World Contraception Day: உலக கருத்தடை தினம்! கருத்தடையின் முக்கியத்துவங்கள்!

உலகளவில் வாழும் இளைய தலைமுறையினரிடையே கருத்தடை குறித்தான விழிப்புணர்வு இருப்பதில்லை. இதன் காரணத்தால் தான் பல பிரசவ மரணங்கள் நிகழ்கிறது. இதனை கருத்தில் கொண்டு உலக கருத்தடை தினம் ஒவ்வொரு ஆண்டும் செப்டம்பர் 26 அன்று கடைபிடிக்கப்படுகிறது. இந்த நாளின் முக்கிய நோக்கமாக இளைய தலைமுறையினர் இடையே கருத்தடை குறித்தான விழிப்புணர்வை ஏற்படுத்துவதும், அவர்களின் பாலியல் மற்றும் இனப்பெருக்கம் குறித்தான ஆரோக்கியத்தை பெற வைப்பதாகும். 

பெரும்பாலான நாடுகளில் பிரசவ இறப்புக்களாலும், எச்ஐவி போன்ற நோய் பாதிப்புக்கலாலும் அதிகம் பாதிக்கப்படுபவர்கள் இளம் தலைமுறையினராக உள்ளனர். மேலும் டீன் வயதில் கர்ப்பம் அடைந்து அதன் காரணமாக பல உடல் நலக் குறைபாடுகளை பெண்கள் சந்திக்க வேண்டியதாகியுள்ளது.

பெண்ணுக்கான உரிமை 

ஒவ்வொரு பெண்ணும் அவளது உடல் சார்ந்த அனைத்து முடிவுகளையும் எடுக்கும் உரிமை பெற்றுள்ளார். இருப்பினும் இந்திய சமுதாயத்தில் கருத்தடை போன்ற செயல்பாடுகள் தவறாக பார்க்கப்பட்டு வந்தன. இருப்பினும் அரசின் சட்டங்களால் கருத்தடை குறித்தான விழிப்புணர்வு செயல்பாடுகள் நடத்தப்பட்டு வருகின்றன. உலகளாவிய அளவில் அனைத்துக் பெண்களுக்குமான சம உரிமை, பாலின சமத்துவம் ஆகியவற்ற சாத்தியப்படுத்தம் நோக்கிலும் இந்த உலக கருத்தடை தினம் கடைபிடிக்கப்படுகிறது. 

ஒவ்வொரு ஆண்டும் இந்தியாவில் பாதுகாப்பில்லா கருக்கலைப்பினால் பல மரணங்கள் நிகழ்கின்றன. இதனை தடுப்பதற்கான சிறந்த வழி கருத்தடை. இது குறித்தான தெளிவான தகவல்கள் எதுவும் தெரியாத காரணத்தால் பல பெண்  பிள்ளைகள் பதின்பருவ வயதிலேயே கர்ப்பம் அடைகின்றனர். இதில் இருந்து விடுபட அவர்களிடத்தில் கருத்தடை குறித்தான தெளிவான புரிதல் இருத்தல் வேண்டும். இதனை தெரிந்து கொள்வதும் ஒரு பெண்ணின் உரிமையாகும். 

கருத்தடை வழிமுறைகள் 

கருத்தடைக்கு சில வழிகள் உள்ளன. பாதுகாப்பான ஆணுறை உபயோகித்து உறவு மேற்கொள்ளுதல் இதில் முதன்மையான தீர்வாகும். இருப்பினும் இன்றளவும் இது குறித்தான புரிதல் இல்லாமல் சிலர் உள்ளனர். ஆணுறை நேரடியாக விந்து கருப்பைக்குள் செல்வதை தடுக்கிறது. இது கருத்தடைக்கு பரிந்துரைக்கப்படும் சிறந்த வழியாகவும் கருதப்படுகிறது. மேலும் இப்போது பல இடங்களில் எளிமையாக இந்த ஆணுறைகள் கிடைக்கின்றன.

கரு உருவாகாமல் தடுப்பதற்கான மற்றொரு சிறந்த வழியாக  கருத்தடை மாத்திரைகள் உள்ளன. மருத்துவரின் தக்க ஆலோசனையின் படி இந்த கருத்தடை மாத்திரகளை உபயோகிக்க வேண்டும். இதனை பெண்கள் மருத்தவரின் பரிந்துரை இல்லாமல் உபயோகப்படுத்த கூடாது. ஏனெனில் வேறு விதமான பின் விளைவுகளை ஏற்படுத்த வாய்ப்புள்ளது. மேலும் கருப்பையில் காப்பர் டி பொருத்துவதும்  சிறந்த கருத்தடை வழிமுறையாகும். திருமணம் ஆகி குழந்தைகள் இருக்கும் தம்பதியினர், குடும்ப கட்டுபாடு எனும் நிரந்தர கருத்தடை அறுவை சிகிச்சை செய்ய பரிந்துரைக்கப்படுகிறார்கள். 

கரு உருவாவதை தள்ளி போட விரும்பும் தம்பதியினரும் இந்த கருத்தடை வழிமுறைகளை பின்பற்றுகின்றனர். மேலும் இந்தியா போன்ற நாடுகளின் கிராமங்களில் அதிகப்படியான இளம் வயது கர்ப்பம், பிரசவத்தினால் மரணம் போன்ற நிகழ்வுகள் நடக்கின்றன. இத்தகைய பிரச்சனைகளில் இருந்து மீழ்வதற்கு கருத்தடை முறை பயன்படுகிறது. உலக சுகாதார நிறுவனம் பரிந்துரைப்படி அனைத்து நாட்டின் அரசுகளும் கருத்தடை குறித்தான விழிப்புணர்வு செயல்பாடுகளில் ஈடுபட்டு வருக்கின்றன.