VIJAYAKANTH BIRTHDAY: மதுரை டூ சென்னை.. நடிகரானபின் எப்போதும் போட்ட சாப்பாடு.. குறுகிய ஆண்டுகளில் எதிர்க்கட்சித்தலைவர்

VIJAYAKANTH BIRTHDAY: தமிழ் சினிமாவில் ஜாம்பவானாக வாழ்ந்த எம்.ஜி.ஆர், கொடை வள்ளல் எனப் பலராலும் போற்றப்படுகிறார். அதற்குப் பிறகு இன்றுவரை சினிமாவில் மட்டுமல்லாது பொதுமக்களிடத்திலும் கொடை வள்ளலாக வாழ்ந்தவர், நடிகர் விஜயகாந்த். கேப்டன் என தமிழ் சினிமாவில் அனைவராலும் அழைக்கப்படும் விஜயகாந்த் அலுவலகத்துக்குச் சென்றால், எளியவர்கள் யார் வேண்டுமென்றாலும் சாப்பிடலாம் என்னும் நிலையை உருவாக்கி வைத்தார்.

ஏறத்தாழ நாற்பது ஆண்டுகளாக திரையுலகில் ஜொலித்த விஜயகாந்த் 150-க்கும் மேற்பட்ட படங்களில் நடித்தார். அதில் வைதேகி காத்திருந்தாள், அம்மன் கோயில் கிழக்காலே, பூந்தோட்ட காவல்காரன், செந்தூரப்பூவே, புலன் விசாரணை, சின்ன கவுண்டர், ஹானஸ்ட் ராஜ், கேப்டன் பிரபாகரன் மாநகர காவல், வல்லரசு, வானத்தைப்போல, ரமணா ஆகியப் படங்கள் இவரை பட்டிதொட்டியெங்கும் கொண்டு சேர்த்தன. காவல் துறை அதிகாரி வேடமென்றாலே, அது விஜயகாந்த் என்னும் அளவுக்கு நிறையப் படங்களில் போலீஸ் அதிகாரியாக நடித்தார், விஜயகாந்த்.

இதுவரை இரண்டு தென்னிந்தியாவுக்கான ஃபிலிம்பேர் விருதையும், மூன்று தமிழ்நாடு மாநில திரைப்பட விருதுகளையும் வென்றவர்.

விஜயகாந்தின் பிறப்பு மற்றும் தனிப்பட்ட வாழ்க்கை:

மதுரையில் கே.என்.அழகர்சாமி மற்றும் ஆண்டாள் தம்பதிகளுக்கு 1952ஆம் ஆண்டு, ஆகஸ்ட் 25ஆம் தேதி பிறந்தவர் தான், விஜயகாந்த். சிறு வயதுமுதலே நடிப்பின் மீது ஆர்வம்கொண்டிருந்த விஜயகாந்த், எம்.ஜி.ஆர் ரசிகராக இருந்தார். மேலும், தனது நிர்வாகத்திறமையை, கீரைத்துறையில் தனது தந்தை நடத்தி வந்த அரிசி ஆலையில் காட்டி பலரை ஆச்சரியப்படுத்தினார். இந்நிலையில் 1970களில் மதுரையில் இருந்து சென்னை வந்து சினிமா துறையில் நடிக்கும் வாய்ப்பினைப் பெற்று, பின் படிப்படியாக உச்ச நடிகராக ஆனார்.

விஜயகாந்துக்கு பிரேமலதா என்பவருடன் 1990ஆம் ஆண்டு, ஜனவரி 31ஆம் தேதி திருமணம் நடந்தது. அதன்பின், விஜயகாந்த் மற்றும் பிரேமலதா தம்பதியினருக்கு விஜயபிரபாகரன், சண்முகபாண்டியன் ஆகிய இரண்டுபிள்ளைகள் பிறந்தனர்.

விஜயகாந்தின் அரசியல் வாழ்க்கை:

தமிழக மக்கள் மத்தியில் புரட்சி கலைஞர், கேப்டன், கருப்பு எம்.ஜி.ஆர். என்ற அடைமொழிகளோடு ஜொலித்த விஜயகாந்த், கடந்த 2005-ம் ஆண்டு செப்டம்பர் 14-ல் மதுரையில் தன் கட்சியைத் தொடங்கினார். ஒட்டு மொத்த இந்தியாவே திரும்பிப் பார்க்கும் வகையில் லட்சக்கணக்கான மக்கள் மத்தியில் தேசிய முற்போக்கு திராவிட கழகம் எனும் கட்சியின் பெயரை அறிவித்தார் நடிகர் விஜயகாந்த்.

கருணாநிதி, ஜெயலலிதா ஆகிய இரு பெரும் ஜாம்பவான்கள் அரசியல் களத்தில் கோலோச்சிக் கொண்டிருந்த நேரத்தில் மிகவும் துணிச்சலாக தேசிய முற்போக்கு திராவிடர் கழகம் என்னும் புதிய கட்சியை துவக்கி அனைவரையும் திரும்பி பார்க்க வைத்தார். கட்சி தொடங்கி ஓராண்டிலே நடைபெற்ற சட்டமன்றத் தேர்தலில் 234 தொகுதிகளிலும் தனித்து போட்டியிட்டு 8.45 சதவிகித வாக்குகளை பெற்று இருபெரும் திராவிடக் கட்சிகளுக்கும் அதிர்ச்சி வைத்தியம் கொடுத்தது தே.மு.தி.க.

தேமுதிக முதன்முறையாக 234 தொகுதிகளில் தனித்துப்போட்டியிட்டபோது, விருத்தாசலம் தொகுதியில் போட்டியிட்ட விஜயகாந்த் மட்டும் வெற்றிபெற்று முதன்முறையாக சட்டமன்றத்துக்குள் நுழைந்தார். அடுத்து வந்த 2009 நாடாளுமன்றத் தேர்தலிலும் தே.மு.தி.க மீண்டும் தனித்தே களம் கண்டது. இந்த முறை 10.45 சதவிகித வாக்குகளை வாரி சுருட்டியது. பெரும்பாலான தொகுதிகளில் 50,000-த்துக்கும் அதிகமான வாக்குகளைப் பெற்றனர், தே.மு.தி.க வேட்பாளர்கள். பிறகு 2011-ம் ஆண்டு நடந்த சட்டமன்றத்தேர்தலில் அ.தி.மு.க.வுடன் கைகோர்த்த தே.மு.தி.க. 41 இடங்களில் போட்டியிட்டு, 29 இடங்களில் வெற்றி பெற்றது.

தே.மு.தி.க. தலைவர் விஜயகாந்த் எதிர்க்கட்சி தலைவராக அமர்ந்தார். அதன் பிறகு பாஜக, மக்கள் நல கூட்டணி, அமமுக என கூட்டணியை மாற்றி மாற்றி தேர்தலை சந்தித்த விஜயகாந்த் தொடர் தோல்விகளை சந்தித்ததார். ஒருபுறம் விஜயகாந்தின் அரசியல் இமேஜ் மெல்ல மெல்லச் சரிந்து வரத் தொடங்கியது. மறுபுறம் அவரின் உடல்நிலையும் மோசமானது.

இறுதியாக கடந்தாண்டு டிசம்பர் 28, 2023-ல் தனது 71 வயதில் கல்லீரல் பாதிப்பு காரணமாக விஜயகாந்த் மறைந்தார்.