Top 10 News : ஆசிரியை குத்தி கொலை, துணை முதல்வர் உதயநிதி வழக்கு, கள்ளக்குறிச்சி விஷச்சாராய வழக்கு.. இன்றைய டாப் 10!

தஞ்சை மாவட்டம் பட்டுக்கோட்டை அருகே மல்லிபட்டினம் அரசு மேல்நிலைப் பள்ளி ஆசிரியை கத்தியால் குத்தி கொலை, அமைச்சர் அன்பில் மகேஷ் கண்டனம், தமிழ்நாட்டில் இன்று ஓரிரு இடங்களில் மிக கனமழைக்கு வாய்ப்பு என இன்றைய டாப் 10 தமிழ்நாடு செய்திகளை பார்க்கலாம்.

வகுப்பறையில் பாடம் நடத்திக் கொண்டிருந்த ஆசிரியை குத்தி கொலை

தஞ்சை மாவட்டம் பட்டுக்கோட்டை அருகே மல்லிபட்டினம் அரசு மேல்நிலைப் பள்ளி ஆசிரியை கத்தியால் குத்தி கொலை செய்யப்பட்ட சம்பவம்அதிர்ச்சியை ஏற்படுத்தியுள்ளது. தஞ்சாவூர் மாவட்டம் மல்லிப்பட்டினம் அருகே சின்னமனை பகுதியை சேர்ந்தவர் முத்து. இவரது மகள் ரமணி என்பவர் மல்லிப்பட்டினம் அரசுப் பள்ளியில் ஆசிரியையாக பணியாற்றி வருகிறார். இவருக்கு வயது 26. இவர் ஆசிரியை பணியில் கடந்த நான்கு மாதங்களுக்கு முன்பு பணியில் சேர்ந்தார். இந்நிலையில், ஆசிரியர் ரமணி வழக்கம்போல் இன்று காலை அரசு பள்ளிக்கு வந்துள்ளார். பள்ளியில் பாடம் நடத்திக்கொண்டிருக்கும் போது வகுப்பறைக்குள் வந்த சின்னமலை கிராமத்தை சேர்ந்த மதன்குமார் என்பவர் தான் மறைத்து வைத்திருந்த கத்தியை எடுத்து, கழுத்தில் குத்தினார். இதனால் ரமணி ரத்த வெள்ளத்தில் சாய்ந்தார். உடனடியாக அங்கிருந்தவர்கள் ஆசிரியை ரமணியை மருத்துவமனைக்கு அழைத்துச் சென்றனர். எனினும் மருத்துவமனைக்குச் செல்லும் முன்பே, ரமணி உயிரிழந்தார்.

துணை முதலமைச்சர் உதயநிதி ஸ்டாலினுக்கு எதிராக தாக்கல் செய்த வழக்கு தள்ளுபடி

ஏஞ்சல் எனும் திரைதுணை முதலமைச்சர் உதயநிதி ஸ்டாலினுக்கு எதிராக தாக்கல் செய்த வழக்கு தள்ளுபடிப்படத்தை முழுமையாக நடித்து கொடுக்கவில்லை என்று கூறி உதயநிதிக்கு எதிராக தாக்கல் செய்யப்பட்ட மனுவை சென்னை உயர்நீதிமன்றம் ரத்து செய்துள்ளது. துணை முதலமைச்சர் உதயநிதிக்கு எதிராக ஓ.எஸ்.டி. பிலிம்ஸ் நிறுவனத்தின் உரிமையாளர் ராமசரவணன் தாக்கல் செய்த மனுவை சென்னை உயர் நீதிமன்றம் தள்ளுபடி செய்து உத்தரவிட்டுள்ளது.

