அபார சக்தி கொண்ட ஸ்ரீ தர்ம முனீஸ்வரர்!

ராமநாதபுரம் மாவட்டம் சக்கரக்கோட்டை அருகே உள்ளது ஸ்ரீ தர்ம முனீஸ்வரர் கோயில். இக்கோயில் 100 ஆண்டுகள் பழமையான கோயிலாகும். பில்லி, சூனியம், செய்வினை உள்ளிட்ட தீய சக்திகளை அண்ட விடாமல் ஆன்மீக பக்தர்களைக் காத்து வரும் அபார சக்தி உடைய முனி அய்யா என்றழைக்கக்கூடிய தர்ம முனீஸ்வரர் ஆலயம் மிகவும் சிறப்பு வாய்ந்தது.

இக்கோயிலுக்குப் பொதுமக்கள் வெள்ளி, செவ்வாய் ஆகிய கிழமைகளில் அதிக அளவு வருகை புரிந்து ஆலய வழிபாடு நடத்தி வருகின்றனர். அரசமரம் தலவிருட்சமாக இருந்து வருகிறது. ஸ்ரீ தர்ம முனீஸ்வரர் அரிவாளுடன் பக்தர்களுக்குக் காட்சி தருகிறார்.

இந்த கோயிலில் அரச மரத்தடி விநாயகர், ஸ்ரீ ஆஞ்சநேயர், ஸ்ரீ பொன்னாத்தாள், சோனையா கருப்பர், சேதுமாக்காளி, ஸ்ரீ கிருஷ்ணர், ஒன்பது நவகிரகங்கள் தனித் தனி சன்னதிகளில் காட்சி தருகின்றனர். மஞ்சள், இளநீர், பால், பன்னீர், சந்தனம், குங்குமம், விபூதி, திரவிய பொடி உள்ளிட்ட 21 வகையான அபிஷேக ஆராதனைகளும் நடைபெற்று வருகிறது.

திருமணத்தடை நீங்குதல், குழந்தை வரம் வேண்டுதல், செய்வினை கோளாறுகளை நிவர்த்தி செய்ய, தீய சக்திவரிடமிருந்து பாதுகாக்க, கல்வி செல்வம், தொழில் முன்னேற்றம் அடைதல் ஆகியவற்றுக்கு வெள்ளி செவ்வாய்க்கிழமைகளில் சிறப்பு வழிபாடு செய்யப்படுகிறது.

இங்குக் கோரிக்கைகள் நிறைவேறினால் இரட்டைக் கிடாய் வெட்டி நேர்த்திக்கடனைப் பக்தர்கள் செலுத்துகின்றனர். சித்திரை, பங்குனி மாதங்களில் சிறப்பு வழிபாடுகள் நடத்த பல்வேறு மாவட்டத்திலிருந்து பல்வேறு பக்தர்கள் நேர்த்திக் கடனாக ஆலய தரிசனம் செய்து வருகின்றனர்.