வாளை கூர்தீட்டும் சூர்யா.. “எதற்காகவும் குடும்பத்த மட்டும் சமரசமே செய்ய..” - கங்குவா புரோமோஷனில் ஓப்பனாக பேசிய சூர்யா

கங்குவா திரைப்படம் வருகிற நவம்பர் 14ம் தேதி வெளியாக உள்ள நிலையில், படத்தை புரமோட் செய்வதற்காக, சூர்யா, திஷா பதானி, பாபி தியோல் உள்ளிட்ட படக்குழுவினர் டெல்லி சென்று இருக்கின்றனர். அங்குள்ள கல்லூரி ஒன்றில் இந்த புரமோஷன் நிகழ்வு நடைபெற்றதாக தெரிகிறது.  இந்த நிலையில் நிகழ்வில் கலந்து கொண்டு பேசிய சூர்யா, “ உங்களுடைய வரவேற்பு நெகிழ்ச்சியை ஏற்படுத்தி இருக்கிறது. டெல்லியில் பல கல்லூரிகள், பல்கலைகழகங்கள் இருக்கின்றன. ஆனால், சினிமா தொடர்பான பெரும்பான்மையான நிகழ்வுகள் இங்குதான் நடக்கின்றன.

குடும்பத்தை எக்காரணம் கொண்டும்

உங்களுடைய அன்பிற்கு மிக மிக நன்றி. உங்களுடைய நேரத்திற்கு நன்றி; மாணவர்களே, நல்ல மாணவர்கள் நல்ல மாணவிகளை பார்ப்பார்கள். நல்ல மாணவிகள் நல்ல மாணவர்களை பார்ப்பார்கள். வாழ்க்கையில் பல விஷயங்கள் நடக்கும். ஆனால், ஒரு போதும் உங்களுடைய குடும்பம், நண்பர்கள், நம்பிக்கை ஆகிய மூன்றையும் எதற்காகவும் சமரசம் செய்து கொள்ளாதீர்கள்.

வாழ்க்கையில் நீங்கள் ஆசைப்பட்ட எல்லா விஷயங்களும் நடக்காது. ஆனால், உங்களுக்கு எது தேவையோ அது நிச்சயமாக நடக்கும். வாழ்க்கை மிக மிக அழகானது. வாழ்க்கையை நம்புங்கள். உங்களுக்கு சிறப்பான எதிர்காலம் அமைய என்னுடைய வாழ்த்துகள். உங்களுடைய எல்லா கனவுகளும் நிறைவேறும். உங்கள் கனவுகளை நம்புங்கள்” என்று பேசினார்.

முன்னதாக, நடிகர் சூர்யாவின் 42ஆவது திரைப்படமான கங்குவா படத்தை இயக்குநர் சிறுத்தை சிவா இயக்கி இருக்கிறார். இந்தப் படத்தில் சூர்யாவிற்கு ஜோடியாக பாலிவுட் நடிகை திஷா பதானி நடித்திருக்கிறார். இது தான் இவர்கள் இருவரும் சேர்ந்து நடிக்கும் முதல் படமாகும். இவர்களுடன் பாலிவுட் நடிகர் பாபி தியோல், கிச்சா சுதீப், ஜெகபதி பாபு, நடராஜன் சுப்ரமணியம் உள்ளிட்டோர் முக்கியக் கதாபாத்திரங்களில் நடித்துள்ளனர்.

இசையமைப்பாளர் தேவி ஸ்ரீபிரசாத் இந்தப்படத்திற்கு இசையமைக்கிறார். கங்குவா திரைப்படத்தின் டைட்டிலை, கடந்த ஏப்ரல் 16ஆம் தேதி படக்குழுவினர் அறிவித்தனர். இந்நிலையில் இப்படம் வரக்கூடிய நவம்பர் 14ஆம் தேதி உலகெங்கும் 3500 திரையரங்குகளில் வெளியாகவிருக்கிறது. ரூ.350 கோடிக்கும் அதிகமான பட்ஜெட்டில் தயாரிக்கப்பட்ட தமிழ்ப் படங்களில் கங்குவாவும் ஒன்று. ஏழு நாடுகளில் படமாக்கப்பட்ட இப்படம் உலகம் முழுவதும் 35 மொழிகளில் வெளியாகவுள்ளது.

இன்று மாலை 2 வது பாடல்

கங்குவா திரைப்படத்தில் இந்திய சினிமாவின் மிகப்பெரிய போர்க் காட்சி படமாக்கப்பட்டிருக்கிறது. இதில் 10,000-க்கும் மேற்பட்டோர் போர் புரிவதுபோல் நடித்துள்ளனர். கங்குவா திரைப்படத்தின் படப்பிடிப்பு கோவா, எண்ணூர் துறைமுகம், பிஜி தீவுகள், கொடைக்கானல், ஆந்திர மாநிலத்தின் ராஜமுந்திரி மற்றும் பல்வேறு வெளிநாடு பகுதிகளில் நடைபெற்றது. இந்தப்படத்தின் முதல் பாடலான ‘கங்குவா’ வெளியாகி வரவேற்பை பெற்று இருக்கும் நிலையில், இன்று மாலை ‘யோலோ’ பாடல் வெளியாக இருக்கிறது.

முன்னதாக படம் குறித்து பேசிய இயக்குநர் சிறுத்தை சிவா, “உண்மையில் கங்குவன் என்பது ஒரு மொழி. படத்தின் போஸ்டரில் கங்குவன் என்ற பெயருக்கு மேலே இடம் பெற்றுள்ள எழுத்தானது வட்டெழுத்து என்று அழைக்கப்படும் பழங்காலத் தமிழ் ஆகும். இது 3ஆம் நூற்றாண்டிற்குப் பிறகு வழக்கத்தில் இருந்தது. கங்கு என்றால் ’நெருப்பு’ என்று பொருள். கங்குவா என்றால் நெருப்பு சக்தி கொண்ட மனிதன் என்று பொருள்படும்” என்று பேசினார்.

கங்குவா எத்தனை கோடி வசூலிக்கும்?:

கங்குவா திரைப்படத்தை பிரபல ஓடிடி நிறுவனமான அமேசான் ஓடிடி தளம் 80 கோடி ரூபாய்க்கு வாங்கி உள்ளதாக தகவல்கள் தெரிவிக்கின்றன. கே.ஜி.எஃப் 2 மற்றும் இந்தி, தெலுங்கு மொழிப் படங்கள் மட்டுமே இந்தச் சாதனையைச் செய்துள்ளன. இதுவரை எந்த தமிழ்ப் படமும் அந்த சாதனையை எட்டியதில்லை.

கங்குவாவால் அதை மாற்ற முடியுமா என்று படத்தின் தயாரிப்பாளர் கே.இ.ஞானவேல் ராஜாவிடம் கேட்டபோது, "நான் ரூ.2000 கோடி பாக்ஸ் ஆபிஸ் வசூலை எதிர்பார்க்கிறேன். அதை ஏன் ரூ.1000 கோடி என்று குறைத்து மதிப்பிடுகிறீர்கள்" என்று நம்பிக்கையுடன் பதிலளித்தார். இந்தப்படத்தின் ஆடியோ வெளியீட்டு விழா, சென்னை நேரு திரையங்கத்தில் வருகிற 26ம் தேதி நடைபெற இருப்பதாக கூறப்படுகிறது.