World Cup 2023: என்னா அடி! டி20 போட்டி அதிரடி காட்டிய ஆஸ்திரேலியா - முதல் உலகக் கோப்பை போட்டியில் சதமடித்த ஹெட்

உலகக் கோப்பை தொடரின் 27வது போட்டி ஆஸ்திரேலியா - நியூசிலாந்து அணிகளுக்கு இடையே தரம்சாலாவில் நடைபெற்று வருகிறது. உலகக் கோப்பை 2023 தொடரில் மிகவும் எதிர்பார்ப்பை ஏற்படுத்திய போட்டிகளில் ஒன்றாக இது அமைந்திருக்கும் இதில் டாஸ் வென்ற நியூசிலாந்து கேப்டன் டாம் லாதம் பவுலிங்கை தேர்வு செய்துள்ளார்.

இதையடுத்து பேட்டிங்கில் களமிறங்கிய ஆஸ்திரேலியா அணி ஆட்டத்தின் முதல் ஓவரில் இருந்தே அதிரடி காட்ட தொடங்கியது. இன்றைய போட்டியில் ஓபனர்களாக டேவிட் வார்னர் - ட்ராவிஸ் ஹெட் ஆகியோர் களமிறங்கியுள்ளனர். இருவரும் இடது பேட்ஸ்மேன்களாக இருந்து வரும் நிலையில் நியூசிலாந்து பவுலர்களின் பந்து வீச்சை பவுண்டரி, சிக்ஸர்கள் என பறக்கவிட்டு வானவேடிக்கை காட்டினர்.

டி20 கிரிக்கெட் என நினைத்தார்களோ என்னவோ, அனைத்து பந்துகளிலும் அடித்து ஆடுவதிலேயே வார்னர், ஹெட் ஆகியோர் குறியாக இருந்தனர். ஆட்டத்தின் 4.1 ஒவரில் 50 ரன்கள் கடந்த ஆஸ்திரேலியா, 8.5 ஓவரில் 100 ரன்கள் கடந்தது. இது உலகக் கோப்பை போட்டிகளில் ஒரு அணியின் இரண்டாவது அதிவேக 100 ரன்களாக அமைந்தது.

ட்ராவிஸ் ஹெட் 25 பந்துகளில் அரைசதமடித்து உலகக் கோப்பை போட்டியில் அதிவேக அரைசதமடித்த ஆஸ்திரேலியா பேட்ஸ்மேன் என்ற சாதனை புரிந்தார். பிரதான பவர்ப்ளே முடிவில் விக்கெட் இழப்பின்றி ஆஸ்திரேலியா 124 ரன்கள் எடுத்தது. இதன் மூலம் உலகக் கோப்பை 2023 தொடரில் பவர்ப்ளேயில் அதிக ரன்கள் இந்த போட்டியில் தான் அடிக்கப்பட்டுள்ளது.

தொடர்ந்து அதிரடியை நிறுத்ததாக வார்னர். ஹெட் ஆகியோர் ரன் குவிப்பில் ஈடுபட்டு வந்தனர். ஆட்டத்தின் 19.1 ஓவரில் முதல் திருப்புமுனையை நியூசிலாந்து பவுலர் பிளிப்ஸ் தந்தார்.

65 பந்துகளுக்கு 81 ரன்கள் எடுத்திருந்த வார்னர் தனது விக்கெட்டை பறிகொடுத்து வெளியேறினார். இவர் தனது இன்னிங்ஸில் 5 பவுண்டரி,6 சிக்ஸர்களை அடித்திருந்தார். வார்னர் - ஹெட் ஜோடி முதல் விக்கெட்டுக்கு 175 ரன்கள் சேர்த்தனர்.

ஆட்டத்தின் 21.3 ஓவரில் ட்ராவிஸ் ஹெட் சதமடித்தார். உலகக் கோப்பை 2023 தொடரின் முதல் போட்டியில் களமிறங்கிய ஹெட் தனது அதிரடி ஆட்டத்தால் 59 பந்துகளில் சதத்தை எட்டியுள்ளார்.

இதே வேகத்தில் ஆஸ்திரேலியா ரன் குவித்தால் கண்டிப்பாக 450 ரன்கள் கடக்ககூடும். அதே சமயம் நியூசிலாந்து பவுலர்கள் நெருக்கடி அளிக்க தொடங்கினால் ஆஸ்திரேலியாவின் மிகப் பெரிய ரன்குவிப்பை தடுக்கலாம்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9