Tamil Nadu Space Policy: ’விரைவில் தமிழ்நாடு விண்வெளி கொள்கை வெளியிடப்படும்!’ பேரவையில் அமைச்சர் டிஆர்பி.ராஜா அறிவிப்பு

தமிழ்நாடு அரசு சார்பில் வெகு விரைவில் விண்வெளி தொழில் கொள்கை வெளியிடப்படும் என்று தொழில் மற்றும் முதலீடுகள் ஊக்குவிப்பு துறை அமைச்சர் டி.ஆர்.பி.ராஜா தெரிவித்து உள்ளார். 

தமிழ்நாடு சட்டப்பேரவை கூட்டம்

தமிழ்நாடு சட்டப் பேரவையின் நடப்பாண்டின் முதல் கூட்டம் கடந்த பிப்ரவரி 12ஆம் தேதி அன்று ஆளுநர் உரை உடன் தொடங்கியது. பட்ஜெட் மீதான விவாதங்கள் நடைபெற்ற நிலையில், துறை ரீதியான மானியக் கோரிக்கை விவாதங்கள் நடைபெறாமல் ஒத்திவைக்கப்பட்டு இருந்தது.

இந்த நிலையில் துறைரீதியிலான மானியக் கோரிக்கை விவாதத்திற்காக தமிழ்நாடு சட்டப்பேரவை கூட்டத் தொடர் கடந்த ஜூன் 20ஆம் தேதி தொடங்கி நடந்து வருகிறது. வரும் ஜூன் 29ஆம் தேதி இக்கூட்டத்தை நடத்த திட்டமிடப்பட்டு உள்ளது.

மானியக் கோரிக்கை விவாதம்

இன்றைய தினம் சிறு குறு நடுத்தர தொழில்கள், மருத்துவம் மற்றும் மக்கள் நல்வாழ்வுத்துறை, தகவல் தொழில்நுட்பம் மற்றும் டிஜிட்டல் சேவைகள் துறை, தொழில் மற்றும் முதலீட்டு ஊக்குவிப்பு துறை, மதுவிலக்கு, காவல் துறைகளின் மானியக் கோரிக்கை விவாதங்கள் நடைபெறுகின்றது. இந்த விவாதத்தில் உறுப்பினர்கள் எழுப்பும் கேள்விகளுக்கு முதலமைச்சர் மு.க.ஸ்டாலின், அமைச்சர்கள் தா.மோ.அன்பரசன், மா.சுப்பிரமணியன், பிடிஆர்.பழனிவேல்தியாகராஜன், டி.ஆர்.பி.ராஜா உள்ளிட்டோர் பதில் அளித்து பேசி புதிய அறிவிப்புகளை வெளியிடுகின்றனர்.

தமிழ்நாடு விண்வெளி கொள்கை 

தொழில் மற்று முதலீட்டு துறை மீதான மானிய கோரிக்கை விவாதத்தில் உறுப்பினர்களின் கேள்விகளுக்கு பதில் அளித்த அமைச்சர் டி.ஆர்.பி.ராஜா, புதிய அறிவிப்புகளை வெளியிட்டார். அப்போது, தமிழ்நாடு, தானியங்கி மோட்டார் வாகனம் மற்றும் வாகன உதிரிபாகங்கள், ஜவுளி, கனரக இயந்திரங்கள், தகவல் தொழில்நுட்பம், மின்னணுவியல், வன்பொருள் போன்ற துறைகளில் சிறந்த வளர்ச்சி பெற்று தொடர்ந்து தொழில்மயமான மாநிலமாக விளங்கி வருகிறது. தற்போது, வானூர்தி மற்றும் பாதுகாப்புத் துறையில் பெரும் முதலீடுகளை ஈர்த்து வருவதன் தொடர்ச்சியாக மேலும் இத்துறை சார்ந்த பன்னாட்டு நிறுவனங்களை ஈர்த்து அதிகளவிலான முதலீடுகளை பெறும் நோக்கில் தமிழ்நாடு விண்வெளி தொழில் கொள்கை (Space Tech Policy) வெளியிடப்படும் மாநிலத்தில் விண்வெளித் தொழில்நுட்ப வளர்ச்சிக்கு உதவும் வகையில் வழிமுறைகள் மற்றும் தொலைநோக்கு திட்டங்கள் இக்கொள்கையில் வகுக்கப்படும் என தெரிவித்தார்.

