Parvathy thiruvothu: ‘7 வருஷம் ஒரு படம் கூட ஓடல.. நல்ல நடிகைன்னு ஒருத்தன் சொல்லல..’ - பார்வதி எமோஷனல் பேட்டி!

நடிகை பார்வதி, தன்னுடைய பர்சனல் வாழ்க்கை குறித்து தொகுப்பாளர் ரம்யா யூடியூப் சேனலுக்கு அளித்த பேட்டியில் பேசி இருக்கிறார்.

நான் ஒரு முரட்டு சிங்கிள்

இது குறித்து அவர் பேசும் போது, “ இப்போதில் இருந்து இன்னும் ஒரு 11 வருடங்கள் கழிந்தால், வாழ்க்கை குறித்தான என்னுடைய பார்வை என்பது முற்றிலுமாக மாறி இருக்கும். இப்போது கூட நான் தனியாகதான் இருக்கிறேன். அதற்காக நான் காதலித்து பிரேக்கப் செய்து கொண்டு, தனியாக இருக்கிறேன் என்று அர்த்தம் அல்ல. நான் ஒரு முரட்டு சிங்கிள்.

இப்போதும் நான் சாதாரணமாக மருந்து கடைக்குச் சென்று, எனக்கு தேவையான மருந்துகளை வாங்கிக் கொள்கிறேன். மக்கள், நீங்கள் எந்தவிதமாக உங்களை வெளிப்படுத்துகிறீகளோ, அப்படித்தான் உங்களை அணுகுவார்கள். என்னைப் பற்றி மக்கள் கொஞ்சம் ஆர்வமாக இருக்க வேண்டும் என்றால், அதற்கு தேவையான விஷயங்களை பி. ஆர் மூலமாக நான் செய்து விடுவேன். ஆனால் இன்றைய தினம் எல்லாமே ஒரு திறந்த புத்தகம்தான். நாம் மக்களிடம் இருந்து எதையும் மறைக்க முடியாது. எல்லா திட்டமும் அவர்களுக்குத் தெரியும்.

நான் என்னுடைய வாழ்க்கையை வாழ வேண்டும்

என்னுடைய திட்டம் என்னவென்றால், நான் என்னுடைய வாழ்க்கையை வாழ வேண்டும். இரவு படுக்கைக்கு சென்றால், நிம்மதியாக தூங்க வேண்டும். இதுதான் என்னுடைய திட்டம். இப்போது எனக்குத் தேவையான பொருட்களை நான் ஆன்லைனில் ஆர்டர் செய்து வாங்கிக் கொள்கிறேன். ஆனாலும் நான் வாங்கிய வெண்டைக்காய் ஒழுங்கானதாக இருக்கிறதா இல்லையா என்பதை தெரிந்து கொள்ள, நான் அதனை உடைத்துப் பார்த்து வாங்க வேண்டும் இல்லையா?

உங்களது மூளை சரிவர இயங்குவதற்கு இந்த மாதிரியான சின்ன சின்ன அனுபவங்கள் மிக மிக முக்கியம். நடிப்பு என்பது என்னுடைய தொழில். அது என்னுடைய அடையாளம் அல்ல. அதை நான் பிரித்துப் பார்ப்பதற்கு, ஒரு படத்திற்கும் இன்னொரு படத்திற்கும் இடையேயான இடைவெளி காலத்தை பயன்படுத்திக் கொள்கிறேன்.

விவாதம் செய்வேன்

இந்த வருடம் தங்கலான் திரைப்படம் வந்திருக்கிறது. போன வருடம் ஒரு படத்தில் நடித்தேன். அதற்கு முன்னதான வருடம் இரண்டு படங்களில் நடித்தேன். ஒரு வருடத்தில், ஒரு படத்திற்கு மேலே நடிப்பதை நான் பழக்கமாக வைத்துக் கொள்வதில்லை. வருடத்திற்கு ஒரு படத்தில் நடிக்கும் பொழுது, தோராயமாக எனக்கு மூன்று மாதங்கள் மட்டும் தான் தேவைப்படும்.