ஆசிரியர் ரமணி கொலை - அமைச்சர் அன்பில் மகேஷ் கண்டனம்

தஞ்சாவூரில் ஆசிரியை ரமணியை குத்தி கொன்றவர் மீது கடுமையான சட்ட நடவடிக்கை மேற்கொள்ளப்படும் என பள்ளிக்கல்வித்துறை அமைச்சர் அன்பில் மகேஷ் தெரிவித்துள்ளார். இதுகுறித்து மேலும் அவர் எக்ஸ் தள பக்கத்தில் தெரிவித்துள்ளதவது; “தஞ்சாவூர் மாவட்டம் மல்லிப்பட்டினம் அரசுப் பள்ளியில் பணிபுரிந்த ஆசிரியர் ரமணி அவர்களின் மீதான தாக்குதலை வன்மையாக கண்டிக்கின்றோம். ஆசிரியர்கள் மீதான வன்முறையை துளியும் சகித்துக் கொள்ள முடியாது. தாக்குதலை நடத்தியவர் மீது கடுமையான சட்ட நடவடிக்கை மேற்கொள்ளப்படும். ஆசிரியர் ரமணி அவர்களை இழந்து வாடும் குடும்பத்தினர்களுக்கும், மாணவர்களுக்கும், சக ஆசிரியப் பெருமக்களுக்கும் ஆழ்ந்த இரங்கலைத் தெரிவித்துக் கொள்கின்றோம்” என தெரிவித்துள்ளார்.

ப.சிதம்பரம், கார்த்தி சிதம்பரம் மீதான அமலாக்கத்துறை வழக்கு விசாரணைக்கு டெல்லி உயர் நீதிமன்றம் இடைக்கால தடை விதித்து உத்தரவு

அரசு பணியாளர்கள் மீது அமலாக்கத்துறை வழக்கு பதிவு செய்ய உரிய முன் அனுமதி பெற வேண்டும் என்று அண்மையில் உச்சநீதிமன்றம் உத்தரவிட்டிருந்தது. ப.சிதம்பரம் நிதி அமைச்சராக இருந்தபோது ஏர்செல் மேக்சிஸ் நிறுவனத்திற்கு முதலீடு செய்ய அனுமதி வழங்கினார் என்று கூறி 2018 ஆம் ஆண்டு சிபிஐ மற்றும் அமலாக்கத்துறை வழக்கு பதிவு செய்தது. முன் அமைதி பெறாமல் இந்த வழக்கு பதிவு செய்யப்பட்டுள்ளது. எனவே வழக்கின் விசாரணைக்கு தடை விதிக்க வேண்டும் என்று டெல்லி உயர்ந்த மன்றத்தில் ப.சிதம்பரம், கார்த்தி சிதம்பரம் மனு தாக்கல் செய்திருந்தனர். வழக்கை விசாரித்த நீதிபதி மனோஜ் குமார் வழக்கு விசாரணைக்கு இடைக்கால தடை விதித்து உத்தரவு பிறப்பித்துள்ளார்.

டி.கே.எஸ். இளங்கோவன் பேட்டி

"இதுவரை சந்தித்த அனைத்து தேர்தல்களிலும் திமுகவே வெற்றி பெற்றுள்ளதால், தேர்தலை எதிர்கொள்ள தயாராகவே உள்ளோம்" என சென்னையில் நடைபெற்ற திமுக உயர்நிலை செயல்திட்டக்குழு கூட்டத்திற்கு பின்னர் டி.கே.எஸ். இளங்கோவன் பேட்டியளித்துள்ளார்.

தமிழ்நாட்டில் கனமழைக்கு வாய்ப்பு

தமிழ்நாட்டில் இன்று ஓரிரு இடங்களில் மிக கனமழைக்கு வாய்ப்பு உள்ளதாக இந்திய வானிலை ஆய்வு மையம் தகவல் தெரிவித்துள்ளது. 12 முதல் 20 செ.மீ. வரை மழை பொழிவுக்கு வாய்ப்பு என்பதால் இன்று ஆரஞ்சு எச்சரிக்கை கொடுக்கப்பட்டுள்ளது. தமிழ்நாட்டில் நவ.25, 26 ஆகிய 2 நாட்கள் ஓரிரு இடங்களில் கனமழைக்கு வாய்ப்பு உள்ளது. கனமழைக்கு வாய்ப்பு என்பதால் நவ.25,26 ஆகிய தேதிகளில் தமிழ்நாட்டிற்கு மஞ்சள் எச்சரிக்கை கொடுக்கப்பட்டுள்ளது.

