IPL கிரிக்கெட்டில் ஒரே அணி, TNPL-இல் எதிரெதிர் அணியில் இடம்பிடித்த தமிழக வீரர்கள்

தமிழ்நாடு பிரீமியர் லீக் (Tamil Nadu Premier League) ஆண்டுதோறும் நடைபெறும் ஓர் உள்ளூர் கிரிக்கெட் போட்டி ஆகும்.

2016-இல் தமிழ்நாடு கிரிக்கெட் சங்கத்தால் தொடங்கப்பட்ட இந்தப் போட்டி, இந்தியன் ப்ரீமியர் லீக் போட்டி போன்று தமிழக அளவில் நடைபெறும் கிரிக்கெட் தொடர் ஆகும்.

இந்தப் போட்டிகள் மூலம் பல இளம் வீரர்களின் திறமைகள் அடையாளம் காணப்படும் என்பதில் மாற்றுக் கருத்து இருக்க முடியாது. இன்று முதல் 7வது சீசன் போட்டி தொடங்கியது.

டிஎன்பிஎல் கிரிக்கெட்டின் முதல் ஆட்டத்தில் திருப்பூர் தமிழன்ஸ்-லைகா கோவை கிங்ஸ் ஆகிய அணிகள் மோதின.

கோவை அணியில் சாய் சுதர்ஷனும், திருப்பூர் தமிழன்ஸ் அணியில் விஜய் சங்கரும் இடம்பிடித்திருக்கின்றனர். இவர்கள் இருவருமே குஜராத் டைட்டன்ஸ் அணியில் இடம்பிடித்து விளையாடினார்கள்.

பைனல் வரை முன்னேறிய குஜராத் அணியில் இவர்கள் இருவரின் பங்களிப்பு மிக முக்கியமானது ஆகும்.

டிஎன்பிஎல் கிரிக்கெட்டில் விளையாடிவரும் இவர்களிடம் முதல் போட்டி தொடங்குவதற்கு தொகுப்பாளர் பேட்டி கண்டார்.

அப்போது அவர், நீங்கள் இருவரும் ஐபிஎல் கிரிக்கெட்டில் ஒன்றாக விளையாடினீர்கள். டிஎன்பிஎல் கிரிக்கெட்டில் எதிரெதிர் அணியில் விளையாடுகிறீரகள். இதை எப்படி பார்க்கிறீர்கள் என்று கேள்வி எழுப்பினார்.

அதற்கு இருவரும் அளித்த பதிலில், "நாங்கள் இருவரும் மைதானத்திற்கு வெளியே நண்பர்கள். களத்திற்கு வந்துவிட்டால் போட்டியைத் தான் கருத்தில் கொள்வோம். குஜராத் அணியில் விளையாடியது அருமையான அனுபவம். டிஎன்பிஎல் கிரிக்கெட்டில் விளையாடி நல்ல நிலைக்குச் சென்ற வீரர்கள் உள்ளனர். எனவே, டிஎன்பிஎல் கிரிக்கெட்டிற்கு நாங்கள் அதிக முக்கியத்துவம் கொடுப்போம்" என்று தெரிவித்தனர்.

முன்னதாக, முதல் போட்டியில் டாஸ் வென்ற திருப்பூர் தமிழன்ஸ், பந்துவீச்சை தேர்வு செய்தது.

இதையடுத்து ஷாருக் கான் தலைமையிலான கோவை கிங்ஸ் அணி முதலில் விளையாடியது.

தொடக்க ஆட்டக்காரர்களாக பி.சச்சின், ஜே.சுரேஷ் குமார் ஆகியோர் களமிறங்கினர். ஆனால், இருவரும் பெரிதாக சோபிக்கவில்லை. சச்சின் 2 ரன்களில் ஆட்டமிழக்க, சுரேஷ் குமார் எல்பிடபிள்யூ ஆனார்.

முதல் விக்கெட்டை திருப்பூர் தமிழன்ஸ் பவுலர் புவனேஸ்வரன் வீழ்த்தினார். 11 ரன்கள் எடுத்திருந்போது எல்.பி.டபிள்யூ முறையில் சுரேஷ் குமார் விக்கெட்டை காலி செய்தார் புவனேஸ்வரன்.

இதன்மூலம், இந்த சீசன் டிஎன்பிஎல் போட்டியில் முதல் விக்கெட்டை எடுத்தார் புவனேஸ்வரன். பின்னர் வந்த சாய் சுதர்ஷன் நிதானமான ஆட்டத்தை வெளிப்படுத்தினார்.

மற்றொரு பக்கம், ராம் அரவிந்த் டக் அவுட்டாகிவிட, யு.முகேஷ் 33 ரன்களிலும், அதீக் அர் ரஹ்மான் 9 ரன்களிலும் ஆட்டமிழந்தனர்.

30 பந்துகளில் அரை சதம் விளாசி அசத்தினார். ஐபிஎல் கிரிக்கெட்டில் குஜராத் டைட்டன்ஸ் அணியில் கலக்கிய சாய் சுதர்ஷன் இந்தப் போட்டியில் அதிரடி காண்பித்தார்.

மற்றொரு பக்கம் கேப்டன் ஷாருக் கான் அவருக்கு தோள் கொடுத்தார்.

திருப்பூர் தமிழன்ஸ் சார்பில் அதிகபட்சமாக விஜய் சங்கர் 4 ஓவர்கள் வீசி 26 ரன்களை மட்டுமே விட்டுக் கொடுத்து 3 விக்கெட்டுகளை வீழ்த்தினார்.

புவனேஸ்வரன் 4 ஓவர்கள் வீசி 35 ரன்களை விட்டுக் கொடுத்து 1 விக்கெட்டை எடுத்தார். சாய் கிஷோர் 2 விக்கெட்டுகளை கைப்பற்றினார்.

இவ்வாறாக கோவை கிங்ஸ் அணி நிர்ணயிக்கப்பட்ட 20 ஓவர்களில் 7 விக்கெட் இழப்புக்கு 179 ரன்களை குவித்தது. சாய் சுதர்ஷன் 45 பந்துகளில் 86 ரன்கள் விளாசி ரன் அவுட்டானார்.