Radhika Apte: காந்தம்போல் ஈர்க்கும் கண்கள்.. கபாலி ஹீரோயின் ராதிகா ஆப்தேவுக்கு தமிழ்நாட்டுக்கும் உள்ள பந்தம் தெரியுமா?

Radhika Apte: நடிகை ராதிகா ஆப்தே, இந்தி, பெங்காலி, தமிழ், தெலுங்கு மற்றும் மராத்தி ஆகிய மொழிகளில் நடித்த பிரபல நடிகை ஆவார். நடிகை ராதிகா ஆப்தே, வா லைஃப் ஹோ டூ ஏசி(2005) என்னும் இந்தி திரைப்படத்தில் நடித்து அறிமுகமானார். அதன்பின், 2009ஆம் ஆண்டு பெங்காலி திரைப்படமான ‘ஆண்டஹீன்’ திரைப்படத்தில் நடித்தார். பின்னர், 2015ஆம் ஆண்டு, பாடல்பூர், ஹண்டர், மஞ்சி - தி மவுண்ட்டைன் மேன் ஆகிய படங்களில் முக்கிய கதாபாத்திரங்களில் நடித்தார். அதன்பின் 2016ஆம் ஆண்டு, போபியா, பார்செட் ஆகியப் படங்களில் கதாநாயகியாக நடித்துள்ளார்.

அதன்பின், நெட்பிளிக்ஸ் தயாரிப்பில் உருவான லஸ்ட் ஸ்டோரீஸ், ஸ்கேரெட் கேம்ஸ், கெளல் ஆகியப் படங்களில் நடித்தார். பின்னர், ராத் ஏகேலி ஹை, மோனிகா, ஓ மை டார்லிங் மற்றும் ஏ கால் டூ ஸ்பை, ஆகியப்படங்களில் நடித்தார்.

மேலும் கபாலி என்னும் தமிழ்ப்படத்தில் உச்ச நடிகர் ரஜினியுடனும், பேட் மேன் படத்தில் அக்சய் குமாருடனுடனும், பின், அந்தாதூன் என்னும் காமெடி படத்திலும் ராதிகா ஆப்தே நடித்திருந்தார். இப்படங்கள் அனைத்தும் ஹிட்டாகி ராதிகா ஆப்தேவுக்கு நல்ல பெயரைப் பெற்றுத்தந்தன.

ராதிகா ஆப்தேவின் பூர்வீகம் என்ன?:

நடிகை ராதிகா ஆப்தே, 1985ஆம் ஆண்டு, செப்டம்பர் 7ஆம் தேதி, தமிழ்நாட்டின் வேலூரில் மராத்தி பிராமண குடும்பத்தில் பிறந்தார். ராதிகா ஆப்தேவின் தந்தை சாருதத் ஆப்தே மற்றும் அவரது தாயார் இருவருமே ராதிகா பிறந்தபோது, வேலூரில் உள்ள கிறிஸ்டியன் மருத்துவக்கல்லூரியில் படித்துக்கொண்டும் பணியாற்றிக்கொண்டும் இருந்தனர்.

அதன்பின், நடிகை ராதிகா ஆப்தேவின் பெற்றோர், தனது சொந்த மாநிலமான மகாராஷ்டிராவிற்குச் சென்று, புனேவில் மருத்துவமனையை வைத்து சேவையாற்றத் தொடங்கினர்.

நடிகை ராதிகா ஆப்தேவும் புனேவிலேயே வளர்ந்தார். அங்கு இருக்கும் ஃபெர்குஷன் கல்லூரியில் பொருளாதாரத்தையும் கணிதத்தையும் கற்றார்.

புனேவில் இருக்கும்போது நடிகை ராதிகா ஆப்தே, ரோஹிணி பாத்தே என்பவரிடம் 8 ஆண்டுகளாக கதக் நடனம் ஆடக் கற்றுக் கொண்டார். தன் பதின்ம வயது முதலே நாடகத்தில் ஆர்வம்கொண்டிருந்த ராதிகா ஆப்தே, மும்பை சென்று மாதத்திற்கு ரூ.8ஆயிரம் சம்பளத்தில், மேடை நாடக நடிகையாக தன் வாழ்க்கையைத்தொடங்கினார். அதில் பெரியளவில் வளர்ச்சி ராதிகாவுக்கு கிடைக்கவில்லை.

அப்போது ஒரு நாள் புனே திரும்பிய நடிகை ராதிகா ஆப்தே, லண்டன் சென்று டிரினிட்டி இசை மற்றும் நடனக் கல்லூரியில் சேர்ந்து ஒரு வருடம் நடனம் கற்க ஆசைப்பட்டார். பின், லண்டன் சென்று, அதே கல்லூரியில் படித்து, ஒரு சிறந்த தேர்ந்த நடனம் ஆடுபவராக ராதிகா ஆப்தே மாறினார். லண்டன் வாழ்க்கை அவருக்கு நிறைய கற்றுக்கொடுத்தது. அங்கு அவர் தனது வாழ்க்கைத் துணை பெனடிக்ட் என்னும் ஆங்கிலேயரை முதன்முதலில் சந்தித்தார்.

அதன்பின், இருவரும் லிவிங்டூ கெதர் வாழ்க்கையில் வாழ்ந்துவிட்டு, பின், திருமணம் செய்து கொண்டனர். ராதிகா ஆப்தே, பெண்களுக்கு எதிரானப் பாலியல் புகார்களை வெளியில் சொல்பவர்களை ஆதரித்தார்.

தமிழில் நடிகை ராதிகா ஆப்தேவின் படங்கள்:

இந்தியில் பல படங்களில் நடித்தாலும் தமிழில் நடிகை ராதிகா ஆப்தே தோனி படத்தில் முதன்முறையாக நடித்தார். பின், எம். ராஜேஷ் இயக்கத்தில் நடிகர் கார்த்தியின் ’ஆல் இன் ஆல் அழகுராஜா’ திரைப்படத்தில் மீனாட்சி என்னும் கதாபாத்திரத்தில் நடித்து இருந்தார். பின் வெற்றிச்செல்வன் படத்தில் நடித்திருந்தார், நடிகை ராதிகா ஆப்தே. இந்நிலையில் 2015ஆம் ஆண்டு, தமிழின் உச்ச நடிகர் ரஜினியின் ஹீரோயினாக குமுதவல்லி என்னும் கதாபாத்திரத்தில் ’கபாலி’ படத்தில் நடித்தார், ராதிகா ஆப்தே. இப்படம் 2016ஆம் ஆண்டு ரிலீஸானபோது, ராதிகா ஆப்தேவை தமிழ்நாட்டில் பலருக்கும் தெரிந்து இருந்தது. பின் சித்திரம்பேசுதடி 2 படத்திலும், மேரிகிறிஸ்துமஸ் என்னும் விஜய்சேதுபதியின் படத்திலும் நடித்து இருந்தார்.