World Cup 2023: சதத்தை மிஸ் செய்த கில், கோலி - வலை வீசி தூக்கிய மதுஷங்கா

உலகக் கோப்பை தொடரின் 33வது போட்டி இந்தியா - இலங்கை அணிகளுக்கு இடையே மும்பை வான்கடே மைதானத்தில் நடைபெற்று வருகிறது. இதில் டாஸ் வென்ற இலங்கை அணி கேப்டன் குசால் மெண்டிஸ் பவுலிங்கை தேர்வு செய்துள்ளார்.

இதையடுத்து இந்திய அணியின் ஓபனர்களாக ரோஹித் ஷர்மா - சுப்மன் கில் ஆகியோர் களமிறங்கினர். ஆட்டத்தின் முதல் ஓவரில் முதல் பந்தில் பவுண்டரி அடித்த ரோஹித் ஷர்மா, இரண்டாவது பந்திலேயே கிளீன் போல்டு ஆகி வெளியேறினார்.

இதனால் ஆட்டத்தின் மூன்றாவது பந்திலேயே கோலி பேட் செய்ய வந்தார். கோலியும், ரோஹித் போல் பவுண்டரியுடன் தனது ரன் குவிப்பை தொடங்கினார். முதல் ரன் அடிக்க 7 பந்துகளை எதிர்கொண்ட கில், 8வது பந்தில் பவுண்டரி அடித்து முதல் ரன் அடித்தார். இந்திய டாப் ஆர்டர் பேட்ஸ்மேன்கள் மூன்று பேரும் தங்களது முதல் ரன்களை பவுண்டரியுடன் அடித்தனர்.

ஆட்டத்தின் 4.5 ஓவரில் கில் 9 ரன்கள் அடித்திருந்தபோது, பயிண்ட் திசையில் அடித்த பந்தை கேட்ச் பிடிக்காமல் தவறவிட்டார் அசலங்கா. அதேபோல் ஆட்டத்தின் 5.1 ஓவரில் கோலி 10 ரன்கள் எடுத்திருந்தபோது, ரிட்டர்ன் கேட்ச் வாய்ப்பை தவறவிட்டார் சமீரா.

இந்த வாய்ப்பை நன்கு பயன்படுத்திய கில், கோலி ஆகியோர் சிறப்பாக பேட் செய்து ரன் குவிப்பில் ஈடுபட்டனர். இருவரும் அடுத்தடுத்து அரைசதத்தை பூர்த்தி செய்து பார்ட்னர்ஷிப் அமைத்து விளையாடி வந்தனர்.

ஒரு கட்டத்தில் அடுத்தடுத்த ஓவர்களில் சிக்ஸர் அடித்து 90 ரன்களை கடந்தார் கில். கோலி - கில் பார்ட்னர்ஷிப்பை பிரிக்கும் விதமாக இடது கை வேகப்பந்து வீச்சாளர் மதுஷங்கா மீண்டும் பவுலிங் செய்ய அழைக்கப்பட்டார். இதற்கான பலனும் இலங்கை அணிக்கு கிடைத்தது

ஆட்டத்தின் 29வது ஓவரின் கடைசி பந்தில் ஸ்லோ பவுன்சராக மதுஷங்கா வீச, அதை அப்பர் கட் ஆட முயன்று விக்கெட் கீப்பர் குசால் மெண்டிஸ் வசம் சிக்கினார் கில். அவர் 92 பந்துகளுக்கு 92 ரன்கள் எடுத்த நிலையில், தனது இன்னிங்ஸில் 11 பவுண்டரி, 2 சிக்ஸர்களை அடித்தார்.

அப்போது அணியின் ஸ்கோர் 193 என இருந்தது. கில் - கோலி இணைந்து இரண்டாவது விக்கெட்டுக்கு 189 ரன்கள் சேர்த்தனர்.

இதைத்தொடர்ந்து ஆட்டத்தின் 31.3 ஓவரில் மதுஷங்கா வீசிய மற்றொரு ஸ்லோ பந்தில் 88 ரன்கள் எடுத்திருந்த விராட் கோலி கவர்ஸ் திசையில் ட்ரைவ் ஆட முயற்சித்து கேட்ச் முறையில் அவுட்டானார். அணியின் ஸ்கோர் 196 என இருந்தபோது இந்தியாவின் மூன்றாவது விக்கெட்டாக கோலி பெவிலியன் திரும்பினார்.

இவர்கள் இருவரும் சதமடிப்பார்கள் என எதிர்பார்க்கப்பட்ட நிலையில், மதுஷங்கா ஸ்லோ பந்து வலை விரித்து தூக்கினார். இந்திய அணியின் 3 விக்கெட்டையும் மதுஷங்கா தான் வீழ்த்தினார்.

35 ஓவரில் இந்தியா 3 விக்கெட் இழப்புக்கு 225 ரன்கள் எடுத்துள்ளது. ஷ்ரேயாஸ் ஐயர் 20, கேஎல் ராகுல் 10 ரன்கள் எடுத்திருக்கும் நிலையில் விளையாடி வருகின்றனர்.

சமூக வலைத்தளங்களில் எங்களை பின்தொடரலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews 

https://www.facebook.com/HTTamilNews 

https://www.youtube.com/@httamil 

Google News: https://bit.ly/3onGqm9