பாலய்யா நிகழ்ச்சியில் சூர்யா.. ஹைதராபாத்தில் திரண்ட ரசிகர்களால் பரபரப்பு.. ஷாக் ஆன டோலிவுட்

தெலுங்கு நடிகர் பாலகிருஷ்ணா தொகுத்து வழங்கும் அன்ஸ்டாப்பளிள் வித் என்.பி.கே. டாக் ஷோவில் (Unstoppable with NBK Season 4) நடிகர் சூர்யாவும் பாலிவுட் நடிகர் பாபி தியோலும் கலந்துகொண்டுள்ளனர். 

பிரபல தெலுங்கு நடிகர் பாலய்யா எனப்படும் நந்தமுரி பாலகிருஷ்ணா நடத்தும் ‘அன்ஸ்டாப்பளிள் வித் என்.பி.கே' என்னும் டாக் ஷோவின் நான்காவது சீசன் நாளை முதல் தொடங்குகிறது. இந்த நிகழ்ச்சியின் முதல் எபிசோடுக்கு, ஆந்திர முதலமைச்சர் சந்திர பாபு நாயுடு சிறப்பு விருந்தினராக கலந்துகொள்கிறார். இதன் முதல் எபிசோடு அக்டோபர் 25ஆம் தேதி, இரவு 8:30 மணிக்கு ஆஹா ஓடிடி தளத்தில் வெளியாகிறது. 

இந்நிலையில் ஆந்திர முதலமைச்சர் சந்திரபாபு நாயுடுவின் எபிசோடின் ப்ரோமோக்கள் வைரலாகி வருகின்றன.இந்நிலையில் ஆஹா ஓடிடி மற்றொரு சுவாரஸ்யமான தகவலை வெளியிட்டுள்ளது. 

பாலகிருஷ்ணாவை சந்தித்த சூர்யா:

அதில் அன்ஸ்டாப்பபிள் வித் என்பிகே(Unstoppable with NBK Season 4) நிகழ்வில், நடிகர் சூர்யா விருந்தினராக கலந்துகொண்டுள்ளார். சூர்யா பங்கு எடுத்த எபிசோடின் படப்பிடிப்பு வியாழக்கிழமையான இன்று நடந்தது.

இந்த டாக் ஷோவின் படப்பிடிப்புக்காக ஹைதராபாத்தில் உள்ள அன்னபூர்ணா ஸ்டுடியோவுக்கு நடிகர் சூர்யாவும், ’அனிமல்’ படத்தின் வில்லனாக நடித்து பிரபலமான பாலிவுட்டின் மூத்த ஹீரோ பாபி தியோலும் கலந்துகொண்டனர். இதுதொடர்பான புகைப்படங்கள் சமூக ஊடகங்களில் வெளியாகி வைரலாகி வருகின்றன. அப்போது சூர்யாவின் தெலுங்கு ரசிகர்கள் அவரைச் சூழ்ந்து ஆர்ப்பரித்தனர். இது டோலிவுட் நடிகர்கள் இடையே சலசலப்பினை ஏற்படுத்தியுள்ளது. 

அன்ஸ்டாப்பளிள் வித் என்.பி.கே டாக் ஷோவுக்காக உருவாக்கப்பட்டுள்ள இந்த செட் அன்னபூர்ணா ஸ்டுடியோவில் பெரும் பொருட்செலவில் பிரமாண்டமாக தயாரிக்கப்பட்டுள்ளதாக கூறப்படுகிறது.

கங்குவா புரொமோஷன் பணியின் ஒரு பகுதி:

கங்குவா படத்தின் தெலுங்கு புரொமோஷனின் ஒரு பகுதியாக, சூர்யா, நந்தமுரி பாலகிருஷ்ணா தொகுத்து வழங்கும் அன்ஸ்டாப்பபிள் வித் என்.பி.கே நிகழ்ச்சியில் கலந்து கொண்டார். அவருடன், நடிகர் சூர்யா, ’கங்குவா’ திரைப்படத்தின் விவரங்களையும், தனது வாழ்க்கைத் தொடர்பான சுவாரஸ்யமான ரகசியங்களையும் பாலகிருஷ்ணாவுடன் பகிர்ந்துகொள்கிறார்.

ஜோதிகாவுடனான காதல் கதை குறித்து சூர்யாவிடம் பாலகிருஷ்ணா பல கேள்விகளைக் கேட்டுள்ளதாகக் கூறப்படுகிறது. இந்த தொடரில் தெலுங்கு மார்க்கெட் குறித்தும், தமிழ் ஹீரோக்கள் இடையேயான போட்டி குறித்தும் சூர்யா பல சுவாரஸ்யமான விஷயங்களை சொல்ல உள்ளதாகத் தகவல்கள் வெளியாகியுள்ளன.

அனுபவம் பகிரும் பாபி தியோல்:

இந்நிகழ்ச்சியில் பாபி தியோல், அனிமல் படத்துக்குப் பிறகு தனது வாழ்க்கையில் ஏற்பட்ட மாற்றம் குறித்து பாலகிருஷ்ணாவிடம் சொல்லவுள்ளதாகக் கூறப்படுகிறது. மேலும் அவர் டோலிவுட்டில் நடிக்கும் படங்கள் குறித்து பேசப்போவதாக கூறப்படுகிறது.

கங்குவா பட்ஜெட் தெரியுமா?:

சூர்யா நடித்த கங்குவா திரைப்படம் நவம்பர் 14 ஆம் தேதி திரைக்கு வர உள்ளது. சுமார் 350 கோடி ரூபாய் பட்ஜெட்டில் உருவாககியிருக்கும் இப்படம் தமிழ், தெலுங்கு உட்பட 35-க்கும் மேற்பட்ட மொழிகளில் வெளியாகிறது. இப்படத்தில் பாபி தியோல் வில்லனாக நடிக்கிறார். கல்கிக்கு பிறகு, திஷா பதானி இப்படத்தில் கதாநாயகியாக நடித்திருக்கிறார். சிறுத்தை சிவா இயக்கத்தில் உருவாகி வரும் 'கங்குவா' திரைப்படம் இந்தியாவின் மிகப்பெரிய பட்ஜெட் படங்களில் ஒன்றாக உருவாகியுள்ளது.

சூர்யாவின் அடுத்த படத்தில் பூஜா ஹெக்டே:

'கங்குவா' திரைப்படத்தை அடுத்து கார்த்திக் சுப்புராஜ் இயக்கத்தில் சூர்யா நடித்து வருகிறார். காதல் ஆக்ஷன் கதையாக உருவாகி வரும் இப்படத்தில் பூஜா ஹெக்டே கதாநாயகியாக நடிக்கிறார்.

பிரபலமான ஷோ:

நடிகர் பாலய்யாவின் இந்த டாக் ஷோவில் இதுவரை மூன்று சீசன்கள் நிறைவடைந்துள்ளன. இது தெலுங்கில் வெற்றிகரமான டாக் ஷோ என்ற அசைக்க முடியாத சாதனையை உருவாக்கியுள்ளது. இந்த டாக் ஷோ மூலம் தொகுப்பாளராக வலம் வருகிறார், பாலகிருஷ்ணா. இதுவரை பவன் கல்யாண், மகேஷ் பாபு, பிரபாஸ், ரன்பீர் கபூர் மற்றும் பல நட்சத்திர ஹீரோக்கள் விருந்தினர்களாக வந்துள்ளனர்.