8 Years of Kabali: காதல் காட்சிகளில் கிளாஸ்.. ஆக்ஷனில் மாஸ்.. மாறுபட்ட சூப்பர் ஸ்டார் படம் கபாலி வெளியாகி 8 ஆண்டுகள்

உலகநாயகன் கமல்ஹாசனுக்கு எப்படி நாயகன், வேலுநாயக்கர் கதாபாத்திரமோ, அதேபோல் டார்க் ஷேடில் பல நன்மைகளை செய்யும் கபாலியாக தோன்றியிருப்பார் ரஜினிகாந்த். வழக்கமான ரஜினி படங்களில் இரு்ககும் மாஸ் மசாலா அம்சங்கள் குறைவாகவும் கதைக்கு முக்கியத்துவம் கொடுத்தும் இந்த படம் உருவாக்கப்பட்டிருந்தது.

பழிவாங்குதல் கதை

வில்லன்களை பழிவாங்குதல், காணாமல் போன மனைவியை தேடுதல் என எமோஷன்ஸ் நிறைவாக இருந்த இந்த படம் ரஜினியின் ஆரம்ப கால படங்களை நீண்ட நாள்களுக்கு பிறகு நினைவூட்டும் விதமாக அமைந்திருந்தது. இந்த படத்துக்காக தனது ரியல் கெட்டப்பான வெள்ளை தாடி, மீசையுடன் ரஜினிகாந்த் நடித்திருந்தார். அத்துடன் படத்தில் மூன்று விதமான கெட்டப்புகளில் தோன்றியிருப்பார்.

லிங்கா படத்தின் தோல்விக்கு பிறகு ரஜினிகாந்த் முற்றிலும் புதிய அணியுடன் கூட்டணி அமைத்தார். அந்த வகையில் ரஜினி சினிமாவுக்கு வந்தபோது பிறந்திடாத பா. ரஞ்சித்தை இயக்கத்தில் நடித்த ஒப்பந்தமானார். அதேபோல் கபாலி படத்தில் ரஜினி, நாசர் தவிர மற்ற நடிகர்கள் 90 சதவீதத்துக்கும் மேற்பட்டோர் ரஜினியுடன் முதல் முறையாக நடிக்கும் நடிகர்களாகவே இருந்தனர்.

கதாநாயாகியாக அப்போது தோனி படம் மூலம் புகழ் பெற்ற ராதிகா ஆப்தேவை நடிக்க வைத்திருப்பார்கள். கபாலி படத்தில் ரஜினியுடனான காதல் காட்சிகள் அனைத்தும் ரசிகர்களை வெகுவாக கவர்ந்தன.

படத்தில் தொழில்நுட்ப கலைஞர்களும் இதேபோல் பலரும் ரஜினியுடன் முதல் படத்தில் பணியாற்றினர். படத்தின் பாடல்களை கபிலன், விவேக், உமா தேவி, அருண்ராஜா காமராஜ் ஆகியோர் எழுத சந்தோஷ் நாரயணன் இசையமைத்திருந்தார். அனைத்து பாடல்களும் சூப்பர் ஹிட்டான நிலையில் நெருப்புடா பாடல், தற்போது இருக்கும் ரீல்ஸ் போன்றவை பிரபலமாவதற்கு முன்னரே பல்வேறு நாடுகளை சேர்ந்த ரசிகர்களால் டான்ஸ் ஆடப்பட்டு விடியோக்களாக பகிரப்பட்டு டிரெண்ட் ஆக்கப்பட்டது.

ரஜினியின் அற்புதமான நடிப்பு, ரஜினியை இதுவரை பார்த்திராத வகையில் வித்தியாசமான கதாபாத்திரத்துடன், கதைக்கு முக்கியத்துவம் அளித்து கபாலி படத்தை உருவாக்கியிருந்தார் பா. ரஞ்சித. இந்த படத்தின் பஞ்ச் வசனங்களில் ஒன்றாக மகிழ்ச்சி என ரஜினி கூறுவது அமைந்திருக்கும். அந்த வகையில் ரசிகர்களை மகிழ்ச்சிபடுத்திய படமாகவே கபாலி இருந்தது. உலக அளவில் ஃபேமஸ் ஆன இந்த படம் வசூலிலும் ரூ. 500 கோடி வரை நெருங்கியது. அத்துடன் ஆனந்த விகடன், பிலிம்பேர் விருது. எடிசன் விருது போன்ற விருதுகளையும் வென்றது.

வெகுஜன ரசிகர்களை கவரும் விதமாக மாஸ் மசாலா அம்சங்கள் கொண்ட திரைப்படங்களை நடித்து வந்த ரஜினியிடம் இருக்கும் மகா நடிகனை நீண்ட நாள்களுக்கு பிறகு வெளிக்காட்டிய கபாலி படம் வெளியாகி இன்றுடன் 8 ஆண்டுகள் ஆகிறது.