100வது படமாக தேர்வு.. கொடிக்கட்டி பறந்த சிவகுமார்.. பட்டி தொட்டி எங்கும் இளையராஜா இசை

தமிழ் சினிமாவில் 1970, 80களில் முன்னணி ஹீரோவாக வலம் வந்த நடிகர் சிவகுமாரின் 100வது படம் என்ற சிறப்பை பெற்ற ரோசாப்பூ ரவிக்கைகாரி ( Rosaappo Ravikkai Kaari)  படம், சிவகுமாரின் எதார்த்தமான நடிப்புக்காக ரசிகர்களை கவர்ந்ததுடன், கமர்ஷியல் ஹிட்டாகவும் அமைந்தது. இந்தப் படத்தில் செம்பட்டை என்ற அப்பாவித்தனமான கதாபாத்திரத்தில் சிறப்பான நடிப்பை வெளிப்படுத்திய சிவக்குமாருக்கு சிறந்த நடிகருக்கான பிலிம்பேர் விருது கிடைத்தது.

கன்னடத்தில் சூப்பர் ஹிட்டான பரசங்கட கெண்டதிம்மா என்ற படத்தின் ரீமேக்காக ரோசாப்பூ ரவிக்கைகாரி உருவானது. இந்தப் படம் மூலம் மறைந்த இயக்குநர், நடிகர் விஜயகிருஷ்ண ராஜா திரைக்கதை ஆசிரியராக அறிமுகமானதுடன், படத்தில் ஒரு கதாபாத்திரத்திலும் நடித்தார்.

வினுசக்கரவர்த்தியின் வண்டிச்சக்கரம் என்ற படத்தில் சிவகுமார் நடிப்பதாக இருந்த நிலையில், திடீர் மாற்றமாக இந்தப் படத்தில் நடித்தார். படமும் சூப்பர் ஹிட்டானதுடன் அவருக்கு நல்ல பெயரையும் பெற்று தந்தது. வினுசக்கரவர்த்தியும் இந்தப் படம் மூலம் நடிகராக அறிமுகமானார். படத்தை இரட்டை இயக்குநர்களான தேவராஜ் - மோகன் இயக்கியிருப்பார்கள்.

வண்டிச்சோலை என்ற மலை கிராமத்தை பின்னணியாக கொண்ட கதைக்களம், சுதந்திரத்துக்கு முந்தைய காலகட்டத்தை கொண்டதாக அமைந்திருக்கும். அந்த காலகட்டத்தில் திருமணத்துக்கு பின்னர் பெண்ணுக்கு மற்றொரு ஆண் மீது துளிர்விடும் காதல், அதனால் மனதில் நிகழும் ஊசலாட்டம், நம்பிக்கை துரோகம் போன்ற விஷயங்களை வெளிப்படையாக சொன்ன இந்த படம் விமர்சக ரீதியாகவும் பாராட்டை பெற்றது.

கிராமத்துக்கு வியபாரியாக வரும் சிவகுமார், நகரத்தில் பிறந்து சிவகுமாரை திருமணம் செய்து கிராமத்தில் வாழும் பெண்ணாக தீபா ஆகியோருக்கு இடையே இருக்கும் நாகரீக இடைவெளி அவர்களின் வாழ்க்கையில் எந்த மாதிரியான சிக்கல்களை உருவாக்குகிறது என்பதை மிகவும் எதார்த்தமாக காட்டியிருப்பார்கள்.

கதைக்களமான வண்டிசோலை கிராமத்தில் வசிக்கும் பெண்கள் ரவிக்கை என்பதை அணியாமல் இருந்து வரும், ரவிக்கையுடன் ஊருக்கும் வரும் தீபாவின் கதாபாத்திரத்தில் இருக்கும் வித்தியாசத்தை படம் முழுக்க சரியாக கையாண்டிருப்பார்கள்.

கதாநாயகியான தீபாவின் வாழ்க்கை முறைக்கு நேர் எதிராக சிவகுமாரின் பழக்க வழக்கம் இருக்க, இதனால் ஏற்படும் பிரச்னையில் தாய்க்காகவும் குரல் கொடுக்க முடியாமல், தாரத்துக்காகவும் பேச முடியாமல் சிவகுமார் அல்லல்படும் காட்சிகள் ரசிகர்களுக்கு அவர் மீது இயல்பான இரக்கத்தை ஏற்படுத்துவதாகவே இருக்கும்.

அரசு அதிகாரியின் உதவியாளரின் நடவடிக்கையால் ஈர்க்கப்பட்டு அவர் மீது காதல் கொள்வதும், பின்னர் மன ஊசலாட்டத்தில் தவிப்பதுமாக தீபாவின் கதாபாத்திரம் தரும் திருப்புமுனை, படம் முழுக்க அப்பாவியாக காட்டப்படும் சிவகுமார் இந்த விஷயத்தை எதிர்கொள்ளும் விதமும் கண்களை குளமாக்கின.

இளையராஜா இசையில் புலமைபித்தன், கங்கை அமரன் எழுதிய பாடல்கள் அனைத்தும் சூப்பர் ஹிட்டானது. எஸ்பிபி பாடிய உச்சி வகுடெடுத்து பிச்சி பூ பாடல் இன்று வரையிலும் பலரது ப்ளே லிஸ்டில் இடம்பிடித்த பாடலாக உள்ளது.

படத்தில் உள்ள சில அடல்ட் காட்சிகளுக்காக ஏ சர்டிபிக்கேட் வழங்கப்பட்டது. இருப்பினும் பட்டி தொட்டியெங்கும் சூப்பர் ஹிட்டானது.

சரியான கதையை 100வது படமாக தேர்வு செய்து, அதில் சிறப்பான பங்களிப்பை அளித்து பாராட்டையும் பெற்றார் சிவகுமார். அவரது சினிமா கேரியரில் முக்கிய படமாக இருக்கும் ரோசாப்பூ ரவிக்கைகாரி (Rosappu Ravikkaikari) படம் வெளியாகி இன்றுடன் 45 ஆண்டுகள் ஆகிறது.

சமூக வலைத்தளங்களில் எங்களை பின் தொடலாம். லிங்க்குகள் கீழே கொடுக்கப்பட்டு உள்ளன:

https://twitter.com/httamilnews

https://www.facebook.com/HTTamilNews

https://www.youtube.com/@httamil

Google News: https://bit.ly/3onGqm9