மனசுக்கு ரொம்ப கஷ்டமா இருக்கு.. எல்லாம் நெருக்கமா இருக்கணும்.. மேடையிலேயே கூறிய நடிகை.. என்ன நடந்தது?

சன் டிவியில் ஒளிபரப்பாகி பலராலும் பாராட்டப்பட்ட த்ரில்லர் தொடர் மர்ம தேசம். இந்த தொடரின் இயக்குநர் நாகா தற்போது நடிகை சாய் தன்ஷிகாவை வைத்து ஐந்தாம் வேதம் எனும் வெப் தொடரை இயக்கியுள்ளார். புராணக் கதைகளை மையமாக வைத்து எடுக்கப்பட்டுள்ள இந்த கதைக்களத்தில், சந்தோஷ் பிரதாப், விவேக் ராஜகோபால், ஒய்.ஜி.மகேந்திரன், ராம்ஜி, தேவதர்ஷினி, பொன்வண்ணன் என பல நடிகர்கள் நடித்துள்ளனர்.

ஐந்தாம் வேதம்

கோயில் பூசாரி ஒருவரிடம் பெட்டி ஒன்றை கொடுக்க முற்படும் சாய் தன்ஷிகாவிற்கு நிகழும் பிரச்சனைகளே ஐந்தாம் வேதம் வெப் சீரிஸின் கதை. மர்ம தேசம் தொடரிலே பல தொழில்நுட்ப யுக்திகளைக் கையாண்ட நாகா, இந்த வெப் தொடரில் ஏஐ தொழில்நுட்பத்தையும் பயன்படுத்தி உள்ளார்.

அக்டோபர் 25ம் தேதி வெளியாகும் இந்த வெப் தொடரின் ட்ரெயிலர் சமீபத்தில் வெளியான நிலையில், ஐந்தாம் வேதம் வெப் சீரிஸின் ப்ரொமோஷன் நிகழ்ச்சி நடைபெற்றது.

கஷ்டமாக இருந்தது

இதில் பங்கேற்ற நடிகை சாய் தன்ஷிகா, ஐந்தாம் வேதம் தொடரில் நடத்தது தனக்கு மிகவும் சந்தோஷத்தை கொடுத்ததாக கூறினார். நான் எங்கே சென்றாலும் என் ரசிகர்கள் ஏன் தொடர்ந்து தமிழ் படங்களில் நடிக்கவில்லை தமிழை மறந்துவிட்டீர்களா என கேள்வி எழுப்பி வருகின்றனர். அதனை கேட்கும் போதெல்லாம் மிகவும் கஷ்டமாக இருக்கும். ஆனால், தமிழில் ஒரு படத்திற்கு ஒப்பந்தம் செய்தால் அது என் மனதிற்கு மிகவும் நெருக்கமாக இருக்க வேண்டும் என விரும்பினேன். அந்த எண்ணம் தான் என் மனதில் ஓடிக் கொண்டிருந்தது.

புராணமும் அறிவியும் கலந்த கதை

நான் அப்படி நல்ல கதைக்காக காத்திருந்த சமயத்தில் தான் ஐந்தாம் வேதம் குழுவினரை சந்தித்தேன், அற்புதமான இந்த டீமுடன் இணைந்து ஒரு நல்ல படைப்பை கொடுத்துள்ளோம் என நம்புகிறோம். நம் அனைவருக்கும் 4 வேதங்கள் இருப்பது தெரியும் ஆனால், 5வதாக வேதம் என ஒன்று இருந்தால் எப்படி இருக்கும் என்பதை மையமாக வைத்தே இந்தக் கதை எடுக்கப்பட்டுள்ளது.

புராணத்தையும் அறிவியலையும் கலந்து உருவாக்கியுள்ள இந்த தொடர் 8 எபிசோடுகளாக வரவுள்ளது. இது நிச்சயம் மக்களுக்கு பிடித்த வகையில் அமையும் என்றார்.

ஊக்கப்படுத்தும் இயக்குநர்

பின் தொடர்ந்து பேசிய தன்ஷிகா, அனைத்து கால கட்டத்திலும் நம்மை ஊக்கப்படுத்தவும் வழிகாட்டவும் ஒருவர் வேண்டும். எனக்கு அப்படி நிறைய இயக்குனர்கள் கிடைத்திருக்கிரார்கள். முன்பு எனக்கு ஊக்கமளிக்க ஜனநாதன் சார் இருந்தார், இப்போது நாகா சார் இருக்கிறார். இந்த தொடரில் புராண கதையும் இருக்கிறது, நவீன விஞ்ஞான வளர்ச்சியான ஏஐ தொழில்நுட்பம் பற்றியும் விளக்கமளிக்கப் பட்டிருக்கிறது. நிச்சயம் இது எல்லோருக்கும் பிடித்த தொடராக அமையும். எங்களின் நீண்ட நாள் உழைப்பாலும், நிறைய கஷ்டங்களாலும் உருவான தொடர் இது. எங்கள் உழைப்பு நிச்சயம் பேசப்படும் எனக் கூறினார்.

இயக்குநர் நாகா

ஐந்தாம் வேதம் தொடரை இயக்கும் நாகா, ஏற்கனவே மக்கள் மத்தியில் செல்வாக்கு மிக்கவர். அவரது ஒவ்வொரு படைப்பும் மிக நுணுக்கமானவை. இவர், மர்ம தேசம், ருத்ரவீணை, சிதம்பர ரகசியம் உள்ளிட்ட தொடர்களையும் அனந்தபுரத்து வீடு என்ற படத்தினையும் இயக்கியுள்ளார். இதன் மூலம் அவர் ஏராளமான ரசிகர்களைக் கொண்டுள்ளார்.

அந்த வகையில் இவரது ஐந்தாம் வேதம் தொடர் எப்படி இருக்கிறது என்பதா பொறுத்திருந்து பார்ப்போம், இந்தத் தொடர் வரும் 25ம் தேதி ஜீ 5 தளத்தில் வெளியாகிறது குறிப்பிடத்தக்கது.