பின்னரான காலங்களில், நான் வீட்டில் சும்மாதான் உட்கார்ந்து இருப்பேன். நண்பர்களோடு உரையாடுவேன். விவாதங்களை பார்ப்பேன். விவாதம் செய்வேன். இது எனக்கு ஒரு பாதுகாப்பான உணர்வை கொடுக்கிறது.இந்த காலங்களில் எனக்கு சில பாதுகாப்பற்ற உணர்வும் வரும். நான் திரைத்துறைக்கு வந்து கிட்டத்தட்ட 18 வருடங்கள் ஆகிவிட்டன. முதல் ஏழு வருடங்களில் எனக்கு வெற்றிப் படங்களே கிடையாது. பாக்ஸ் ஆபிஸ் வெற்றி என்றால் என்னவென்றே தெரியாது. என்னை நல்ல நடிகை என்று யாரும் சொன்னது கிடையாது.

நான் மகிழ்ச்சி பட்டுக்கொண்டிருந்தேன்.

அந்த காலங்களில் வெளியே இருந்து எனக்கு எந்த ஒரு அங்கீகாரமும் கிடைக்க வில்லை. ஆனால் வாழ்க்கையில் அந்த நேரம் என்பது எனக்கு மிக மிக சிறந்த நேரமாக இருந்தது. காரணம் என்னவென்றால், வெளியே எனக்கு அங்கீகாரம் வரவில்லை என்றாலும், என்னுடைய வேலையை நான் மதித்து, ஒழுங்காக செய்வது என்பது எனக்கு பழக்கம் ஆகிவிட்டது. அதிலிருந்து கிடைக்கக்கூடிய திருப்தியில், நான் மகிழ்ச்சி பட்டுக்கொண்டிருந்தேன். திடீரென்று ஒரு நாள் ஒரு படம் ஹிட்டானது. அடுத்ததாக அடுத்தப்படமும் ஹிட்டானது. என்னுடைய நண்பர் சொல்வார். வெற்றி போல எதுவும் உன்னை தோற்கடிக்க முடியாது என்று… வெற்றி வந்துவிட்டால், வெளியே இருந்து மனது அங்கீகாரத்தை தேட ஆரம்பித்து விடும். மதிப்பை எதிர்பார்க்கும்.

உண்மையைச் சொல்ல வேண்டும் என்றால் மதிப்பு என்பது எனக்குள்ளே இருந்து வர வேண்டும். இன்று நான் எப்படியான ஒரு மனுஷியாக இருக்கிறேன் என்பதுதான் இங்கு முக்கியமானது. நான் மிகவும் ஒரு சாதாரண மனுஷியாக இருக்க விரும்புகிறேன். அதற்காக எனக்கு பிரபலம் பிடிக்காது என்று அர்த்தம் இல்லை. அதுவும் பிடிக்கும்.

ஆனால் சமூகத்தில் அது குறித்தான பொறுப்பை நான் மிகவும் சீரியஸாக பார்க்கிறேன். அதேநேரம் மக்கள் என்னை வெறுப்பதையும் நான் ஏற்றுக் கொள்கிறேன். அவர்களை நீங்கள் என்னை வெறுக்கவே கூடாது என்றெல்லாம் சொல்வதற்கு எனக்கு உரிமை கிடையாது. எனக்கும் சில நபர்களை பிடிக்காது. அவர்களுடன் நான் பெரிதளவு உடன்பட்டு வாழ மாட்டேன். உண்மையில் எல்லோரும் என்னை விரும்ப வேண்டும் என்று நினைப்பது மிக மிக மோசமான மனநிலை ஆகும்.” என்று பேசினார்.

தமிழ்நாடு, தேசம் மற்றும் உலகம், பொழுதுபோக்கு, விளையாட்டு, லைஃப்ஸ்டைல், ஜோதிடம், புகைப்பட கேலரி, வேலைவாய்ப்பு, சமீபத்திய செய்திகள் என அனைத்தையும் இந்துஸ்தான் டைம்ஸ் தமிழ் இணையதளத்தில் உடனுக்குடன் தெரிந்து கொள்ளலாம்.

சமூக வலைத்தளங்களில் எங்களை பின்தொடலாம். லிங்க்குகள் கீழே கொடுக்கப்பட்டுள்ளன:

https://twitter.com/httamilnews

https://www.facebook.com/HTTamilNews

https://www.youtube.com/@httamil

Google News: https://bit.ly/3onGqm9