முதல் நாளில் ஆட்டம் பாட்டம்.. கூடவே வேட்டும் வைக்கும் போட்டியாளர்கள்.. பிக்பாஸ் வெளியிட்ட வீடியோ!

ஆரவாரத்திற்கும் பஞ்சாயத்திற்கும் குறைவே இல்லாத கேம் ஷோ என்றால் அது பிக்பாஸ் தான். வெவ்வேறு இடத்தை சேர்ந்த, வெவ்வேறு துறைகளைச் சேர்ந்த, வெவ்வேறு பழக்க வழக்கங்கள் கொண்ட 18 பேரை ஒரே வீட்டில் அடைத்து வைத்து, ஒன்றாக பயணிக்க வைக்கும் நிகழ்ச்சி தான் பிக்பாஸ்.

ஆளும் புதுசு ஆட்டமும் புதுசு

இந்த நிகழ்ச்சி தமிழில் ஆரம்பித்த நாள் முதல்கொண்டு தற்போதுவரை இதற்கான ஹைப் மட்டும் குறையவே இல்லை. ஆரம்பித்த புதிதில் கையாளப்பட்ட உத்திகள் எதுவும் தற்போதுவரை கையாளப்படவில்லை என்றாலும், ஆட்கள் மாற மாற விளையாட்டையும் மாற்றி வருகிறது பிக்பாஸ்.

அதற்கு தகுந்தாற் போல, பிக்பாஸ் 8வது சீசனில், இதுவரை நிகழ்ச்சியை தொகுத்து வழங்கி வந்த கமல் ஹாசனுக்கு மாற்றாக விஜய் சேதுபதி வந்துள்ளார். அத்துடன் வீடு, அங்கு விளையாடும் முறை என அனைத்திலும் மாற்றத்தையும் கொண்டு வந்துள்ளார். அதன் தீமிற்கு ஏற்ப. அதுதான், ஆளும் புதுசு.. ஆட்டமும் புதுசு..

முதல் நாளிலே வந்த பிரிவினை

அப்படி எல்லாமே புதுசு என அறிமுகப்படுத்தப்பட்ட நிகழ்ச்சியில், கொடுக்கப்பட்ட டாஸ்குகளும் புதுசாகவே உள்ளது. பிக்பாஸ் வீட்டை ஆண்கள் பக்கம் பெண்கள் பக்கம் எனப் பிரிப்பது, இரு பாலினத்தை ஒருவருக்கு ஒருவர் மோத வைப்பது, முதல் 24 மணி நேரத்தில் போட்டியாளர் ஒருவரை வீட்டிலிருந்து வெளியேற்ற வைப்பது என பார்வையாளர்களுக்கு அனைத்தும் புதிதாக இருந்தாலும், அங்கு நடக்கும் சண்டைகளும், விவாதங்களும் பேச்சுகளும் பதிதாக இருக்கப் போவதில்லை என்பது என்னவோ உண்மை தான்.

ரூம் பஞ்சாயத்து

இந்நிலையில், ஆட்டத்தை புதிதாக ஆரம்பிக்கும் பொருட்டு, போட்டியாளர்களை உள்ளே அனுப்பிய உடனே அதற்கான வேலையை பார்த்துவிட்டது பிக்பாஸ். ரூம் பஞ்சாயத்தை கொடுத்து, உள்ளே நுழையும் போதே டீம் செட் செய்ய வேண்டிய கட்டாயத்தில் போட்டியாளர்கள் தள்ளப்பட்டு விட்டனர். அதற்கு ஒத்துப்போகதவர்கள் இருந்தாலும், ஏற்கனவே எடுக்கப்பட்ட முடிவு என்பதால், அதை அவர்களுக்கு புரிய வைக்க வேண்டும் எனவும் அறிவுறுத்தப்பட்டது.

இந்த நிலையில், எவ்வளவு எடுத்துக் கூறியும் ரூம் தேர்ந்தெடுத்த விவகாரகத்திற்கும், அதற்காக ஆண்கள் அணி வைத்த கோரிக்கைக்கும் உடன்பட மறுத்த ஜாக்குலின், ஹாலில் படுத்து உறங்கி, தனது நிலைப்பாட்டில் உறுதியாக இருக்கிறார். இதையடுத்து, கடைசி போட்டியாளர் உள்ளே நுழைந்த உடனேயே அங்கு பிரச்சனையும் ஆரம்பித்து விட்டதாகவே தெரிகிறது.

தொடங்கிய நாமினேஷன்

இதற்குள், பிக்பாஸ் தற்போது, இந்த நாளுக்கான ப்ரமோவை வெளியிட்டுள்ளது. அதில், பிக்பாஸ் வீட்டில் உள்ள போட்டியாளர்களில் ஒருவரை எவிக்ஷன் செய்வது தொடர்பாக பேசப்பட்டுள்ளது. பிக்பாஸ் வீட்டிற்குள் நுழைந்து, முதல் நாள் காலையை பாட்டுடன் ஆட்டம் போட்டு ஆரம்பிக்கும் போட்டியாளர்கள் அடுத்தது தங்கள் வேலையை ஆரம்பிக்கின்றனர்.

உள்ளே வந்த ஒரே நாளில் எப்படி ஒருவரை வெளியேற்றுவது என்ற கேள்வியில் ஆரம்பித்து, யார் யாரை நாமினேட் செய்கிறார்கள் என்பது வரை அந்த வீடியோவில் காட்டப்பட்டுள்ளது.

இதையடுத்து, எலிமினேஷனுக்கு நாமினேட் செய்யப்பட்ட உடனேயே அங்கு, கலவரம் உண்டாக வாய்ப்புள்ளது. நாமினேட் செய்யப்பட்டதற்கான காரணங்களை கூறும் போது, நிச்சயம் அங்கு சில சர்ச்சைகளும், நெகட்டிவ் கருத்துகளும் உருவாகும். இதனால், இந்த நிகழ்ச்சி எப்போது ஒளிபரப்பாகும், புதிய போட்டியாளர்களின் இந்த சண்டையை எப்போது பார்க்கலாம் என மக்கள் ஆவலுடன் எதிர்பார்த்து காத்திருக்கின்றனர்.