பல்வேறு மாவட்டங்களில் புதிய சிப்காட்கள் 

தொடர்ந்து பேசிய அவர், திருவள்ளூர் மாவட்டத்தில், பெருகி வரும் தொழில் மனைத் தேவையைக் கருத்தில் கொண்டு, கும்மிடிப்பூண்டி வட்டத்தில் சுமார் 1500 ஏக்கர் நிலப்பரப்பில் ஒரு புதிய சிப்காட் தொழிற்பூங்கா உருவாக்கப்படும். இதில் சாலை. மழை நீர் வடிகால் நீர் வழங்கல் மற்றும் விநியோக அமைப்பு, தெரு விளக்குகள், பசுமை சூழல் பேணுதல் திடக்கழிவு மேலாண்மை மற்றும் பாதுகாப்பு அம்சங்கள் போன்ற அனைத்து அடிப்படை கட்டமைப்பு வசதிகளும் ஏற்படுத்தப்படும். இதன் மூலம் சுமார் 5,250 கோடி ரூபாய் முதலீடு ஈர்க்கப்படுவதுடன், சுமார் 45,000 நபர்களுக்கு நேரடி மற்றும் மறைமுக வேலைவாய்ப்புகள் உருவாகும். 

தூத்துக்குடி மாவட்டத்தில் பெருகி வரும் தொழில் மனைத் தேவையை கருத்தில் கொண்டு, ஒட்டப்பிடாரம் வட்டத்தில் சுமார் 1000 ஏக்கர் நிலப்பரப்பில், ஒரு புதிய சிப்காட் தொழிற்பூங்கா உருவாக்கப்படும். இதில் சாலை,மழை நீர் வடிகால் நீர் வழங்கல் மற்றும் விநியோக அமைப்பு. தெரு விளக்குகள், பசுமை சூழல் பேணுதல், திடக்கழிவு மேலாண்மை மற்றும் பாதுகாப்பு அம்சங்கள் போன்ற அனைத்து அடிப்படை கட்டமைப்பு வசதிகள் ஏற்படுத்தப்படும். இதன் மூலம் சுமார் 1,500 கோடி ரூபாய் முதலீடு ஈர்க்கப்படுவதுடன் சுமார் 25.000 நபர்களுக்கு நேரடி மற்றும் மறைமுக வேலைவாய்ப்புகள் உருவாகும்.

திருச்சிராப்பள்ளி மாவட்டத்தில் பெருகி வரும் தொழில் மனைத் தேவையை கருத்தில் கொண்டு, திருவெறும்பூர் வட்டத்தில் சுமார் 150 ஏக்கர் நிலப்பரப்பில் மேலும் ஒரு சிப்காட் தொழிற்பூங்கா உருவாக்கப்படும். இதில் சாலை, மழை நீர் வடிகால், நீர் வழங்கல் மற்றும் விநியோக அமைப்பு, தெரு விளக்குகள், பசுமை சூழல் பேணுதல், திடக்கழிவு மேலாண்மை பாதுகாப்பு அம்சங்கள் போன்ற மற்றும் அனைத்து அடிப்படை கட்டமைப்பு வசதிகள் ஏற்படுத்தப்படும். இதன் மூலம் சுமார் 225 கோடி ரூபாய் முதலீடு ஈர்க்கப்படுவதுடன் சுமார் 3,000 நபர்களுக்கு நேரடி மற்றும் மறைமுக வேலைவாய்ப்புகள் உருவாகும்.

காஞ்சிபுரம் மாவட்டத்தில், குறிப்பாக திருப்பெரும்புதூர் மண்டலம் பெரிய தொழில் மையமாக உருப்பெற்றுள்ளதைக் கருத்தில் கொண்டு, திருப்பெரும்புதூர் வட்டத்தில், சுமார் 750 ஏக்கர் நிலப்பரப்பில் ஒரு தொழிற்பூங்கா உருவாக்கப்படும். இதில் சாலை, மழை நீர் வடிகால் நீர் வழங்கல் மற்றும் விநியோக அமைப்பு, தெரு விளக்குகள், பசுமை சூழல் பேணுதல், திடக்கழிவு மேலாண்மை மற்றும் பாதுகாப்பு அம் அம்சங்கள் போன்ற அனைத்து அடிப்படை கட்டமைப்பு வசதிகள் ஏற்படுத்தப்படும். இதன் மூலம் சுமார் 2,625 கோடி ரூபாய் முதலீடு ஈர்க்கப்படுவதுடன், சுமார் 22,500 நபர்களுக்கு நேரடி மற்றும் மறைமுக வேலைவாய்ப்புகள் உருவாகும் என கூறினார்.