தமிழகத்தில் டிஎஸ்பிக்கள் பணியிட மாற்றம்

சென்னை மத்திய குற்றப்பிரிவு கூடுதல் துணை ஆணையர் முத்துவேல் பாண்டி நாகை ஏடிஎஸ்பியாக மாற்றம். கோவில்பட்டி டிஎஸ்பி வெங்கடேஷ் நெல்லை மாவட்ட வள்ளியூர் டிஎஸ்பியாக இடமாற்றம் செய்தனர். தூத்துக்குடி குற்ற ஆவண காப்பக டிஎஸ்பி பொன்ராமு விருதுநகர் திருச்சுழி டிஎஸ்பியாக மாற்றம். திருச்செந்தூர் டிஎஸ்பி வசந்தராஜ் திருப்பூர் கொங்கு நகர காவல் உதவி ஆணையராக மாற்றம். நெல்லை வள்ளியூர் டிஎஸ்பி யோகேஷ் குமார் திருச்செந்தூர் டிஎஸ்பியாக பணியிட மாற்றம் செய்துள்ளனர்.

கள்ளக்குறிச்சி விஷச்சாராய வழக்கு சிபிஐக்கு மாற்றம்

கள்ளக்குறிச்சி விஷச் சாராய மரண வழக்கை சிபிஐக்கு மாற்றி சென்னை உயர்நீதிமன்றம் உத்தரவிட்டுள்ளது. கள்ளக்குறிச்சி மாவட்டம் கருணாபுரம் பகுதியில் மெத்தனால் கலந்த விஷச்சாராயம் குடித்து 70 க்கும் மேற்பட்டவர்கள் உயிரிழந்தனர். இந்த சம்பவம் தமிழ்நாடு முழுவதும் பெரும் அதிர்வலைகளை ஏற்படுத்தியது.

தொடர்ந்து 3வது நாளாக உயர்ந்த ஆபரணத் தங்கத்தின் விலை

சென்னையில் 22 கேரட் ஆபரணத் தங்கத்தின் விலை இன்று(நவ.20) சவரனுக்கு 400 ரூபாய் உயர்ந்து ஒரு சவரன் ரூ.56,920க்கும் கிராமுக்கு ரூ.50 உயர்ந்து ரூ.7,115க்கும் விற்பனை செய்யப்படுகிறது. வெள்ளி விலை இன்று (நவ.20 ) கிராம் ரூ.101.00-க்கும், ஒரு கிலோ வெள்ளி ரூ.101,000-க்கும் விற்பனையாகிறது.

ஒரே வாரத்தில் 2 யானைகள் உயிரிழப்பு

கொடைக்கானல் மலை பகுதியில் ஒரே வாரத்தில் 2 யானைகள் உயிரிழந்தது அதிர்ச்சியை ஏற்படுத்தியுள்ளது. கொடைக்கானலில் பேத்துப்பாறை, அஞ்சுவீடு, பள்ளங்கி, பாச்சலூர் உள்ளிட்ட நூற்றுக்கும் மேற்பட்ட மலை கிராமங்கள் உள்ளன. இந்நிலையில், கடந்த 12ம் தேதி வெண்கல வயல் பகுதியில் ஆண் யானை ஒன்று இறந்து கிடந்தது. இதேபோல் இரண்டு நாட்களுக்கு முன் 40 வயது மதிக்கத்தக்க மற்றொரு யானையும் உயிரிழந்த நிலையில் மீட்கப்பட்டது.

தீ விபத்தில் உயிரிழந்தவர்களின் எண்ணிக்கை 3 ஆக உயர்வு

கோவை கணபதி பகுதியில் கடந்த 16ம் தேதி துக்க வீட்டில் சடலம் வைக்கப்பட்ட ப்ரீசர் பாக்ஸுக்கு மின் இணைப்புக்காக கொண்டு வரப்பட்ட ஜெனரேட்டரில் பெட்ரோல் ஊற்றும் போது ஏற்பட்ட தீ விபத்தில் உயிரிழந்தவர்களின் எண்ணிக்கை 3 ஆக உயர்வு. பத்மாவதி (53) என்பவர் நிகழ்விடத்திலேயே உயிரிழந்த நிலையில், தீக்காயமடைந்து சிகிச்சை பெற்று வந்த உறவினரான பானுமதி (50) நேற்று முன் தினம் உயிரிழந்தார். நேற்று நள்ளிரவில் ராஜேஸ்வரன் (50) என்பவரும் உயிரிழப்பு. 30% தீக்காயங்களுடன் ஸ்ரீராம் (20) என்பவர் சிகிச்சையில் உள்ளார்.