Thalapathy 69: பற்றவைக்கும் எதிர்பார்ப்பு.. அடுத்தடுத்து படத்தில் இணையும் பிரபலங்கள்.. குஷியில் ரசிகர்கள்..

நடிகர் விஜயின் நடிப்பில் கடந்த செப்டம்பர் 5ஆம் தேதி வெளியான கோட் திரைப்படம் கலவையான விமர்சனங்களை பெற்று வருகிறது. இருப்பினும் பெரும்பான்மையான பார்வையாளர்களுக்கு திரைப்படம் பிடித்திருப்பதால், படத்தின் வசூல் 500 கோடியை தாண்டி மெகாஹிட் அடித்திருக்கிறது.

நட்சத்திர இயக்குநரான ஹெச்.வினோத்

சதுரங்கவேட்டை’ திரைப்படம் மூலமாக இயக்குநராக அறிமுகமான ஹெச்.வினோத், ‘தீரன் அதிகாரம் ஒன்று’ படத்தை இயக்கியதின் மூலம் கவனம் மிகு இயக்குநர்கள் பட்டியலில் இணைந்தார். தொடர்ந்து அஜித்தின் ‘நேர் கொண்ட பார்வை’ ‘வலிமை’ ‘துணிவு’ உள்ளிட்ட படங்களை இயக்கி நட்சத்திர இயக்குநர்கள் பட்டியலில் இணைந்தார்.

விஜய் அடுத்ததாக அரசியலுக்கு செல்ல இருப்பதால் இந்தப்படம் அரசியல் படமாக இருக்குமா என்ற கேள்விக்கு, இந்தப்படம் முழுக்க முழுக்க விஜயின் படமாக இருக்குமென்று ஹெச்.வினோத் கூறியிருந்தார்.

தளபதி 69 அப்டேட்

இந்நிலையில் தளபதி 69 படத்தின் அப்டேட்களை படக்குழு வெளியிடத் தொடங்கியுள்ளது. 

அதன்படி, அனிமல் திரைப்படம் மூலம் ரீ எண்ட்ரி ஆன நடிகர் பாபி டியோல், ஏற்கனவே நடிகர் விஜய்யுடன் பீஸ்ட் படத்தில் நடித்திருந்த நடிகை பூஜா ஹெக்டே, பிரேமலு படத்தின் நாயகி மமிதா பைஜு, இயக்குநரும் நடிகருமான கௌதம் மேனன் போன்றோர் விஜய் 69 படத்தில் இணைந்துள்ளதாக படத்தின் தயாரிப்பு நிறுவனமான கேவிஎன் புரொடக்ஷன் அறிவிப்பை அடுத்தடுத்து வெளியிட்டு வந்தது. இந்த நிலையில், நடிகர் விஜய்யின் 69வது படத்தில் நடிக்க இருக்கும் அடுத்த 2 நடிகர்கள் குறித்த அறிவிப்பை படக்குழு அறிவித்துள்ளது.

இந்த அறிவிப்பில், நடிகை பிரியாமணி மற்றும் நடிகர் நரேன் தற்போது தளபதி 69 படத்தில் இணைந்திருப்பது தெரியவந்துள்ளது. இந்த அறிவிப்பால் படத்தின் மீதான எதிர்பார்ப்பு மேலும் அதிகரித்துள்ளது.

நடிகை பிரியாமணி

தமிழ் சினிமாவில் பல படங்களில் நாயகியாக நடித்திருந்தாலும், ரசிகர்களால் என்றும் மறக்க முடியாத இடத்தில் இருப்பது தான் முத்தழகு கதாப்பாத்திரம். இயக்குநர் அமீரின் பருத்தி வீரன் படத்தில், கார்த்தியை துரத்தி துரத்தி காதலிக்கும் பெண்ணாக மக்களை ஈர்த்திருப்பார் பிரியாமணி. இதையடுத்து, பல வலுவான கதாப்பாத்திரங்களை ஏற்று நடித்து தமிழ் மற்றுமின்றி தென்னிந்திய சினிமாவிலும், பாலிவுட்டிலும் நடித்து வருகிறார். இந்த நிலையில், இவர் நடிகர் விஜய்யின் கடைசி திரைப்படமான தளபதி 69ல் கைகோர்த்திருக்கிறார்.

நடிகர் நரேன்

அஞ்சாதே திரைப்படத்தில் தனது நடிப்பால் பலரின் கவனத்தையும் ஈர்த்தவர் நடிகர் நரேன். தமிழ் மற்றும் மலையாளத் திரைப்படங்களில் கதாநாயகனாகவும், குணச்சித்திர வேடத்திலும் நடித்து வந்த இவர் கைதி படத்தில் மீண்டும் ஆக்ஷனில் இறங்கி கலக்கி இருப்பார். இந்நிலையில், அவரும் தற்போது விஜய் 69 படக்குழுவில் இணைந்துள்ளார். இதற்கான அறிவிப்பை படத்தின் தயாரிப்பு நிறுவனம் வெளியிட்டுள்ளது.

குழந்தைகள் மற்றும் பேமிலி ஆடியன்ஸால் அதிகம் விரும்பப்படும் விஜய், தன் படத்தில் பெரும்பாலான ரசிகர்களையும் கவர் செய்யும் விதமாகவே நடித்து வருகிறார். இதனால் தான், இவரது படத்தில் பெரும்பாலான கதாபாத்திரங்கள் பெரியவர்களுடன் சேர்த்து இளம் தலைமுறையினரால் ரசிக்கப்படும் வகையில் தேர்ந்தெடுக்கப்பட்டடு வருகிறது என தகவல்கள் உலா வருகின்றனர்.