WPL 2024: நான்கு தொடர் தோல்வி! பரிதாப நிலையில் குஜராத் ஜெயிண்ட்ஸ்
Mar 03, 2024, 11:31 PM IST
Share
இந்த சீசனில் இதுவரை விளையாடிய அனைத்து அணிகளுக்கும் எதிராக தோல்வியை தழுவியிருக்கும் குஜராத் ஜெயிண்ட்ஸ் அணி முதல் வெற்றிக்கான தேடலை தொடர்ந்து வருகிறது
மகளிர் ப்ரீமியர் லீக் தொடரின் 10வது போட்டி டெல்லி கேபிடல்ஸ் மகளிர் - குஜராத் ஜெயிண்ட்ஸ் மகளிர் அணிகளுக்கு இடையே பெங்களுருவில் நடைபெற்றது. ஹாட்ரிக் தோல்வியை தழுவிய குஜராத் ஜெயிண்ட்ஸ் முதல் வெற்றியை பெற்றாக வேண்டிய நிர்பந்தத்தில் களமிறங்கியது. இதையடுத்து டாஸ் வென்ற குஜராத் ஜெயிண்ட்ஸ் முதலில் பவுலிங்கை தேர்வு செய்தது.
டெல்லி அதிரடி பேட்டிங்
முதலில் பேட் செய்த டெல்லி அணி 20 ஓவரில் 8 விக்கெட் இழப்புக்கு 163 ரன்கள் எடுத்தது. ஓபனரும், அணியின் கேப்டனுமான மெக் லேனிங் நிதானமும், தேவைப்படும் போது அதிரடியும் காட்டி விளையாடினார். அரைசதமடித்த அவர் 55 ரன்கள் எடுத்தார்.
இவருக்கு அடுத்தபடியாக ஆலிஸ் கேப்சி 27, அனாபெல் சதர்லாந்து 20 ரன்கள் எடுத்தனர். இந்திய பேட்டர்கள் ஷெபாலி வர்மா, ஜேமிமா ரோட்ரிக்ஸ் பெரிய ஸ்கோர் அடிக்காமல் ஏமாற்றினர்.
குஜராத் பவுலர்களில் மேக்னா சிங் 4 விக்கெட்டுகளை கைப்பற்றினார். ஆஷ்லே கார்ட்னர் 2, மண்ணத் காஷ்யப், தனுஜா கன்வார் ஆகியோர் தலா ஒரு விக்கெட்டுகளை வீழ்த்தினர்.
குஜராத்துக்கு நான்காவது தோல்வி
சவாலான இலக்கை விரட்டிய குஜராத் பேட்டர்கள் இந்த போட்டியிலும் சொதப்பலான ஆட்டத்தை வெளிப்படுத்தினர். பவுலிங்கில் கலக்கிய ஆஷ்லே கார்ட்னர், பேட்டிங்கிலும் சிறப்பாக செயல்பட்டு 40 ரன்கள் எடுத்தார்.
மற்ற பேட்டர்கள் 20 ரன்கள் கூட எடுக்காமல் மோசமான ஆட்டத்தை வெளிப்படுத்தினர். இதனால் 20 ஓவரில் 8 விக்கெட் இழப்புக்கு 138 ரன்கள் எடுத்த குஜராத் 25 ரன்கள் வித்தியாசத்தில் தோல்வியை தழுவியது.
டெல்லி கேபிடல்ஸ் மகளிர் பவுலர்களில் ஜெஸ் ஜோனாசென், ராதா யாதவ் ஆகியோர் தலா 3 விக்கெட்டுகளை கைப்பற்றினர். அருந்ததி ரெட்டி, ஷிகா பாண்டே தலா ஒரு விக்கெட்டை எடுத்தனர்.
குஜராத் அணி விளையாடிய நான்கு போட்டிகளிலும் தோல்வியை தழுவி இந்த சீசனில் இதுவரை வெற்றியை பதிவு செய்யாத அணியாக உள்ளது. அத்துடன் மற்ற அனைத்து அணிகளுக்கும் எதிராக தோல்வியை பெற்றுள்ளது.
எனவே இனி வரும் அனைத்து போட்டிகளிலும் வெற்று பெறுவதோடு, நல்ல ரன் ரேட் பெற்றால் மட்டுமே குஜராத் ஜெயிண்ட்ஸ் அரையிறுதி வாய்ப்பை பெற முடியும்
நாளை நடைபெற இருக்கும் போட்டியில் ஆர்சிபி மகளிர் - யுபி வாரியர்ஸ் அணிகள் மோதவுள்ளன. இந்திய நேரப்படி இந்த போட்டி 7.30 மணிக்கு தொடங்குகிறது.
சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:
Google News: https://bit.ly/3onGqm9