IND vs SA Test: ரபாடா வேகத்தில் சீட்டு கட்டு போல் சரிந்த இந்தியா! முதல் நாள் ஸ்கோர் விவரம் இதோ!

தென் ஆப்பிரிக்காவுக்கு எதிரான முதல் டெஸ்ட் போட்டியில் முதலாம் நாள் ஆட்ட நேர முடிவில் 208 ரன்களுக்கு 8 விக்கெட்டுகளை இழந்து இந்திய அணி திணறி வருகிறது.

தென் ஆப்பிரிகாவில் சுற்றுப்பயணம் செய்து வரும் இந்திய அணியானது டி20, ஒருநாள், டெஸ்ட் தொடர்களில் விளையாடி வருகிறது. முதலில் நடைபெற்ற டி20 போட்டி 1-1 என்ற கணக்கில் சமனில் முடிந்தது. அடுத்து நடந்த 3 ஒருநாள் போட்டி தொடரில் 2-1 என்ற கணக்கில் இந்திய அணி தொடரை வென்றது.

இதனை அடுத்து 2 போட்டிகள் கொண்ட டெஸ்ட் தொடரின் முதல் போட்டி செஞ்சூரியனில் இன்று தொடங்கியது. இப்போட்டியில் டாஸ் வென்ற தென் ஆப்பிரிக்க அணி பவுலிங்கை தேர்வு செய்தது. இந்திய அணியில் ஜெய்ஸ்வால்-ரோகித் சர்மா ஜோடி ஓபனிங் இறங்கிய நிலையில், ரோகித் சர்மா 5 ரன்களிலும், ஜெய்ஸ்வால் 17 ரன்களிலும் அவுட் ஆகினர்.

அடுத்து களம் இறங்கிய சுப்மன் கில் 2 ரன்களில் வெளியேறி அதிர்ச்சி கொடுத்த நிலையில் சிறிது நேரம் களத்தில் நின்ற விராட் கோலியை 38 ரன்களில் ரபாடா வெளியேற்றினார். ஸ்ரேயாஸ் ஐயர் 31 ரன்களிலும், அஸ்வின் 8 ரன்களிலும், ஷகுல் தாகுர் 24 ரன்களிலும், பும்ரா ஒரு ரன்னிலும் அவுட் ஆகி அதிர்ச்சி அளித்தனர்.

முதலாம் நாள் ஆட்ட நேர முடிவில் கே.எல்.ராகுல் 70 ரன்கள் உடனும், சிராஜ் ரன் ஏதும் எடுக்காமலும் களத்தில் உள்ளனர். தென் ஆப்பிரிக்க அணி தரப்பில் வேகப்பந்து வீசாளர் ரபாடா 5 விக்கெட்டுகளை வீழ்த்தி உள்ளார். பர்ஜெர் 2 விக்கெட்களையும், ஜென்சென் ஒரு விக்கெட்டையும் வீழ்த்தி உள்ளார்.