NEET-UG Row: 'நீட் முறைகேடு’: இந்தியா கூட்டணி எம்.பி.க்களின் அமளியால் மக்களவை ஜூலை 1 வரை ஒத்திவைப்பு

NEET-UG Row: நீட்-யுஜி தேர்வுகளில் நடந்ததாகக் கூறப்படும் முறைகேடுகள் மற்றும் தேர்வுகளை நடத்தும் தேசிய தேர்வு முகமையின் (என்.டி.ஏ) 'தோல்வி' குறித்து விவாதிக்க வேண்டும் என்று எதிர்க்கட்சித் தலைவர்கள் அமளியில் ஈடுபட்டதால் மக்களவை மற்றும் மாநிலங்களவையின் இரு அவைகளும் இன்று ஒத்திவைக்கப்பட்டன. அதன்பின் சிறிதுநேரம் கழித்து கூடிய மக்களவையில் மீண்டும் இந்தியா கூட்டணி எம்.பிக்களின் அமளி நீடித்ததால், மக்களவை ஜூலை 1ஆம் தேதியான திங்கள்கிழமை வரை ஒத்திவைக்கப்பட்டது. 

இந்தியா கூட்டணியும் நீட் முறைகேடு தொடர்பான விவாதமும்:

இந்த விவகாரங்கள் குறித்து இரு அவைகளிலும் விவாதிக்கக் கோரி காங்கிரஸ் உள்ளிட்ட எதிர்க்கட்சிகளைச் சேர்ந்த நாடாளுமன்ற உறுப்பினர்கள் (எம்.பி.க்கள்) ஒத்திவைப்பு தீர்மானங்களை முன்மொழிந்தனர். அந்தக் கோரிக்கை நிராகரிக்கப்பட்டது.  நாட்டின் தலைநகர் டெல்லியில் உள்ள காங்கிரஸ் தலைவர் மல்லிகார்ஜுன கார்கேவின் இல்லத்தில் ஜூன் 27அன்று நடைபெற்ற இந்தியா கூட்டமைப்பின் தலைவர்களின் கூட்டத்தில் இந்த தீர்மானங்களை நகர்த்துவதற்கான முடிவு எடுக்கப்பட்டது.

காங்கிரஸ் எம்.பி.க்கள் ரஞ்சித் ரஞ்சன் மற்றும் கவுரவ் கோகாய் ஆகியோர் மாநிலங்களவையில் ஒத்திவைப்பு தீர்மானத்தை தாக்கல் செய்தனர்.

அண்மையில் காலமான சபை உறுப்பினர்களின் இரங்கல் குறிப்புகளை சபாநாயகர் ஓம் பிர்லா வாசித்தபின், இன்றைய மக்களவை கூட்டத்தொடர் தொடங்கியது. இதையடுத்து குடியரசுத் தலைவர் உரைக்கு நன்றி தெரிவிக்கும் தீர்மானத்தின் மீதான விவாதம் முதலில் விவாதிக்கப்பட வேண்டும் என்று சபாநாயகர் வலியுறுத்தினார்.

"அரசாங்கமும் எதிர்க்கட்சியும் நாட்டின் பாதிக்கப்பட்ட இளைஞர்களுக்கு நாடாளுமன்றத்தில் இருந்து ஒரு செய்தியை அனுப்ப விரும்பினோம். அதனால்தான் குடியரசுத் தலைவர் உரைக்கு நன்றி தெரிவிக்கும் தீர்மானம் குறித்து விவாதிக்கும் முன், நீட்-யுஜி தேர்வுகளில் நடந்ததாகக் கூறப்படும் முறைகேடுகள் குறித்து விவாதம் நடத்த வேண்டும் என்று கோரியுள்ளோம்" என்று எதிர்க்கட்சித் தலைவரும் காங்கிரஸ் எம்.பி.யுமான ராகுல் காந்தி கூறினார்.

ஒத்திவைத்த மக்களவை சபாநாயகர் ஓம் பிர்லா:

முதலாவது ஒத்திவைக்கப்பட்ட பின்னர் நண்பகலில் மக்களவை மீண்டும் கூடியது. எதிர்க்கட்சி எம்.பி.க்கள் தொடர்ந்து அமளியில் ஈடுபட்டதையடுத்து, மக்களவையை சபாநாயகர் ஓம் பிர்லா ஜூன் 1ஆம் தேதி வரை ஒத்திவைத்தார்.

அப்போது நாடாளுமன்ற விவகாரத்துறை அமைச்சர் கிரண் ரிஜிஜூ, ‘’குடியரசுத் தலைவர் உரைக்கு நன்றி தெரிவிக்கும் தீர்மானத்தின்போது நாடாளுமன்ற வரலாற்றில் இதற்கு முன்பு வேறு எதுவும் விவாதிக்கப்படவில்லை. குடியரசுத் தலைவரின் உரைக்கு நன்றி தெரிவிக்கும் தீர்மானத்திற்குப் பிறகு அனைத்து கேள்விகளுக்கும் அரசாங்கம் பதிலளிக்கும் என்று நான் உறுதியளிக்கிறேன்" என்று அவர் மக்களவையில் கூறினார்.

நீட் தேர்வு குறித்து விவாதிக்கக் கோரி, இந்தியா கூட்டணி எம்.பி.க்கள் அமளியில் ஈடுபட்டதால் மாநிலங்களவையிலும் தலைவர் ஜகதீப் தன்கர் அவையை ஒத்திவைத்தார். இருப்பினும் மாநிலங்களவை நடவடிக்கைகள் தொடர்ந்தன.

நீட்  முறைகேடும் நடவடிக்கையும்:

மே 5ஆம் தேதி நடைபெற்ற மருத்துவக் கல்லூரி சேர்க்கைக்கான நீட்-யுஜி தேர்வு, வினாத்தாள் கசிவு மற்றும் முறைகேடுகள் குற்றச்சாட்டுகளால் சர்ச்சையில் சிக்கியுள்ளது. தேர்வு முடிவுகள் ஜூன் 4-ம் தேதி வெளியிடப்பட்டன. நீட்-யுஜி வினாத்தாள் கசிந்த வழக்கில் ஜூன் 27 அன்று சிபிஐ தனது முதல் கைது நடவடிக்கை மேற்கொண்டது. அதில், பீகார் மாநிலம் பாட்னாவில் இரண்டு பேரை கைது செய்தது.