Thalapathy Vijay: கோட் என எழுதப்பட்டிருக்கும் மோதிரம்..படக்குழுவின் அன்பு பரிசு - போட்டோவுடன் விஜய் பகிர்ந்த பதிவு

தளபதி விஜய்யின் தி கோட் படம் ரசிகர்கள் மத்தியில் வரவேற்பை பெற்று வெற்றியை பெற்றிருப்பதுடன் பாக்ஸ் ஆபிஸிலும் வசூலை குவித்துள்ளது. இதையடுத்து இந்த வெற்றியை கொண்டாடும் விதமாக கோட் என எழுத்தப்பட்டிருக்கும் மோதிரம் படக்குழு சார்பில் தளபதி விஜய்க்கு பரிசாக அளிக்கப்பட்டுள்ளது

விஜய்க்கு பரிசாக மோதிரம்

தளபதி விஜய் தனது எக்ஸ் பக்கத்தில், தனது கையில் கோட் என ஆங்கிலத்தில் எழுதப்பட்டிருக்கும் மோதிரத்தை அணிந்திருப்பதை காட்டியவாறு புகைப்படத்தை பகிர்ந்திருந்தார். இந்த பதிவில் தி கோட் என்ற கேப்ஷன் மட்டுமே குறிப்பிட்டிருந்தார்.

இதுபற்றி படக்குழுவிடம் விசாரிக்கையில், பிரபல தயாரிப்பாளரான டி. சிவா, தி கோட் படம் வெற்றிகரமாக ஓடியதற்காகவும் தமிழ்நாடு பாக்ஸ் ஆபிஸில் ரூ. 100 கோடிக்கு மேல் வசூலை ஈட்டியிருப்பதால், அவருக்கு பரிசாக அளித்திருப்பது தெரியவந்துள்ளது.

இந்த மோதிரம், ரொம்ப அழகா இருக்கு என விஜய் கூறியதாகவும், நீண்ட நேரம் அவர் அதை அணிந்திருந்ததாகவும் தயாரிப்பாளர் டி. சிவா கூறியுள்ளார்.

வெங்கட் பிரபு எக்ஸ் பதிவு

இதுதொடர்பாக தி கோட் படத்தின் இயக்குநர் வெங்கட் பிரபு தனது எக்ஸ் பக்க பதிவில், "விஜய் அண்ணாவுக்கு இது பெர்பெக்டான கிப்ட். நன்றி சிவா சார். தளபதி69 குழுவுக்கு வாழ்த்துகள்" என குறிப்பிட்டுள்ளார்.

தளபதி 69 பூஜையுடன் தொடக்கம்

இதையடுத்து ரசிகர்கள் மத்தியில் பெரிதும் எதிர்பார்ப்பை ஏற்படுத்தியிருக்கும் தளபதி 69 படம் பூஜையுடன் தொடங்கியுள்ளது. இது தொடர்பான புகைப்படங்கள் சமூக வலைத்தளங்களில் வெளியாகி வைரலாகி வருகின்றன. இந்த படத்தை எச். வினோத் இயக்குகிறார்.

முன்னதாக, தளபதி 69 படத்தில் நடிக்க இருக்கும் நடிகர், நடிகைகள் யாரெல்லாம் என்பது குறித்த அறிவிப்பை படக்குழு வெளியிட்டது. அதன்படி, படத்தில் நாயகிகளாக பூஜா ஹெக்டே, மமிதா பைஜூ, பிரியாமணி ஆகியோர் நடிக்கிறார்கள். வில்லனாக பாலிவுட் நடிகர் பாபி தியோல் நடிக்கிறார். நடிகர்கள் பிரகாஷ் ராஜ், நரேன், இயக்குநர் கெளதம் மேனன் முக்கிய கதாபாத்திரங்களில் நடிக்கிறார்கள்.

தற்போது படத்தின் தொழில்நுட்ப கலைஞர்கள் பெயரையும் படக்குழுவினர்கள் அறிவித்துள்ளனர். அதன்படி படத்தின் ஒளிப்பதிவாளர் - சத்யன் சூரியன், படத்தொகுப்பாளர் - ப்ரதீப் ராகவ், சண்டை பயிற்சியாளர் - அனல் அரசு, கலை இயக்குநர் - செல்வக் குமார், ஆடை வடிவமைப்பாளர் - பல்லவி

தி கோட் வசூல்

கடந்த மாதம் 5ஆம் தேதி வெளியான தி கோட் திரைப்படம் ரசிகர்களை கவர்ந்ததுடன், விமர்சிக ரீதியாகவும் பாராட்டை பெற்றது. முதல் நாளில் இருந்தே பாக்ஸ் ஆபிஸ் வசூலில் கலக்கி வந்த தி கோட் உலக அளவில் ரூ. 450 கோடிக்கு மேல் வசூலித்திருப்பதாக கூறப்படுகிறது. அந்த வகையில் விஜய் நடிப்பில் அதிக வசூலை ஈட்டிய படங்களில் லியோவுக்கு அடுத்தபடியாக தி கோட் படம் உள்ளது.

தளபதி 69 படத்தை தொடர்ந்து தீவிர அரசியலில் ஈடுபட இருக்கிறார் தளபதி விஜய். எனவே இது அவரது கடைசி படமாக இருக்ககூடும் என கூறப்படுகிறது. எனவே அனைத்து தரப்பினரிடையே எதிர்பார்ப்பை ஏற்படுத்தியிருக்கும் இந்த படத்தை அடுத்த ஆண்டு அக்டோபர் மாதத்தில் வெளியிட படக்குழுவினர்கள் முடிவு செய்துள்ளனராம்.