MS Dhoni: ‘அவரு மட்டும் 20 கிலோ வெயிட் குறைச்சா ஐபிஎல்-க்கு எடுப்பேன்னு சொன்னார் தோனி’

ஆப்கன் வீரர் முகமது ஷாஜாத் 20 கிலோ எடையைக் குறைத்தால் ஐபிஎல் கிரிக்கெட்டில் அவரை தேர்வு செய்வேன் என்று ஆப்கானிஸ்தான் கிரிக்கெட் அணியின் முன்னாள் கேப்டன் முகமது அஸ்கர் ஆப்கானிடம் தோனி கூறிய தகவல் தற்போது வெளஇவந்துள்ளது.

இந்திய கிரிக்கெட் ஜாம்பவான் எம்எஸ் தோனியுடன் தனது அனுபவங்களையும் தொடர்புகளையும் பகிர்ந்து கொண்டார் அஸ்கர். 

தி டைம்ஸ் ஆஃப் இந்தியா உடனான உரையாடலில், கிரிக்கெட் உலகில் தோனியின் செல்வாக்கு மற்றும் அந்தஸ்தை உயர்த்தி அவர் பேசியுள்ளார்.

2015 முதல் 2021 வரை ஆப்கானிஸ்தானின் கேப்டனாக இருந்த காலத்தில், சர்வதேச கிரிக்கெட்டில் ஆப்கானிஸ்தான் குறிப்பிடத்தக்க எழுச்சியை கண்டது. இந்த பயணத்தை அவர் அன்புடன் நினைவு கூர்ந்தார்.

ஆப்கானிஸ்தான் கிரிக்கெட் வளர்ச்சிக்கு உதவிய பிசிசிஐ மற்றும் ஐபிஎல் நிறுவனங்களுக்கு அவர் நன்றி தெரிவித்தார். 2014 முதல் பிசிசிஐயின் உதவியை அவர் பாராட்டினார். இந்த ஆதரவு ரஷித் கான் மற்றும் முஜீப் உர் ரஹ்மான் போன்ற வீரர்கள் நட்சத்திரமாக மாற உதவியது.

தோனியுடன் ஒரு மறக்கமுடியாத தொடர்பு

2018 ஆசிய கோப்பை போட்டிக்குப் பிறகு, MS தோனியுடன் நடந்த உரையாடலை அவர் நினைவு கூர்ந்தார். ஆப்கன் வீரர் ஷாஜாத்தின் உடற்தகுதி குறித்து MSD நகைச்சுவையாக கருத்து தெரிவித்தார். உடல் எடையை குறைப்பது அவருக்கு ஐபிஎல்லில் வாய்ப்புகளைத் திறக்கும் என்று கூறினார்.

"அவர் (தோனி) ஒரு சிறந்த கேப்டன் மற்றும் இந்திய கிரிக்கெட்டுக்கு கிடைத்த பரிசு. அவர் ஒரு நல்ல மனிதர். முகமது ஷாஜாத் பற்றி நிறைய பேசினோம். ஷாஜாத் உங்கள் தீவிர ரசிகர் என்று தோனியிடம் சொன்னேன். ஷாஜாத் வயிறு பெரிதாக இருப்பதாகவும், அவர் 20 கிலோ எடை குறைத்தால், அவரை ஐபிஎல் தொடரில் தேர்வு செய்வேன் என்றும் தோனி கூறினார். ஆனால், ஷாஜத் தொடருக்குப் பிறகு ஆப்கானிஸ்தானுக்குத் திரும்பியபோது, அவர் மேலும் 5 கிலோவை அதிகமாகி இருந்தார், ”என்று TOI மேற்கோள் காட்டி அஸ்கர் கூறினார்.