David Warner: "ஒரு நாள் போட்டியிலும் ஓய்வு பெறுகிறேன்! ஆனால்..!" - சர்ப்ரைஸ் தகவலை பகிர்ந்த வார்னர்

ஆஸ்திரேலியா அணியின் அதிரடி ஓபனிங் பேட்ஸ்மேனாக இருப்பவர் டேவிட் வார்னர். 37 வயதாகும் வார்னர், ஆஸ்திரேலியாவின் பல்வேறு வெற்றிகளுக்கு சிறப்பான பங்களிப்பை அளித்துள்ளார். அணியின் மேட்ச் வின்னராக இருந்து வரும் அவருக்கு தற்போது சொந்த மண்ணில் நடைபெற்று வரும் பாகிஸ்தானுக்கு எதிரான டெஸ்ட் தொடர் தான் கடைசி தொடராக உள்ளது.

சிட்னியில் நடைபெற இருக்கும் டெஸ்ட் போட்டி தான் வார்னர் விளையாட இருக்கும் கடைசி சர்வதேச டெஸ்ட் போட்டியாக அமைகிறது. இதையடுத்து ஒரு நாள் போட்டியிலிருந்து ஓய்வு பெறுவதாக ரசிகர்களுக்கு ஷாக் தகவலை வார்னர் பகிர்ந்துள்ளார்.

இருப்பினும் ஓய்வு குறித்து மற்றொரு சர்ப்ரைசான விஷயத்தையும் தெரிவித்துள்ளார். ஒரு நாள் போட்டியில் ஓய்வு பெற்றாலும், 2025ஆம் ஆண்டில் நடைபெற இருக்கும் சாம்பியன்ஸ் டிராபி தொடரில் தேவைப்பட்டால் தன்னை அணியில் தேர்வு செய்யலாம் எனவும், அந்த தொடரில் விளையாட தயாராக இருப்பதாகவும் தெரிவித்துள்ளார்.

ஓய்வு குறித்தும், கிரிக்கெட்டில் சாதித்தது குறித்தும் வார்னர் கூறியதாவது: "டெஸ்ட் மட்டுமல்ல, ஒரு நாள் கிரிக்கெட்டிலும் இருந்து ஓய்வு பெறுகிறேன். இந்தியாவில் வைத்து உலகக் கோப்பை வென்றதை மிகப் பெரிய சாதனையாக கருதுகிறேன்.

ஓய்வு முடிவினால் பிற நாடுகளில் நடைபெறும் லீக் தொடர்களில் விளையாடுவதில் எந்த சிக்கலும் இருக்காது. சாம்பியன்ஸ் டிராபி தொடரும் வர இருக்கிறது. இன்னும் இரண்டு ஆண்டுகள் சிறந்த கிரிக்கெட்டை விளையாடினால், சாம்பியன்ஸ் டிராபி தொடரிலும் என்னை தேர்வு செய்யலாம்" என்றார்.

ஒரு நாள் போட்டிகளில் ஆஸ்திரேலியாவில் டாப் ரன்கள் அடித்த பேட்ஸ்மேன்களில் டேவிட் வார்னர் ஆறாவது இடத்தில் உள்ளார். ஒரு நாள் போட்டிகளில் 6932 ரன்கள், 45.30 சராசரியுடன் அடித்திருக்கும் வார்னர், 22 சதங்களை எடுத்துள்ளார். ஆஸ்திரேலியா முன்னாள் கேப்டன் ரிக்கி பாண்டிங்கின் 29 சதங்களுக்கு அடுத்தபடியாக, ஒரு நாள் போட்டியில் அதிக சதமடித்த ஆஸ்திரேலியர்களில் இரண்டாவது இடத்தில் உள்ளார் வார்னர்.

ஆஸ்திரேயா அணி 2015இல் சொந்த மண்ணிலும், 2023இல் இந்தியாவிலும் வைத்து உலகக் கோப்பை தொடரை வென்றபோது, அந்த அணியில் இடம்பிடித்திருந்தார் டேவிட் வார்னர். டேவிட் வார்னரின் கடைசி ஒரு நாள் போட்டி, உலகக் கோப்பை 2023 தொடரில் இந்தியாவுக்கு எதிராக அகமதாபாத்தில் நடைபெற்ற இறுதிப்போட்டி அமைந்துள்ளது.