இந்தியாவின் முதல் பெண் சூப்பர் ஹீரோ படம்..பிவிசியூ சினிமாட்டிக் யுனிவெர்சில் உருவாகும் மகாகாளி

தெலுங்கு சினிமாவின் முன்னணி இயக்குநர்களின் ஒருவராக இருந்து வரும் பிரசாந்த் வர்மா, முதன் பெண் சூப்பர் ஹீரோ படம் குறித்த அறிவிப்பை வெளியிட்டுள்ளார். இந்த படத்துக்கு பிரசாந்த் திரைக்கதை எழுத பூஜா அபர்ணா கொல்லுரு இயக்குகிறார். இவர் கடந்த ஆண்டில் வெளியான அரசியல் நய்யாண்டி படமான மார்டீன் லூதர் கிங் படத்தை இயக்கியுள்ளார்.

மகாகாளி கான்செப்ட் விடியோ

இந்த படம் குறித்து எக்ஸ் பக்கத்தில் அறிவித்திருக்கும் பிரசாந்த் வர்மா தனது பதிவில், "ஆர்கேடி ஸ்டுடியோஸ் நிறுவனத்துடன் இணைந்து பிரபஞ்சத்துக்கு சக்திவாய்ந்த புதிய சக்தியை கொண்டு வர இருக்கிறோம். #மகாகாளியின் எழுச்சி உங்கள் முன்னிலையில் வழங்குகிறோம்.

தீமையை மிகக் கடுமையாக அழிப்பவளான காளி தேவியின் உருவகமாக படம் உருவாக இருக்கிறது. இந்த நவராத்திரியில், ஒரு சூப்பர் ஹீரோ எப்படி இருக்க முடியும் என்பதை காட்ட உள்ளோம்." என குறிப்பிட்டுள்ளார்.

பிவிசியூ என்று அழைக்கப்படும் பிரசாந்த் வர்மா சினிமாட்டிக் யுனிவர்சில் அங்கம் வகிக்கும் இந்த படத்தின் கான்செப்ட் விடியோவும் பகிரப்பட்டுள்ளது. இதில் படத்தின் கேரக்டர்களும் அறிமுகம் செய்யப்பட்டுள்ளது. இந்த படம் பிவிசியூ யுனிவர்சில் முதல் சூப்பர் பெண் சூப்பர் ஹீரோ படமாக உருவாகிறது. மேற்கு வங்கத்தை பின்னணியாக கொண்டு உருவாக இருக்கும் படத்தின் மற்ற கதாபாத்திரங்கள் குறித்த தகவல் வெளியிடப்படவில்லை.

மகாகாளி படத்தின் கருப்பொருள்

இந்த படம் பற்றி படக்குழுவினர்கள் பகிர்ந்துள்ள செய்திக்குறிப்பில், மகாகாளி படம் 'சக்திவாய்ந்த மற்றும் சமூகத்துக்கு பொருத்தமான கருத்துகளை கூறும் விதமாக இருக்கும் என்று கூறப்படுகிறது. "இது மரியாதைக்குரிய காளி தேவியின் தைரியமான மற்றும் புத்துணர்ச்சியூட்டும் சித்தரிப்பைக் கொண்டிருக்கும். இந்திய சினிமாவில் ஒரே மாதிரியானவற்றை உடைத்து சினிமாக்களின் தரத்தை மறுவரையறை செய்யும்." என குறிப்பிட்டுள்ளனர்.

அத்துடன், "காளி தேவியின் கடுமையான மற்றும் இரக்க குணத்தால் ஈர்க்கப்பட்ட நம்பிக்கையின் காவியப் பயணமாக படம் இருக்கும். இந்தத் திரைப்படம் அவரது தெய்வீக சக்தியை மட்டுமல்ல, பாகுபாடு, உள் வலிமை மற்றும் மீட்டெடுப்பு போன்ற கருப்பொருள்களையும் தொடும் விதமாக இருக்கும்" என குறிப்பிடப்பட்டுள்ளது.

இந்த படம் ஐமேக்ஸ் 3டி தொழில்நுட்பத்தில் உருவாகும் எனவும் தெரிவிக்கப்பட்டுள்ளது.

பிவிசியூ யுனிவர்ஸ்

தெலுங்கில் சூப்பர் ஹிட்டான ஆவ், கல்கி, ஸோம்பி ரெட்டி போன்ற படங்களை இயக்கியவர் பிரசாந்த் வர்மா. இந்த ஆண்டு தொடக்கத்தில் இவர் இயக்கிய ஹனுமன் என்ற படம் ரசிகர்களை பெரிதும் கவர்ந்தது. ஹனுமன் கடவுளின் வாழ்க்கை மையப்படுத்திய கதையாக இருந்து வரும் இதன் இரண்டாம் பாகம் ஜெய் ஹனுமன் என்ற பெயரில் வெளியாகும் என தெரிவிக்கப்பட்டது.

இந்த படம் பிரசாந்த் வர்மாவின் பிவிசியூ யுனிவர்சில் இடம்பிடித்திருக்கும் என கூறப்பட்ட நிலையில், தற்போது இதே யுனிவர்சில் மகாகாளி என்ற பெண் சூப்பர் ஹீரோ படமும் உருவாகவுள்ளது.

பிவிசியூ யுனிவர்சில் ஆதிரா, தேவகி நந்தனா வாசுதேவா ஆகிய டைட்டில் படங்களும் உருவாக இருக்கிறது. இந்த படங்கள் குறித்த அதிகாரப்பூர்வ அறிவிப்பு வெளியிடப்படவில்லை.

அதேபோல் பிரசாந்த வர்மா இயக்கத்தில் பாலிவுட்டில் சூப்பர் ஹிட்டான குயின் படத்தின் தெலுங்கு ரீமேக் தட் இஸ் மகாலட்சுமி படம் தமன்னா நடிப்பில் உருவாகியிருக்கும் நிலையில், இன்னும் ரிலீசாகமல் உள்ளது.