"புரொடியூசருக்கு என் மியூசிக் மேல நம்பிக்கை இல்ல.. பாசத்த விட புகார் தான் நிறைய இருக்கு" டிஎஸ்பி ஆதங்கம்

சென்னை தாம்பரத்தில் நேற்று முன்தினம் சுகுமார் இயக்கத்தில் அல்லு அர்ஜூன் நடித்துள்ள புஷ்பா 2 படத்தின் இசை வெளியீட்டு விழா 'வைல்டு பயர்' எனும் பெயரில் நடத்தப்பட்டது. இந்த நிகழ்ச்சியில், அல்லு அர்ஜூன் தமிழில் பேசியது, ராஷ்மிகா மந்தனா தன் வருங்கால கணவர் குறித்து பேசியது என பல விஷயங்கள் பரபரப்பானது.

படத்திலிருந்து நீக்கப்பட்ட தேவி ஸ்ரீ பிரசாத்

இந்த நிலையில் தான், புஷ்பா 2 இசைவெளியீட்டு விழாவில் இசையமைப்பார் தேவி ஸ்ரீ பிரசாத் பேசியதும் பெரும் விவாதத்தை ஏற்படுத்தி உள்ளது. தேவி ஸ்ரீ பிரசாத், புஷ்பா 2 படத்தில் பின்னணி இசைப் பணிகளை மேற்கொள்ளாத நிலையில், தற்போது நடிகர் அஜித்தின் குட் பேட் அக்லி படத்தில் இருந்தும் நீக்கப்பட்டுள்ளார். இந்த இரண்டு படங்களையும் தயாரிப்பது மைத்ரி மூவிஸ் தயாரிப்பு நிறுவனம் தான்.

இசை வெளியீட்டு விழாவில் கோபமடைந்த டிஎஸ்பி

இதற்கிடையில், தேவி ஸ்ரீ பிரசாத் இந்த படத்திலிருந்து நீக்கப்பட்டதற்கு பல்வேறு காரணங்கள் கூறப்பட்டு வந்த நிவையில், இசை வெளியீட்டு விழாவில் தேவி ஸ்ரீ பிரசாத் பேசிய விஷயங்களின் மூலம் அவருக்கும் தயாரிப்பாளருக்கும் இடையே உள்ள பிரச்சனைகளால் தான் அவர் படத்திலிருந்து நீக்கப்பட்டார் எனத் தெரிய வருகிறது.

புகார்கள் அதிகம்

முன்னதாக இசை வெளியீட்டு விழாவில் பேசிய தேவி ஸ்ரீ பிரசாத், " புஷ்பா படத்தின் தயாரிப்பாளர் ரவிக்கு என் மீது அன்பு இருப்பது எனக்குத் தெரியும். ஆனால், அன்பை விட அவருக்கு என் மீது புகார்கள் அதிகம் இருக்கிறது. புஷ்பா படத்திற்கு நான் ஒரு பாடல் கூட நேரத்திற்கு கொடுக்கவில்லை. குறித்த நேரத்தில் பின்னணி இசையை வழங்கவில்லை. படத்தின் நிகழ்ச்சிகளுக்கு நான் சரியான நேரத்திற்கு வரவில்லை என புகார்கள் இருக்கிறது.

சரியான நேரத்திற்கு வர முயற்சி செய்யுங்கள்

ஆனால், இனி அதை சொல்லாதீர்கள். இனி நீங்கள் சரியான நேரத்திற்கு வர முயற்சி செய்யுங்கள். நான், சென்னையில் நடக்கும் இந்த நிகழ்ச்சிக்கு சரியான நேரத்திற்கு வந்துவிட்டேன். உங்களுக்கு முன் 25 நிமிடங்கள் முன்னதாகவே வந்துவிட்டேன். ஆனால், நீங்கள் சரியான நேரத்திற்கு நிகழ்ச்சிக்கு வராததால், என்னையும் நிகழ்ச்சி ஏற்பாட்டாளர்கள் உள்ளே அனுமதிக்கவில்லை. படக்குழுவினர் அனைவரும் ஒன்றாக வருமாறு புகைப்படங்கள் எடுக்க வேண்டும் என்பதற்காக நாங்கள் காத்திருந்தோம்.

கிரெடிட்களை கேட்டு பெற வேண்டும்

நான் எப்போதும் வெளிப்படையாக இருக்க விரும்புகிறேன். நீங்கள் என் மீது சுமத்திய புகார்களை எல்லாம் சரியான முறையில் கேட்டால் கிக் இருக்காது. எனக்கான தேவைகளை நான் தான் கேட்க வேண்டும். என்ன தான் தாயாரிப்பாளர் என் இசைக்கு பணம் கொடுத்தாலும், அதற்கான கிரெடிட்களை நம் தான் கேட்டாக வேண்டும். அதை வேறு யாரும் அவர்களாக நமக்கு தர மாட்டார்கள் எனக் கூறிய அவர், தான் மேடையில் அதிகம் பேச விரும்பவில்லை எனவும் கூறினார்.

லெஜண்ட் படத்திலும் பிரச்சனை

தேவி ஸ்ரீ பிரசாத்தின் இந்த பேச்சு, அவருக்கும் தயாரிப்பாளருக்கும் இருக்கும் பிரச்சனைகளை தெளிவாக எடுத்துக் காட்டுகிறது. முன்னதாக, லெஜண்ட் திரைப்படத்தின் இயக்குநர் போயபதி ஸ்ரீனுவுக்கும் தேவி ஸ்ரீ பிரசாத்திற்கும் சண்டை ஏற்பட்டு பொது வெளியில் தெரிந்த நிலையில், தற்போது மைத்ரி மூவிஸ் தயாரிப்பு நிறுவனத்துடன் தேவி ஸ்ரீ பிரசாத்திற்கு பிரச்சனை ஏற்பட்டுள்ளது குறிப்பிடத்தக்கது.