Aval Sumangalithan: மூளையில் கேன்சர், பார்வை இழந்தவராக தோன்றும் கார்த்திக்..! விசுவின் சிறந்த பேமிலி டிராமா படம்

மேடை நாடகமாக அரங்கேற்றப்பட்டு அதே பெயரில் திரைப்படமாக உருவாகி ரசிகர்களை கவர்ந்த படம் அவள் சுமங்கலிதான். மறைந்த இயக்குநர், நடிகர் விசு தான் மேடையில் அரங்கேற்றிய அவள் சுமங்கலிதான் என்ற நாடகத்தை அதே பெயரில் கார்த்திக், இளவரசி நடிப்பில் திரைப்படமாக உருவாக்கியிருந்தார்.

படத்தின் கார்த்திக்குக்கு இணையாக அவரது நண்பராக சந்திரசேகர் முக்கிய கதாபாத்திரத்தில் நடித்திருப்பார். விசு, கே.ஆர். விஜயா, நிஷா நூர், மாஸ்டர் காஜா ஷெரீஃப், கிஷ்மு என விரல் விட்டு என்னும் அளவில் தான் படத்தில் நடித்திருப்பார்கள். படத்தின் திரைக்கதையும் இவர்களை சுற்றியே செல்லும் விதமாக அமைந்திருக்கும்.

கணவன் - மனைவி உறவின் மகத்துவத்தை சொன்ன கதை

ஏழையாக இருந்து வரும் விசு தனது மகள் இளவரசிக்கு வரன் பார்க்கிறார். கார்த்திக்கை மாப்பிள்ளையாக தேடி படித்து திருமணம் செய்து வைக்கிறார்.

சில திருப்பங்களுக்கு பிறகு கார்த்திக்குக்கு மூளையில் கேன்சர் இருப்பது தெரிய வருகிறது. இதை யாரிடமும் சொல்லாமல் மறைக்கிறார். நண்பர் சந்திரசேகருக்கு இந்த விஷயம் தெரியவந்ததும், தான் மறைந்து பிறகு மனைவிக்கு மறுமணம் செய்து வைக்குமாறு கோருகிறார்.

இறந்த பின்னர் மறுமணம் செய்ய வேண்டியது குறித்து மனைவிக்கு கார்த்திக் எழுத மறைத்து வைக்கும் லெட்டர் இளவரசி படிக்க நேரிடுகிறது. கணவருக்கு கொடிய நோய் பாதிப்பு இருப்பதை அறிந்து கொண்டு, அவர் இறப்பதை தன்னால் பார்க்க இயலாது என கூறி விஷம் அருந்தி தற்கொலை செய்து கொள்கிறார்.

நோய் பாதிப்பின் தீவிரத்தால் பார்வை இழக்கும் கார்த்திக் மனைவி இறந்த துக்கத்தில் இருக்க, அவரது நோய்க்கு சிகிச்சை பெற வெளிநாடு செல்வது போல் படத்தை முடித்திருப்பார்கள்.

இறுதியில், "விஞ்ஞானம் அவனை பிழைக்க வைக்கபோகிறது. அதற்குள் அவனுக்கு எரியப்பட்ட பாசக் கயிற்றை அவள் வாங்கிகொண்டாள். என்றும் அவள் சுமங்கலிதான் என்ற" கார்டுடன் படத்தை முடித்திருப்பார்கள்.

படத்தின் மைய கருத்தாக மருத்துவ வளர்ச்சியில் எந்த நோய் பாதிப்பையும் குணப்படுத்தலாம் என்பதால் உணர்வு ரீதியாக வலுவாக இருக்க வேண்டும் எனவும், கணவன் - மனைவி இடையிலான உறவின் மகத்துவத்தை சொல்வதாகவும் இருந்தது.

விசு ட்ரேட்மார்க் திரைக்கதை

பேமிலி டிராமா பாணியில் உருவாகியிருக்கும் இந்த படம் விசுவின் ட்ரேட் மார்க் காட்சிகளுடன், திரைக்கதையுடன் படம் உருவாகியிருக்கும். காமெடி, காதல், எமோஷன், சென்டிமெண்ட் என அனைத்து விஷயங்களும் கலந்த கலவையாக படம் அமைந்திருக்கும்.

மிகவும் குறைவான கேரக்டர்கள் தான் என்றாலும் எந்த இடத்திலும் போர் அடிக்காத விதமாக விறுவிறு காட்சிகளால் ரசிக்க வைத்திருப்பார்கள்.

மிகவும் கேஷுவலான நடிப்பை முதல் பாதியிலும், இரண்டாம் பாதியில் உணர்ச்சிகரமாகவும், பார்வையற்றவராகவும் நடிப்பில் கலக்கியிருப்பார் கார்த்திக். இவருக்கு இணையாக சந்திரசேகர் வேடமும் அமைந்திருக்கும். மலையாளியாக வரும் அவர் மலையாளம், தமிழ் கலந்து படம் முழுக்க வலம் வருவார்.

அதேபோல் இளவரசி, கே.ஆர். விஜயா ஆகியோரும் தங்களது பாத்திரத்துக்கான சிறந்த நடிப்பை வெளிப்படுத்தியிருப்பார்கள்.

எம்.எஸ். விஸ்வநாதன் இசையில் வாங்க மாப்பிள்ளை, மல்லிகை பூவின், நினைத்தால் மணக்கும் போன்ற பாடல்கள் வரவேற்பை பெற்றன. கலகலக்கபாக செல்லும் படம் இறுதியில் சோகமாக முடியும் இந்த படம் ரசிகர்கள் மத்தியில் வரவேற்பை பெற்றது. இந்த படம் தெலுங்கிலும் கார்த்திக் நடிப்பில் அங்கும் வரவேற்பை பெற்றது.

வில்லன் கதாபாத்திரம் இல்லாமல், விரசமான காட்சிகள் ஏதும் இல்லாமல் எதார்த்தத்துக்கு நெருக்கமாக அமைந்திருந்த அவள் சுமங்கலிதான் படம் வெளியாகி இன்றுடன் 39 ஆண்டுகள் ஆகிறது.

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

Twitter: https://twitter.com/httamilnews 

Facebook" https://www.facebook.com/HTTamilNews 

You Tube: https://www.youtube.com/@httamil 

Google News: https://tamil.hindustantimes.com/