றொரு இடியாக மும்பை இந்தியன்ஸ் கேப்டன் ஹர்திக் பாண்ட்யா, அடுத்த சீசனில் முதல் போட்டியை விளையாட தடை விதிக்கப்பட்டுள்ளது.

லக்னோ சூப்பர் ஜெயண்ட்ஸ் அணிக்கு எதிரான கடைசி லீக் போட்டியில் குறித்த நேரத்தில் பவுலிங் செய்து முடிக்காமல் இருந்துள்ளார் ஹர்திக் பாண்ட்யா. இது ஐபிஎல் நடத்தை விதிமீறலாக இருப்பதுடன், மூன்றாவது முறையாக அவர் இந்த தவறில் ஈடுபட்டுள்ளார்.\

ஏற்கனவே, இரண்டு முறை குறித்த நேரத்தில் பவுலிங் செய்யாத ஹர்திக் பாண்ட்யாவுக்கு அபராதம் விதிக்கப்பட்ட நிலையில், மூன்றாவது முறையாக இந்த செயலில் ஈடுபட்டதற்காக அபராதத்துடன் ஒரு போட்டி விளையாட தடையும் விதிக்கப்பட்டுள்ளது. இந்த சீசனில் மும்பை இந்தியன்ஸ் அணிக்கு இனி போட்டிகள் இல்லை என்பதால் இந்த தடையானது அடுத்த சீசனில் முதல் போட்டியில் தொடரும் என பிசிசிஐ தெரிவித்துள்ளது.

மூன்றாவது முறையாக குறித்த நேரத்தில் பந்து வீசி முடிக்காத பாண்ட்யாவுக்கு ரூ. 30 லட்சம் அபராதமும், அணியில் இடம்பிடித்த இதர வீரர்களுக்கு, இம்பேக்ட் வீரர் உள்பட ரூ. 12 லட்சம் அல்லது போட்டி ஊதியத்தில் இருந்து 50 சதவீதமும் அபராதம் விதிக்கப்பட்டிருக்கிறது.

பண்ட்க்கு அடுத்தபடியாக பாண்ட்யா

ஏற்கனவே, ஐபிஎல் 2024 சீசனில் குறித்த நேரத்தில் பவுலிங் செய்து முடிக்காமல் மூன்று முறை ஐபிஎல் நடத்தை விதிமீறலில் ஈடுபட்ட டெல்லி கேபிடல்ஸ் கேப்டன் ரிஷப் பண்ட், ஒரு போட்டியில் இருந்து விளையாட தடை விதிக்கப்பட்டார். அவர் விளையாடாத போட்டியில் ஸ்பின் ஆல்ரவுண்டர் அக்‌ஷர் படேல் கேப்டனாக செயல்பட்டார்.

இதைத்தொடர்ந்து தற்போது பாண்ட்யாவுக்கு தடை விதிக்கப்பட்டிருப்பதால் அடுத்த சீசனில் முதல் போட்டியில் அவருக்கு பதிலாக யார் கேப்டனாக செயல்படுவார் என்கிற எதிர்பார்ப்பும் ஏற்பட்டுள்ளது.

பாண்ட்யாவுக்கு மோசமான சீசன்

மும்பை இந்தியன்ஸ் அணியின் புதிய கேப்டனாக நியமிக்கப்பட்ட ஹர்திக் பாண்ட்யா, மிக பெரிய எதிர்பார்ப்புக்கு இடையே களமிறங்கிய நிலையில், கேப்டன்சியில் கோட்டை விட்டதோடு, தனது தனிப்பட்ட ஆட்டத்தில் ஜொலிக்க தவறினார். இந்த சீசனில் மொத்த 218 ரன்கள் அடித்து 18 என சராசரி வைத்திருக்கும் பாண்ட்யா, 11 விக்கெட்டுகளை மட்டும் கைப்பற்றினார். அவரது எகானமியும் 10.75 என உள்ளது.

"மிகவும் கடினமாக உள்ளது. நாங்கள் நல்ல கிரிக்கெட் விளையாடாமல் போனது இந்த சீசன் கைவிட்டு போனதற்கு காரணமாக அமைந்தது" என லக்னோவுக்கு எதிராக இந்த சீசனின் கடைசி போட்டி விளையாடிய பின் பாண்ட்யா கூறினார்.

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

Twitter: https://twitter.com/httamilnews 

Facebook" https://www.facebook.com/HTTamilNews 

You Tube: https://www.youtube.com/@httamil  

Google News: https://tamil.hindustantimes.com/ 

ஹிந்துஸ்தான் தமிழ் வாட்ஸ் அப் குடும்பத்தில் இணைய கீழே உள்ள லிங்கை கிளிக் செய்யுங்கள்.

https://www.whatsapp.com/channel/0029Va9NEUA7IUYU4eBTc81v